چنئی سپر کنگز کے ہیڈ کوچ اسٹیفن فلیمنگ نے کہا ہے کہ بلے باز امباتی رائیڈو اور آل راؤنڈر ڈوین براوو جمعہ کو سن رائزرز حیدرآباد کے خلاف آئی پی ایل میچ میں سلیکشن کے لئے دستیاب ہیں۔

چنئی سپر کنگز کے ہیڈ کوچ اسٹیفن فلیمنگ نے کہا ہے کہ بلے باز امباتی رائیڈو اور آل راؤنڈر ڈوین براوو جمعہ کو سن رائزرز حیدرآباد کے خلاف آئی پی ایل میچ میں سلیکشن کے لئے دستیاب ہیں۔براوو نے ابھی تک آئی پی ایل میں تینوں میچ نہیں کھیلے ہیں جبکہ رائڈو ممبئی کے خلاف پہلے میچ میں کھیلے تھے لیکن وہ انجری کے سبب ۲؍ میچوں سے باہر ہوگئے تھے۔ ٹیم کے کوچ فلیمنگ نےجمعرات کو بتایا کہ رائیڈو اور براوو دونوں اس میچ میں سلیکشن کیلئے دستیاب ہیں۔ چنئی نے ابوظبی میں دفاعی چمپئن ممبئی انڈینس کو شکست دے کر ٹورنامنٹ کا فاتحانہ آغاز کیا لیکن آخری ۲؍میچوں میں وہ شارجہ میں  راجستھان رائلز سے اور دبئی میں دہلی کیپٹلز سے ہار گیا۔ ٹیم کے کوچ کا خیال ہے کہ ۶؍دن کے آرام سے ٹیم کو فائدہ ہوگا اور چنئی کی ٹیم اس میچ میں واپسی کرے گی ۔ فلیمنگ نے کہا کہ وقفہ صحیح وقت پر ہوا کیونکہ پہلے ۳؍میچ بہت تیزی سے ہو چکے اور تمام میچ مختلف گراؤنڈز پر کھیلے گئے تھے۔ آپ کو ہر صورتحال کیلئے تیار رہنا ہوگا۔ ہمیں میدان میں بہت سے چیلنجوں پر قابو پانا ہے اور ہمیں اس وقفے کا فائدہ ملے گا۔ جن شعبوں میں ہمیں سدھار کرنا تھا ہم نے اس کے مطابق پریکٹس کی ہے۔