مانچسٹر یونائٹیڈ کے عالمی شہرت یافتہ مسلم فٹبالر پال پوگبا نے فرانسیسی صدر کی جانب سے اسلام مخالف بیان پر فرانس کی نمائندگی سے انکار کی خبروں کی تردید کی ہے
مانچسٹر یونائٹیڈ کے عالمی شہرت یافتہ مسلم فٹبالر پال پوگبا نے فرانسیسی صدر کی جانب سے اسلام مخالف بیان پر فرانس کی نمائندگی سے انکار کی خبروں کی تردید کی ہے۔پال پوگبا نے انسٹاگرام پر اپنے پوسٹ میں خبر کو بے بنیاد قرار دیتے ہوئے کہا کہ نہ تو میں نے ایسا کہا ہے اور نہ ہی ایسا سوچا ہے۔اپنے انسٹاگرام اکاؤنٹ پر جاری کردہ ایک تصویر میں پال پوگبا نے برطانوی اخبار ’دی سن‘ کی خبر کو فرضی خبر کہا اور لکھا کہ ایسی خبریں پھیلانے والوں کو شرم آنی چاہئے۔فٹبالر کے مطابق وہ اس بات پر سخت ناراض اور مایوس ہیں کہ کچھ میڈیا ادارے بے بنیاد سرخیوں کیلئے مجھے استعمال کرکے ایک انتہائی حساس موضوع میں فرانسیسی ٹیم کو گھسیٹ رہے ہیں۔پوگبا کے مطابق وہ ہر قسم کے تشدد اور دہشت گردی کے خلاف ہیں۔ میڈیا کے کچھ نمائندے خبر بناتے وقت غیر ذمہ داری کا مظاہرہ کرتے ہوئے خبر کی تصدیق نہیں کرتے اور صحافتی آزادی کا غلط استعمال کرتے ہیں اور یہ بھی نہیں سوچتے کہ اس کا کسی کی زندگی پر کیا اثر ہوگا۔ فرانسیسی مسلم فٹبالر نے غلط خبر شائع کرنے اور اسے پھیلانے والوں کیخلاف سخت قانونی کارروائی کا بھی اعلان کیا
