سلمان خان اور سَتنام سنگھ  نے جمعرات کو یہاں شاندار کارکردگی کا مظاہرہ کرتے ہوئے ہندوستان کو مردوں کے ڈبل اسکلز مقابلے میں ایشیائی کھیلوں کا پہلا تمغہ دلایا اور سخت مقابلے میں کانسہ کا تمغہ جیت کر ہندوستانی روئنگ کی تاریخ رقم کی۔

سلمان خان اور سَتنام سنگھ  نے جمعرات کو یہاں شاندار کارکردگی کا مظاہرہ کرتے ہوئے ہندوستان کو مردوں کے ڈبل اسکلز مقابلے میں ایشیائی کھیلوں کا پہلا تمغہ دلایا اور سخت مقابلے میں کانسہ کا تمغہ جیت کر ہندوستانی روئنگ کی تاریخ رقم کی۔ ہندوستانی جوڑی نے انتہائی سخت مقابلے والے فائنل میں۶؍منٹ ۱۳ء۲۵؍سیکنڈ کا وقت لیا۔ وہ پورے مقابلے میں سلور میڈل کی دوڑ میں شامل رہے لیکن آخری مرحلے میں معمولی فرق سے تیسرے مقام پر رہے۔

چین کے یی شُودی اور ییدے نی نے ۶؍منٹ ۹ء۷۷؍سیکنڈکے وقت کے ساتھ طلائی تمغہ جیتا جبکہ ازبکستان کے پاویل سورِن اور مِخروج بیک مامتکولوف نے۶؍منٹ۱۰ء۴۹؍ سیکنڈکے وقت کیساتھ چاندی کا تمغہ حاصل کیا۔

یہ بھی پڑھئے: زیدان کا ایمباپے کو لیفٹ وِنگ پر کھلانے کا فیصلہ

ہندوستان نے جارحانہ انداز میں آغاز کیا اور ۵۰۰؍ میٹر کے مقام پر دوسرے نمبر پر تھا۔ سلمان اور ستنام نے مقابلے کے درمیانی مراحل میں بھی اپنی برتری برقرار رکھی اورایک ہزار میٹر اور ۱۵۰۰؍ میٹر پر بھی دوسرے مقام پر رہے۔ چینی جوڑی سب سے آگے رہتے ہوئے رفتار برقرار رکھے ہوئے تھی، اس لئے ہندوستان چاندی کے تمغے کی جانب بڑھتا دکھائی دے رہا تھالیکن آخری ۵۰۰؍ میٹر میں ازبکستان کی جوڑی نے زبردست تیزی دکھائی۔ ہندوستانی جوڑی نے تمغے کی پوزیشن برقرار رکھنے کے لئے بھرپور کوشش کی،آخرکار تیسرے مقام پر رہ کر کانسے کا تمغہ حاصل کیا۔

یہ کانسے کا تمغہ ہندوستانی روئنگ کیلئے ایک بڑی کامیابی ثابت ہواکیونکہ ہندوستان نے مردوں کے ڈبل اسکلز مقابلے میں ایشیائی کھیلوں کا اپنا پہلا تمغہ حاصل کیا۔سَتنام کے لئے یہ مسلسل دوسرے ایشیائی کھیلوں میں پوڈیم پر پہنچنے کا موقع تھا۔ وہ ۲۰۲۳ء کے ہانگژو ایشیائی کھیلوں میں کانسہ کا تمغہ جیتنے والی ہندوستانی مردوں کی کواڈروپل اسکلز ٹیم کا حصہ تھے۔

یہ بھی پڑھئے: اننت اور پریناز نے کانسے کے تمغے پر نشانہ لگایا

دوسری جانب سلمان نے ایشیائی کھیلوں کا اپنا پہلا تمغہ جیتا۔ ان کا روئنگ کا سفر ۲۰۱۸ءمیں ہندوستانی فوج کے ممبئی انجینئر گروپ کے ذریعے اس کھیل سے وابستہ ہونے کے بعد شروع ہوا تھا۔ سَتنام نے ہینڈ بال سے روئنگ کا رخ کیا اور قومی و بین الاقوامی سطح پر اپنی شناخت بنائی۔ انہوں نے ۲۰۱۸ءکے یوتھ اولمپکس میں ہندوستان کی نمائندگی کی اور بعد میں سینئر قومی روئنگ چمپئن شپ میں مردوں کے سنگل اسکلز کا خطاب بھی جیتا۔

ہندوستانی جوڑی کی اس کارکردگی نے آئیچی۔ناگویا میں ہندوستان کی روئنگ مہم کو تاریخی حیثیت دے دی۔ سَتنام کے تجربے اور سلمان کی ثابت قدمی نے مل کر اس مقابلے میں ہندوستان کو ایشیائی کھیلوں کا پہلا تمغہ دلایا۔