جب ’’مائیکل‘‘ ، کنگ آف پاپ مائیکل جیکسن کی زندگی پر بننے والی بایوپک ان کی غیر معمولی زندگی کو دوبارہ بڑے پردے پر لاتی ہے تو ایک مانوس چہرہ یا یوں کہیں کہ ایک مشہور چمپینزی دوبارہ توجہ حاصل کر رہا ہے جس کا نام ببلز ہے۔

جب ’’مائیکل‘‘ ، کنگ آف پاپ مائیکل جیکسن کی زندگی پر بننے والی بایوپک ان کی غیر معمولی زندگی کو دوبارہ بڑے پردے پر لاتی ہے تو ایک مانوس چہرہ یا یوں کہیں کہ ایک مشہور چمپینزی دوبارہ توجہ حاصل کر رہا ہے جس کا نام ببلز ہے۔ فلم میں سی جی آئی کے ذریعے دکھایا گیا ببلز۱۹۸۰ء کی دہائی میں مائیکل جیکسن کی ذاتی زندگی کا سب سے زیادہ زیرِ بحث حصہ تھا۔ دنیا بھر میں پاپ آئیکون کے ایک منفرد ساتھی کے طور پر مشہور، ببلز خود بھی ایک پاپ کلچر فینومینا بن گیا تھا۔ لیکن جہاں فلم اس کے نیورلینڈ اور جیکسن اسٹیٹ کے دنوں کو دکھاتی ہے، وہیں اصل ببلز آج بھی زندہ ہے اور ہالی ووڈ کی چمک دمک سے دور ایک پُرسکون زندگی گزار رہا ہے۔
مائیکل جیکسن نے ۱۹۸۰ء کی دہائی کے اوائل میں، اپنے عروج کے دور میں، ٹیکساس کی ایک تحقیقی سہولت سے ببلز کو اپنایا تھا۔ اس وقت جیکسن کی غیر معمولی جانوروں میں دلچسپی معروف تھی اور ببلز جلد ہی دنیا کے مشہور ترین سیلیبریٹی پالتو جانوروں میں شامل ہو گیا۔ یہ چمپینزی اکثر جیکسن کے ساتھ عوامی تقریبات، فوٹو شوٹس، اور حتیٰ کہ ریکارڈنگ سیشنز میں بھی دیکھا جاتا تھا۔ ببلز جیکسن کے شاندار طرزِ زندگی کا حصہ سمجھا جاتا تھا، جس میں ژراف، لاما اور سانپ جیسے عجیب و غریب پالتو جانور بھی شامل تھے۔ فلم ’’مائیکل ‘‘میں ببلز کی جیکسن خاندان کے گھر آمد کو گلوکار کی غیر روایتی ذاتی دنیا کی ایک یادگار جھلک کے طور پر پیش کیا گیا ہے۔

یہ بھی پڑھئے:ثریا اور دیو آنند نےجن فلموں میں کام کیا، وہ فلم شائقین کے ذہنوں پر نقش ہوگئی

ببلز صرف ایک عام سیلیبریٹی پالتو جانور نہیں تھا۔ وہ ایک میڈیا سنسنی بن گیا تھا، جو ٹیبلوئڈز، ٹی وی کوریج اور عوامی مباحثوں میں نظر آتا تھا، خاص طور پر مائیکل جیکسن کی منفرد شخصیت کے حوالے سے۔ اس وقت جب جیکسن کی شہرت بے مثال تھی، ببلز نہ صرف ان کے جانوروں سے محبت کی علامت تھا بلکہ ایک ایسی عجیب و غریب طرزِ زندگی کی نمائندگی بھی کرتا تھا جو دنیا بھر کے مداحوں کو حیران کرتی تھی۔ چاہے وہ مائیکل کے ساتھ بیٹھا ہو، سفر کر رہا ہو یا صرف تصاویر میں نظر آ رہا ہو، ببلز کنگ آف پاپ کی عوامی شناخت کا لازمی حصہ بن چکا تھا۔لائنزگیٹ، جو فلم ’’مائیکل ‘‘ کا اسٹوڈیو ہے، کے مطابق ببلز اس وقت ۴۳؍ سال کا ہے اور گزشتہ دو دہائیوں سے زیادہ عرصے سے فلوریڈا کے شہر واچولا میں واقع سینٹر فار گریٹ ایپس نامی پناہ گاہ میں رہ رہا ہے۔ یہ پناہ گاہ چمپینزیوں اور اورنگوٹانز کی دیکھ بھال کرتی ہے اور ببلز کو ایک مستحکم اور پُرسکون ماحول فراہم کرتی ہے، جو سیلیبریٹی زندگی کے دباؤ سے بالکل مختلف ہے۔ بتایا جاتا ہے کہ مائیکل جیکسن اسٹیٹ اب بھی اس کی دیکھ بھال میں تعاون کرتی ہے۔

یہ بھی پڑھئے:بڑی ٹیک کمپنیاں ملازمین کی چھٹنی کرکے اے آئی میں سرمایہ کاری بڑھا رہی ہیں

آج ببلز کو اس کے چمپینزی گروپ کا ایک پُرسکون اور معزز رکن سمجھا جاتا ہے۔ پاپ اسٹارڈم اور میڈیا کی توجہ سے دور، وہ اب مصوری سے لطف اندوز ہوتا ہے۔ سینٹر فارم گریٹ ایپس کے مطابق ببلز رنگ برنگی پینٹنگز بنانا پسند کرتا ہے اور اکثر خاموشی سے کینواس کے ساتھ وقت گزارتا ہے۔ اس کے نگہداشت کرنے والوں کا کہنا ہے کہ وہ اپنی پینٹنگ اسی وقت دیتا ہے جب اسے مکمل سمجھتا ہے، جو اس کی حیرت انگیز صبر اور شخصیت کو ظاہر کرتا ہے۔وہ کھیل کود کا بھی شوقین ہے اور کبھی کبھار پانی یا ریت کے چھینٹوں سے آنے والوں کو چھیڑتا ہے۔ اگرچہ وہ شرمیلا ہے، لیکن بتایا جاتا ہے کہ ببلز اپنے چمپینزی ساتھیوں کے ساتھ سماجی رہتا ہے اور ان کے ساتھ قریبی تعلقات قائم رکھتا ہے۔