آسٹریلیا، ہندوستان، جنوبی افریقہ اور گریٹ برطانیہ (انگلینڈ کی بہترین کارکردگی کی بدولت) نے ویمنز ٹی ۲۰؍ ورلڈ کپ ۲۰۲۶ء میں شاندار کارکردگی کا مظاہرہ کرتے ہوئے لاس اینجلس ۲۰۲۸ءاولمپک گیمز کے لیے کوالیفائی کر لیا ہے۔

آسٹریلیا، ہندوستان، جنوبی افریقہ اور گریٹ برطانیہ (انگلینڈ کی بہترین کارکردگی کی بدولت) نے ویمنز ٹی ۲۰؍ ورلڈ کپ ۲۰۲۶ء میں شاندار کارکردگی کا مظاہرہ کرتے ہوئے لاس اینجلس ۲۰۲۸ءاولمپک گیمز کے لیے کوالیفائی کر لیا ہے۔ لاس اینجلس اولمپکس کے ویمنز کرکٹ ایونٹ میں مجموعی طور پر چھ ٹیمیں حصہ لیں گی۔ ان چاروں ٹیموں نے بالترتیب اوشیانا، ایشیا، افریقہ اور یورپ کے براعظموں سے بہترین پوزیشن حاصل کرنے والی اہل ٹیموں کے طور پر اپنی جگہ پکی کی ہے۔

یہ بھی پڑھئے:بغیر اسٹار کھلاڑی کے برازیل کو مات دینے کا جاپانی مشن

دوسری جانب، ٹی ۲۰؍ ورلڈ کپ کے سیمی فائنل میں جگہ بنانے والی ویسٹ انڈیز کی ٹیم، جزائر کے ایک مشترکہ گروپ کی حیثیت سے اولمپکس میں حصہ لینے کی اہل نہیں ہے، کیونکہ انٹرنیشنل اولمپک کمیٹی  کے قوانین کے مطابق انہیں نیشنل اولمپک کمیٹی کے طور پر تسلیم نہیں کیا گیا ہے۔
مینز ٹیموں کے لیے چار مقامات کا فیصلہ آئی سی سی ٹی۲۰؍ رینکنگ کی بنیاد پر کیا جائے گا۔ رینکنگ میں ۳۱؍ دسمبر ۲۰۲۶ء تک افریقہ، ایشیا، یورپ اور اوشیانا سے سرفہرست رہنے والی اہل ٹیمیں اولمپکس کے لیے براہ راست کوالیفائی کریں گی۔ امریکہ بحیثیت میزبان دونوں (مرد اور خواتین) ایونٹس کے لیے کوالیفائی کرنے کا حق رکھتا ہے، لیکن اس کے لیے شرط یہ ہے کہ انہیں ۳۰؍ جون ۲۰۲۶ء سے۳۱؍ دسمبر ۲۰۲۶ء کی کوالیفکیشن مدت کے دوران ٹی ۲۰؍ رینکنگ کے ٹاپ ۱۵؍ میں شامل رہنا ہوگا۔ فی الوقت امریکی مینز ٹیم  ۱۳؍ویں نمبر پر موجود ہے، جس کی وجہ سے ان کی شمولیت کے امکانات کافی روشن ہیں۔
اس وقت امریکی ویمنز ٹیم رینکنگ میں ۲۰؍ویں پوزیشن پر ہے اور اگر وہ اس معیار پر پورا اترنے میں ناکام رہتی ہے، تو یکم مارچ ۲۰۲۷ء تک کسی بھی براعظم سے اولمپکس میں جگہ نہ بنانے والی ٹیموں میں سے، جو ٹیم ٹی ۲۰؍ رینکنگ میں سب سے اوپر ہوگی، اسے ایونٹ میں شامل کر لیا جائے گا۔

یہ بھی پڑھئے:’’آوارہ پن ۲‘‘کا ٹیزر جاری: عمران ہاشمی کے زبردست مکالمے نے سب کو دنگ کر دیا

ایونٹ کے لیے چھٹی اور آخری ٹیم کا فیصلہ کوالیفائر ٹورنامنٹ کے ذریعے ہوگا، جس میں مردوں اور خواتین دونوں کیٹیگریز میں آٹھ آٹھ ٹیمیں شرکت کریں گی۔ ان ٹیموں کا انتخاب ٹی۲۰؍ رینکنگ کی بنیاد پر کیا جائے گا۔اگر ویسٹ انڈیز کی مرد یا خواتین کی ٹیمیں ۳۱؍ دسمبر۲۰۲۶ء تک ان ٹاپ آٹھ رینکنگ والی ٹیموں میں شامل رہتی ہیں جنہوں نے اب تک کوالیفائی نہیں کیا ہے، تو ایسی صورتحال میں یہ فیصلہ کرنے کے لیے کہ کون سا کیریبین ملک اولمپکس میں اس خطے کی نمائندگی کرے گا، ایک خصوصی کیریبین ٹورنامنٹ کا انعقاد کیا جائے گا۔
اولمپکس کے دونوں ایونٹس میں حصہ لینے والی چھ ٹیموں کو تین تین کے دو گروپس میں تقسیم کیا جائے گا۔ اپنے گروپ کی ٹیموں کے خلاف کھیلنے کے بعد، ٹیمیں دوسرے گروپ کی ان ٹیموں سے میچ کھیلیں گی جو ان کی اپنی پوزیشن کے علاوہ ہوں گی۔ گروپ مرحلے کے بعد ٹاپ۲؍ پوزیشن حاصل کرنے والی ٹیمیں گولڈ اور سلور میڈل (طلائی اور نقرئی تمغے) کے لیے فائنل کھیلیں گی، جب کہ تیسرے اور چوتھے نمبر پر آنے والی ٹیموں کے درمیان برونز میڈل (کانسی کے تمغے) کے لیے مقابلہ ہوگا۔دونوں ایونٹس میں مجموعی طور پر ۲۸؍میچ کھیلے جائیں گے اور یہ تمام مقابلے پومونا  کے میدان پر منعقد ہوں گے۔