اِن دونوں جماعتوں کے امتحانات صرف گریڈز حاصل کرنے کیلئے نہیں ہیں بلکہ طلبہ کی ذہنی، تعلیمی اور شخصی نشوونما کیلئے بھی بے حد ضروری ہیں۔ یہ انہیں مستقبل کے تعلیمی چیلنجز کیلئے تیار کرتے ہیں۔

دسویں اور بارہویں کے بورڈ امتحانات ختم ہوچکے ہیں البتہ نچلی جماعتوں بشمول آٹھویں اور نویں، کے امتحانات شروع ہیں، یا، چند دنوں میں شروع ہونگے۔ آٹھویں اور نویں کے امتحانات میں نمایاں کامیابی، اعلیٰ جماعتوں میں بہتر کارکردگی کی راہ ہموار کرتی ہے۔ ان دو جماعتوں نویںکے امتحانات طلبہ کے تعلیمی سفر کا اہم مرحلہ ہیں کیونکہ یہ ان کی تعلیمی بنیاد کو مضبوط کرتے ہیں۔ یہ امتحانات طلبہ کو سخت محنت، منصوبہ بندی اور وقت کی پابندی کی اہمیت سکھاتے ہیں جو ان کے مستقبل کی تعلیمی اور پیشہ ورانہ زندگی میں کام آتی ہے۔ آٹھویں کا امتحان ثانوی تعلیم میں داخلے کیلئے سنگ میل کی حیثیت رکھتا ہے جبکہ نویں کا امتحان دسویں کے بورڈ امتحانات کی تیاری کا بنیادی زینہ ہے۔ یہ امتحانات طلبہ کی ذہنی صلاحیتوں کو پرکھنے، ان کے کمزور پہلوؤں کو اجاگر کرنے اور ان کی تعلیمی ترقی کا جائزہ لینے میں مددگار ثابت ہوتے ہیں۔ مزید برآں، طلبہ میں خوداعتمادی پیدا ہوتی ہے اور وہ مستقبل کے بڑے چیلنجز کیلئے خود کو تیار کر سکتے ہیں۔ 

یہ بھی پڑھئے: جانئے ڈسپلن سکھانے والے ماہ ِرمضان کے بعد بھی ڈسپلن کیسے قائم رکھیں ؟

آٹھویں جماعت کے امتحانات کیوں ضروری ہیں؟
آٹھویں جماعت کے امتحانات طلبہ کے تعلیمی سفر میں ایک اہم سنگِ میل ہوتے ہیں۔ یہ نہ صرف ان کی تعلیمی قابلیت کو پرکھنے کا ذریعہ ہیں بلکہ مستقبل میں ان کی تعلیمی اور ذہنی نشوونما میں مدد فراہم کرتے ہیں۔ درج ذیل نکات سے آٹھویں جماعت کے امتحانات کی اہمیت واضح ہوتی ہے:
(۱) تعلیمی بنیاد مضبوط کرنا: آٹھویں جماعت تک طلبہ بنیادی تعلیمی تصورات (Concepts) سیکھ چکے ہوتے ہیں اور امتحانات ان کی سیکھنے کی صلاحیت کو جانچنے میں مدد کرتے ہیں۔ یہ مشکل مضامین جیسے ریاضی اور سائنس کی مہارتوں کی بنیاد ہیں۔
(۲) نظم و ضبط اور وقت کا بہتر استعمال: امتحانات کی تیاری کے دوران طلبہ نظم و ضبط اور وقت کی منصوبہ بندی سیکھتے ہیں۔ یہ صلاحیتیں ان کیلئے اعلیٰ تعلیم اور عملی زندگی میں کارآمد ثابت ہوتی ہیں۔
 (۳) تعلیمی راہ متعین کرنا:یہ امتحانات طلبہ کو سمجھنے میں مدد کرتے ہیں کہ ان کی دلچسپی کس مضمون میں ہے اور وہ مستقبل میں کون سا شعبہ اختیار کرسکتے ہیں۔
(۴) خود اعتمادی میں اضافہ:جب طلبہ امتحانات کی تیاری کرتے ہیں اور کامیابی حاصل کرتے ہیں تو ان کا اعتماد بڑھتا ہے۔ اچھے نمبر حاصل کرنے سے ان میں مثبت مقابلے کا رجحان پیدا ہوتا ہے اور وہ مزید محنت کرنے کی ترغیب حاصل کرتے ہیں۔ امتحانات یہ سکھاتے ہیں کہ کامیابی اور ناکامی زندگی کا حصہ ہیں اور ان سے سبق لے کر آگے بڑھنا ضروری ہے۔
(۵) قابلیت اور کمزوریوں کا تجزیہ: (Self Assesment): امتحانات کے نتائج سے معلوم ہوتا ہے کہ طلبہ کو کن مضامین میں محنت کی ضرورت ہے اور کن مضامین میں مہارت حاصل ہے۔
(۶) مطالعہ کی عادت(Development of Study Habits): آٹھویں کے امتحانات طلبہ میں مطالعہ کی مؤثر عادات اور وقت کے منصوبہ بندی کی مہارتوں کو فروغ دینے ہیں۔ اس امتحان کے دوران طلبہ نصابی اور غیر نصابی کتابوں کا مطالعہ کرتے ہیں جس سے ان کا ذہن کشادہ ہوتا ہے اور وہ تخلیقی سوچ کے حامل بنتے ہیں۔
(۷) محنت اور ڈسپلن کی عادت: آٹھویں کے امتحانات طلبہ میں ثابت قدمی اور مستقل مزاجی کی عادت پیدا کرتے ہیں۔

