وجئے ہزارے ٹرافی میں بہتر کارکردگی کامظاہرہ کرنے والے پرتھوی شا اور پڈیکل کو بھی شامل کرنے کی امید
EPAPER
Updated: March 18, 2021, 12:16 PM IST | Agency | Mumbai
وجئے ہزارے ٹرافی میں بہتر کارکردگی کامظاہرہ کرنے والے پرتھوی شا اور پڈیکل کو بھی شامل کرنے کی امید
وجئے ہزارے ٹرافی ایک روزہ ٹورنامنٹ کے سیمی فائنل تک پہنچنے والی ٹیم کرناٹک کے تیز گیندباز پرسدھ کرشنا کو اس سیزن میں۱۴؍ وکٹ لینے کا فائدہ انگلینڈ کے خلاف ہونے والی میچوں کی ون ڈے سیریز کے لئے ٹیم انڈیا میں پہلی بار موقع ملنے کی شکل ہوسکتا ہے۔ ون ڈے سیریز کے تینوں میچ مہاراشٹر کے پونے میں۲۳،۲۶؍ اور۲۸؍ مارچ کو کھیلے جانے ہیں۔ ہندوستانی گھریلو سرکٹ میں گزشتہ چند برسوں میں اپنی عمدہ گیندبازی سے شہرت پانے والےکرشنا ٹیم انڈیا کے تیز گیندبازی شعبہ میں محمد سراج، بھونیشور کمار، ٹی نٹراجن، نودیپ سینی اور شاردل ٹھاکر کے ساتھ جگہ بنائیں گے۔ یارکر مین جسپریت بمراہ ایک بار پھر ون ڈے سیریز سے بھی دور ہوں گے۔ بمراہ نے پیر کو ہی اپنی شادی کی تصاویر شیئر کی تھیں۔ بڑودہ کے آل راؤنڈر کرونال پانڈیا ون ڈے سیریز کیلئے۱۸؍ رکنی ٹیم میں شامل ہو سکتے ہیں۔ کرونال نے وجئے ہزارے میں ۲؍ سنچریوں کے علاوہ ۲؍نصف سنچریاں بھی اسکور کی تھیں لیکن ممبئی کے اوپنر پرتھوی شا جنہوں نے وجئے ہزارے میں عمدہ بلے بازی کی تھی اور کرناٹک کے اوپنر دیودت پڈیکل اس بار نظر انداز ہوسکتے ہیں۔ پرتھوی نے اس سیزن میں ۸۲۷؍ اور پڈیکل نے۷۳۷؍ رن بنائے ہیں۔ سلیکٹرس کا ماننا ہے کہ لوکیش راہل، شبھمن گل، شکھر دھون اور روہت شرما کے رہتے ہوئے ٹیم میں سلامی بلےبازوں کیلئے مزید کوئی جگہ نہیں ہے جب تک کہ آخری منٹ میں حکمت عملی میں کوئی تبدیلی نہ ہو۔ اگر ٹیم میں کوئی بڑی تبدیلی نہیں ہوتی ہے تو چاروں اوپنرس کی جگہ یقینی ہے۔ کسی کو آرام دئیے جانے کابھی کوئی امکان نہیں ہے۔