دنیا کی معروف ڈیبیٹنگ سوسائٹی آکسفورڈ یونین نے ایک اہم بحث کے بعد اس تحریک کے حق میں ووٹ دیا جس میں کہا گیا تھا کہ ’’اسرائیل خطے کے استحکام کیلئے ایران سے بڑا خطرہ ہے۔‘‘ سابق فلسطینی وزیر اعظم محمد شطیہ اور یو این واچ کے ڈائریکٹر ہلیل نیور کے درمیان گفتگو میں دونوں نے سخت دلائل پیش کیے۔ شطیہ نے اسرائیل کو ’’توسیع پسند، غیر قانونی ریاست‘‘ اور ’’نسل پرستانہ نوآبادیاتی نظام‘‘ قرار دیا۔

آکسفورڈ یونین نے اسرائیل اور ایران کے علاقائی کردار پر ہونے والی ایک اہم بحث میں ’’اسرائیل ایران کے مقابلے میں خطے کیلئے زیادہ عدم استحکام کا باعث ہے‘‘ کے عنوان سے پیش کی گئی تحریک کو بھاری اکثریت سے منظور کر لیا۔ بحث میں سابق فلسطینی وزیر اعظم محمد شطیہ نے تحریک کے حق میں دلائل دیتے ہوئے کہا کہ اسرائیل ایک ’’توسیع پسند نوآبادیاتی ریاست‘‘ ہے جو اقوام متحدہ کی قراردادوں کی خلاف ورزی کرتی ہے اور ’’فلسطینی عوام کے خلاف نسل پرستی پر مبنی نظام‘‘ نافذ کرتی ہے۔ ان کے مطابق اسرائیل کے اقدامات خطے کو مسلسل تنازعات میں دھکیلتے ہیں اور کچھ اسرائیلی لیڈروں کا ’’نیل سے فرات‘‘ تک سرحدوں کے تصور پر یقین مزید خطرات پیدا کرتا ہے۔

یہ بھی پڑھئے: جیو فائنانس ایپ پر صارفین بیک وقت اپنے تمام بینک کھاتوں کی تفصیلات دکھائے گا

تحریک کی مخالفت یو این واچ کے ڈائریکٹر ہلیل نیور نے کی۔ ان کا کہنا تھا کہ خطے میں حقیقی عدم استحکام کی وجہ ایران ہے، جو متعدد عرب ممالک میں عسکری گروہوں کو مسلح کرتا ہے۔ انہوں نے ایران کے حالیہ میزائل و ڈرون حملوں اور عرب ریاستوں کے اسرائیل کے ساتھ دفاعی تعاون کو مثال کے طور پر پیش کیا، یہ دلیل دیتے ہوئے کہ ’’استحکام اس سے نہیں ماپا جاتا کہ جنگیں کون روکتا ہے بلکہ اس سے کہ کون شروع کرتا ہے۔‘‘ ۱۸۲۳ء میں قائم ہونے والی آکسفورڈ یونین نے اسرائیل سے متعلق اپنے مباحثوں پر پہلے بھی تنقید کا سامنا کیا ہے۔ گزشتہ سال بھی اس نے ایک تحریک بڑے مارجن سے منظور کی تھی جس میں اسرائیل کو ’’نسل کشی کرنے والی نسل پرست ریاست‘‘ قرار دیا گیا تھا۔