یہ بھی پڑھئے: بحیثیت طالب علم اُردو اور انگریزی کی یہ ۱۰؍ نظمیں ضرور پڑھئے، بہت فائدہ ہوگا!

نویں جماعت کے امتحانات کیوں ضروری ہیں؟
 نویں جماعت کے امتحانات تعلیمی سفر میں اہم موڑ ہوتے ہیں۔ یہ طلبہ کو دسویں جماعت کے اہم بورڈ امتحانات کیلئے تیار کرتے ہیں اور ان کی تعلیمی، ذہنی، اور عملی زندگی میں کامیابی کی راہ ہموار کرتے ہیں۔ نویں جماعت کے امتحانات کی اہمیت درج ذیل نکات سے واضح ہوتی ہے:
(۱) دسویں جماعت کیلئے تیاری کی بنیاد: نویں جماعت میں سیکھے گئے تصورات (Concepts) دسویں جماعت کے نصاب کی بنیاد بنتے ہیں۔ اگر طلبہ نویں جماعت میں مضبوط تعلیمی کارکردگی دکھاتے ہیں، تو وہ دسویں جماعت میں بھی بہتر کارکردگی کا مظاہرہ کر سکتے ہیں۔
(۲) نظم و ضبط پیدا کرنا: نویں جماعت کے امتحانات طلبہ کو منظم مطالعے، وقت کے صحیح استعمال اور امتحانی دباؤ کو سنبھالنے کا طریقہ سکھاتے ہیں جو آگے چل کر تعلیمی اور عملی زندگی میں کارآمد ثابت ہوتے ہیں۔
(۳) بورڈ امتحانات کے دباؤ سے واقفیت: نویں جماعت کا امتحانی نظام طلبہ کو بورڈ امتحانات کے طریقۂ کار، سوالات کے پیٹرن اور امتحانی دباؤ سے آشنا کرتا ہے تاکہ وہ دسویںجماعت کیلئے ذہنی طور پر تیار رہیں۔
(۴) تعلیمی قابلیت اور دلچسپیوں کا تجزیہ: یہ امتحانات طلبہ کو اپنی تعلیمی قابلیت اور کمزوریوں کو جانچنے کا موقع فراہم کرتے ہیں تاکہ وہ جان سکیں کہ انہیں کن مضامین میں زیادہ محنت کی ضرورت ہے اور کون سا تعلیمی شعبہ ان کیلئے زیادہ موزوں ہے۔ 
(۵) مقابلے کی صلاحیت پیدا کرنا: نویں کے امتحانات طلبہ کو مسابقتی ذہنیت (Competitive Mindset) اپنانے میں مدد کرتے ہیں جو انہیں مستقبل میں انٹری ٹیسٹ، اسکالرشپ امتحانات، اور دیگر مسابقتی چیلنجز کیلئے تیار کرتے ہیں۔
(۶) کریئر کی بہترین منصوبہ بندی: نویں جماعت کے نتائج کی بنیاد پر طلبہ آگے کے تعلیمی راستے (سائنس، آرٹس، یا کامرس) کا انتخاب بہتر طریقے سے کر سکتے ہیں۔
(۷) اساتذہ کیلئے رہنمائی کا موقع: ان امتحانات کے نتائج اساتذہ اور والدین کو یہ جاننے میں مدد کرتے ہیں کہ طلبہ کوکن مضامین میں زیادہ توجہ اور مدد درکار ہے۔ اس بنیاد پر وہ لائحہ عمل بناتے ہیں۔

