ان دنوں بالی ووڈکی فضاؤں میں عشق کی خوشبو کچھ زیادہ ہی گہری ہو گئی ہے۔’’سَیّارا‘‘ کی بھاری کامیابی کے بعد پوری انڈسٹری کو جیسے محبت کی نئی لہر نےاپنے گھیرے میں لے لیا۔ ’دھڑک۲‘، ’پرَم سندری‘،’سنی سنسکاری کی تُلسی کماری‘ اور’ایک دیوانے کی دیوانگی‘ یوں لگتا ہے جیسے ہر باری کھڑکی سے عشق جھانک رہا ہے۔اسی سیراب ماحول میں اس ہفتے بھی محبت کی  داستان لیے ۲؍نئی فلمیں ریلیز ہو رہی ہیں’گستاخ عشق‘ اور ’تیرے عشق میں‘۔

فلم’تیرے عشق میں‘ ایسی کہ جس میں خونی حد تک جنونی چاہت کاآتشیں رنگ بھی ہے اور مر مٹنے والی محبت کی وہ پرانی ایمانداری بھی، جو آج کل کم ہی دکھائی دیتی ہے۔ہدایت کار آنند ایل رائے اور اداکار دھنش کی جوڑی نے ’رانجھنا‘ میں جو کرشمہ دکھایا تھا، وہی جادو ایک بار پھر اس فلم میں بھرپور انداز میں لوٹ آیا ہے۔ مصنفین ہمانشو شرما اور نیرج یادو کے لکھے ہوئے ڈائیلاگ ’میں پیار میں پڑ گیا تو دلی پھونک دوں گا‘فرنٹ بینچرز کے دل و دماغ میں آگ سی لگا دیتے ہیں۔

فلم کی کہانی کا مرکزی کرداردہلی یونیورسٹی اسٹوڈنٹس یونین (ڈی یو ایس یو)کا دبنگ صدر شَنکر (دھنش)۔غصہ، تشدد اور ضد اس کےمزاج کاحصہ ہیں، اور یہی وجہ ہے کہ کالج میں اس کا کوئی نہ کوئی  جھگڑا‘ روز کا قصہ ہے۔انہی راہداریوں میں پڑھتی ہے مُکتی بینیوالی ایک سنجیدہ، سلجھی ہوئی، علم دوست ریسرچ اسکالر۔مکتی اپنی تھیسس میں یہ ثابت کرنا چاہتی ہے کہ ’تشدد پسند انسان کا بنیادی مزاج بھی تبدیل ہو سکتا ہے‘۔اس مقصد کے لیے وہ شَنکر کو اپنا’سبجیکٹ‘ بناتی ہے، اس سے دوستی بڑھاتی ہے، اسے سمجھنے لگتی ہے… مگر شنکرتو کب کا اس کے عشق میں گرفتار ہو چکا ہوتا ہے۔وقت گزرنے کے ساتھ شنکر کے اندر  غصہ کی آگ ٹھنڈی پڑنے لگتی ہےمگر محبت کا جنون مزید بھڑک اٹھتا ہے۔وہ خود کو بدلتا ہے، آزمائشوں سے گزرتا ہے، اپنی شکستہ فطرت کو قابو میں لاتا ہے۔لیکن جب اسے معلوم ہوتا ہے کہ مکتی اسے محبت نہیں کرتی تو اس کے اندر کی وحشت پھر جاگ اٹھتی ہے۔ وہی پرانا شعلہ ’دل جلا ہے تو دنیا بھی جلا ڈالوں گا‘اس کے لہجے میں لوٹ آتا ہے۔سات برس کی دراڑ کے بعد تقدیر ایک بار پھر دونوں کو آمنے سامنے لے آتی ہے۔مگر اس بار صرف شنکر نہیں، مکتی بھی اس عشق کے زخموں میں ڈوب چکی ہے۔

آنند ایل رائے کو شدت سے جڑی ہوئی محبت کی کہانیاں کہنے کا ہنرخوب آتا ہے۔’تنّو ویڈس منّو‘ ہو یا’رنجھنا‘انہوں نے ہمیشہ جذبات کی تہوں کو بڑی مہارت سے کھنگالا ہے۔’تیرے عشق میں‘ اسی روایت کی توسیع ہے۔فلم کا پہلا حصہ بےحد مضبوط ہے،کہیں وقت ضائع نہیں ہوتا، کہانی فوراً گرفت میں لے لیتی ہے۔دو متضاد پس منظر سے آئے شَنکر اور مکتی کی کشمکش، محبت کی شدت، ٹوٹا ہوا دل، حدسے بڑھ جانے والی چاہت، خاندان سے جڑی نرمی،سب کچھ بڑےتوازن سے دکھایا گیا ہے۔مگر انٹرویل کے بعد کہانی لڑکھڑا جاتی ہے۔پکڑ ڈھیلی پڑتی ہے۔ کلائمکس فلمی، روایتی اور کہیں کہیں غیر ضروری طور پر کھنچا ہوا محسوس ہوتا ہے۔ ایسا لگتا ہے کہ اگر مدتِ فلم کچھ کم ہوتی تو لطف میں اضافہ ہو جاتا۔

 

 

اداکاروں کی بات کی جائے تو ہر کوئی اپنی جگہ ٹھیک جچتا ہے، مگر دھنش ایک بار پھر بازی مار لے جاتے ہیں۔ان کے چہرے پر جھلملاتی محبت،آتش بن کر لپکتا جنون،آنسوؤں کی کسک،درد کی تلخی، اور دل کی شکستگی،سب کچھ اس نفاست سے دکھاتے ہیں کہ کردار سانس لینے لگتا ہے۔کریتی سینن نے بھی اپنی خوبصورتی کے ساتھ اداکاری کا بھرپور ثبوت دیا ہے۔ان کے اور دھنش کے درمیان کی کیمسٹری فلم کو آگے بڑھاتی ہے۔محمد ذیشان ایوب مختصر اسکرین ٹائم میں بھی دل جیت لیتے ہیں،جبکہ پرکاش راج اور پریشانشو پینولی نے اپنے کرداروں کو گہرائی بخشی ہے۔

 

اگر آپ کو شدت سے بھری محبت، ٹوٹتے دلوں کی چیخ، اور جنون کےکنارےپرکھڑی کہانیاں پسند ہیں،تو یہ ضرور دیکھی جا سکتی ہے۔

تیرے عشق میں    (Tere Ishk Mein)
اسٹارکاسٹ:دھنش، کریتی سینن، پرکاش راج،سشیل دہیا،  محمد ذیشان ایوب،پریانشی پینولی، ماہر محی الدین،ریڈن کنگسلے
ڈائریکٹر :آنند ایل رائے
رائٹر :ہمانشو شرما، نیرج یادو
پروڈیوسر:بھوشن کمار، کرشن کمار، آنند ایل رائے،ہمانشو شرما
موسیقار:اے آر رحمان
سنیماٹو گرافر:تشار کانتی رے، وشال سنہا
ایڈیٹر:ہیمل کوٹھاری، پرکاش چندر ساہو
کاسٹنگ ڈائریکٹر:دیپالی سرین
پروڈکشن ڈیزائن:نتن زیہانی چودھری