ممبئی انڈینز نے جمعرات کو آسٹریلیاکی سابق کرکٹر اور ۲؍ بار ورلڈ کپ جیتنے والی لیزا کیٹلی کو اپنی خواتین ٹیم کا ہیڈ کوچ مقرر کیا ہے۔

ممبئی انڈینز نے جمعرات کو آسٹریلیاکی سابق کرکٹر اور ۲؍ بار ورلڈ کپ جیتنے والی لیزا کیٹلی کو اپنی خواتین ٹیم کا ہیڈ کوچ مقرر کیا ہے۔ اس موقع پر اظہار مسرت کرتے ہوئے نیتا امبانی نے کہا ہمیں ممبئی انڈینز فیملی میں لیزا کیٹلی کا خیرمقدم کرتے ہوئے خوشی محسوس ہورہی ہے۔ لیزا نے اپنے شوق سے کرکٹ کے شائقین  کو متاثر کیا ہے۔ ان کی آمد ممبئی انڈینز کیلئے ایک دلچسپ نئے باب کی نشاندہی کرتی ہے کیوں کہ ہم بلند  پروازکی تیاری کر رہے ہیں۔
 لیزا کیٹلی نے کہا کہ ممبئی انڈینز میں شامل ہونا اعزاز کی بات ہے، ایک ایسی ٹیم جس نے ڈبلیو پی ایل میں بہت سے معیارات قائم کئے ہیں۔ میں اپنی کامیابی کو آگے بڑھانے اور میدان کے اندر اور باہرکھلاڑیوں کی حوصلہ افزائی کرنے کیلئے ٹیم کے ساتھ کام کرنے کیلئے پُر  جوش ہوں۔
 کیٹلی آسٹریلیا اور انگلینڈ دونوں خواتین ٹیموں کی کوچنگ کر چکی ہیں۔ وہ انگلینڈ کی کُل وقتی ہیڈ کوچ بننے والی پہلی خاتون تھیں۔ ان کے پاس ڈبلیو بی بی ایل،  دی  ہنڈرڈ  اور ڈبلیو پی ایل میں فرنچائز کوچنگ کا تجربہ بھی ہے اور حال ہی میں گزشتہ ماہ  دی  ہنڈرڈ میں ناردرن سپرچارجرز کو خواتین کے خطاب تک پہنچایا۔ کیٹلی کو ایک اسٹائلش اوپننگ بلے باز کے طور پر جانا جاتا ہے۔ انہوں نے ۹؍ ٹیسٹ، ۸۲؍ون ڈے اور ایک ٹی ۔۲۰؍ انٹر نیشنل میں آسٹریلیا کی نمائندگی کی ہے۔
  لیزا جو ۱۹۹۷ءاور ۲۰۰۵ءمیں آسٹریلیا کی ورلڈ کپ جیتنے والی ٹیموں کا حصہ تھیں، خواتین کی کرکٹ میں سب سے معزز کوچز میں سے ایک ہیں۔ آسٹریلیا، انگلینڈ اور ٹاپ عالمی لیگز میں اپنے شاندار کھیل کے کریئر اور کوچنگ کے تجربے کے ساتھ وہ ممبئی انڈینز ٹیم کے لئے بے مثال تجربہ اور وژن لائیں گی۔ ممبئی انڈینز کی خواتین ٹیم پہلے ہی  ڈبلیو پی ایل کی تاریخ کی سب سے کامیاب ٹیم ہے، جس نے صرف ۳؍ سیزن میں ۲؍ چمپئن شپ جیتی ہیں۔ وہ ۲۰۲۳ءاور ۲۰۲۵ءمیں ڈبلیو پی ایل کی چمپئن  ہیں۔