یہ بھی پڑھئے: نصب العین کو پانے کی تمنا اور بہادری کی مثال سنیتا ولیمز اور وِلمور

آٹھویں اور نویں جماعت کے امتحانات کے متعلق دلچسپ معلومات
(۱) نویں جماعت کو’’فلٹر کلاس‘‘کہا جاتا ہے کیونکہ اس میں طلبہ کو زیادہ سخت مضامین اور پیچیدہ تصورات کا سامنا کرنا پڑتا ہے۔کئی طلبہ کو نویں جماعت سب سے مشکل معلوم ہوتی ہے اور اس میں کامیابی حاصل کرنا انہیں دسویں کیلئے تیار کراتا ہے۔
(۲) دنیا بھر میں امتحانی نظام مختلف ہے۔ کئی ممالک میں آٹھویں اور نویں جماعت کے امتحانات کو زیادہ سختی سے نہیں لیا جاتاجبکہ بعض ممالک میں ان کا مستقبل کے داخلوں پر براہ راست اثر پڑتا ہے۔ مثال کے طور پر، فن لینڈ میں نویں جماعت کے بعد طلبہ اپنی دلچسپی کے مطابق مضامین کا انتخاب کرتے ہیں جبکہ جاپان میں نویں جماعت کے امتحانات طلبہ کے کریئر کا رخ متعین کرتے ہیں۔(۳) ماہرین کا مانناہے کہ آٹھویں اور نویں جماعت کے امتحانات کی تیاری کے دوران طلبہ کا دماغ زیادہ فعال ہوتا ہے اور یہ ان کی یادداشت، منطق، اور مسائل حل کرنے کی صلاحیت بہتر بناتے ہیں۔

(۴) سنگاپور کے کچھ اسکول امتحانات کے دن طلبہ کو چاکلیٹ اور مشروبات دیتے ہیں تاکہ وہ ریلیکس محسوس کریں۔ چین میں امتحانات سے پہلے انہیں ذہنی سکون کیلئے ورزش اور یوگا کرائی جاتی ہے۔ جنوبی کوریا میں والدین امتحانات کے دن بچوں کو چاول کیک (Rice Cake) کھلاتے ہیں ۔
(۵) ایک دلچسپ تحقیق کے مطابق، نویں جماعت کے امتحانات میں طلبہ کیلئے سب سے مشکل مضمون عام طور پر ریاضی یا فزکس ہوتا ہے۔ بعض ممالک میں’ ’منطقی سوالات‘‘(Logical Reasoning Questions) کو امتحانات میں شامل کیا جاتا ہے تاکہ طلبہ کی ذہنی صلاحیتوں کو جانچا جا سکے۔
(۶) کئی کالجز اور اسکولیں نویں جماعت کے نمبر کو گیارہویں جماعت میں داخلے کیلئے مدنظر رکھتے ہیں اس لئے انہیں کم اہم نہیں سمجھنا چاہئے۔ نویں کے امتحانات تعلیمی منصوبہ بندی کیلئے اہم ہوتے ہیں کیونکہ ان کے نتائج گیارہویں اور بارہویں کے مضامین کے انتخاب پر اثر انداز ہوتے ہیں۔ واضح رہے کہ مایکل کرنی نے صرف ۸؍سال کی عمر میں ہائی اسکول مکمل کر لیا تھا۔