ومبلڈن کے فائنل میں کامیابی حاصل کرنے والے سربیا کے کھلاڑی چھٹی بار خطاب جیتنے کیلئے نومبر میں تورین میں کھیلیں گے
EPAPER
Updated: July 14, 2021, 12:58 PM IST | Agency | Turin
ومبلڈن کے فائنل میں کامیابی حاصل کرنے والے سربیا کے کھلاڑی چھٹی بار خطاب جیتنے کیلئے نومبر میں تورین میں کھیلیں گے
نوواک جوکووچ اپنا چھٹا ومبلڈن اورریکارڈ برابری کرنے والا۲۰؍ واں گرینڈ سلیم خطاب جیتنے کے بعد پیر کو۲۰۲۱ء اے ٹی پی فائنلز کے لئے کوالیفائی کرنے والے پہلے سنگلز کھلاڑی بن گئے ہیں۔ جوکووچ نے اتوارکو فائنل میں اٹلی کے ماتیو بیریٹنی کو ۴؍سیٹوں میں شکست دے کر ومبلڈن خطاب جیتا تھا، جس کی بدولت انہوں نے۱۴؍ نومبر سے تورین کے پالا ایلپٹور میں ہونے والے اے ٹی پی فائنلز کے لئے کوالیفائی کیا ہے۔ عالمی نمبروَن ٹینس کھلاڑی نے آل ٹائم بہترین کھلاڑی راجرفیڈرر اوررافیل ندال کے ساتھ برابری کے لئے۲۰۲۱ء کا اپنا تیسرا اہم خطاب جیت کر۱۴؍ ویں مرتبہ اے ٹی پی فائنلز میں جگہ یقینی کرلی ہے۔ تورین میں اب وہ چھٹی بار فائنل جیتنے کی کوشش کریں گے جو انہیں ایلیٹ ایونٹ میں فیڈرر کے ریکارڈ کی برابری کروائے گا۔ ۳۴؍سالہ جوکووچ نے ۲۰۰۷ء تا ۲۰۱۶ء اور ۲۰۱۸ء تا ۲۰۲۰ء کے درمیان اے ٹی پی فائنلز میں حصہ لیا ہے۔ انہوں نے ۲۰۰۸ء میں ٹرافی جیتی تھی، جب اس کا انعقاد شنگھائی میں ہوا تھا، پھر۲۰۱۲ء اور۲۰۱۵ء کے درمیان لندن میں لگاتار۴؍برسوں تک خطاب جیتا۔ داہنی کہنی میں چوٹ کے بعد۲۰۱۷ء میں کوالیفائی نہ کرپانے والے جوکووچ نے اس ممتازٹورنامنٹ میں۱۶۔۳۸؍کاریکارڈ بنایا ہے اور اس مقابلے میں وہ ہمیشہ اچھا کھیلتے آئے ہیں۔