Kamala Sohonie نے نہ صرف خود کامیابی حاصل کی بلکہ آنے والی نسلوں کیلئےبھی راستہ ہموار کیا۔ انہیں متعدد اعزازات سے نوازا گیا۔

کملا سوہونی ہندوستان کی ممتاز خاتون سائنسداں تھیں جنہوں نے ہندوستان میں حیاتی کیمیا (Biochemistry) کے میدان میں نمایاں خدمات انجام دیں۔ وہ ہندوستان کی پہلی خاتون تھیں جنہیں کسی سائنسی ادارے میں باقاعدہ تحقیق کی اجازت ملی اور جنہوں نے اعلیٰ سطح پر سائنسی تحقیق کر کے خواتین کیلئے تعلیم اور تحقیق کے دروازے کھولنے میں اہم کردار ادا کیا۔ وہ پہلی ہندوستانی خاتون تھیں جنہوں نے سائنس کے شعبے میں ایک برطانوی یونیورسٹی سے اپنی تحقیق پر پی ایچ ڈی کی سند حاصل کی ہو۔ 
کملا سوہونی ۱۸؍ جون۱۹۱۱ءکو اندورمیں ایک تعلیم یافتہ اور علمی گھرانے میں پیدا ہوئیں۔ ان کے والد نارائن راؤ بھاگوت ایک معروف کیمیا داں تھے اور ٹاٹا انسٹی ٹیوٹ آف سائنس (بعد میں انڈین انسٹی ٹیوٹ آف سائنس) سے وابستہ رہے۔ اسی علمی ماحول کی وجہ سے کملا سوہونی کو بچپن ہی سے سائنس سے دلچسپی پیدا ہوئی۔ انہوں نے اپنی ابتدائی تعلیم بڑی لگن سے حاصل کی اور بعد ازاں ممبئی یونیورسٹی سے کیمسٹری میں بی ایس سی کی ڈگری نمایاں نمبروں کے ساتھ حاصل کی۔ 

یہ بھی پڑھئے: جیمز ایلن مشہور برطانوی فلسفی، مصنف اور روحانی مفکر تھے

۱۹۳۳ء میں اعلیٰ تعلیم کیلئے انہوں نے انڈین انسٹی ٹیوٹ آف سائنس میں داخلے کیلئے درخواست دی۔ اس زمانے میں اس ادارے کے سربراہ معروف سائنسداں سی وی رمن تھے، جو ابتدا میں خواتین کو سائنسی تحقیق میں شامل کرنے کے حق میں نہیں تھے۔ کملا سوہونی نے سخت محنت اور ثابت قدمی سے اس رکاوٹ کو عبور کیا۔ انہیں ایک سال کیلئے بطور آزمائشی طالبہ داخلہ دیا گیا، لیکن انہوں نے اپنی غیر معمولی محنت اور قابلیت سے ثابت کیا کہ خواتین بھی سائنس کے میدان میں مردوں کے برابر کامیاب ہو سکتی ہیں۔ ان کی شاندار کارکردگی کے بعد نہ صرف انہیں مستقل طور پر تحقیق کی اجازت دی گئی بلکہ بعد میں خواتین کیلئے اس ادارے کے دروازے بھی کھل گئے۔ 
کملا سوہونی نے حیاتی کیمیا کے میدان میں اہم تحقیقات کیں۔ انہوں نے مختلف غذائی اجزاء، خاص طور پر پودوں میں موجود پروٹین اور غذائیت کے عناصر پر تحقیق کی۔ بعد میں وہ مزید تحقیق کیلئے کیمبرج یونیورسٹی گئیں جہاں انہوں نے معروف سائنسداں ڈیریک ریکٹر کی نگرانی میں تحقیق کی۔ کیمبرج یونیورسٹی سے انہوں نے پی ایچ ڈی کی ڈگری حاصل کی اور یوں وہ پہلی ہندوستانی خاتون بن گئیں جنہوں نے اس ادارے سے سائنس میں ڈاکٹریٹ حاصل کی۔ ان کی تحقیقات بہت مختصر تھیں جو صرف ۴۰؍صفحات پر مشتمل تھیں۔ 

یہ بھی پڑھئے: اسٹیفن کووی امریکی ماہر تعلیم، مصنف، تاجر اور ترغیبی مقرر تھے

کملا سوہونی نے اپنی زندگی کا بڑا حصہ تدریس اور تحقیق میں گزارا۔ انہوں نے انسٹی ٹیوٹ آف سائنس، ممبئی میں بایو کیمسٹری کے شعبے کی سربراہی کی اور متعدد طلبہ کو سائنسی تحقیق کی تربیت دی۔ ان کے شاگردوں میں بہت سے سائنسداں بعد میں اہم عہدوں تک پہنچے۔ انہیں راشٹرپتی ایوارڈ سے بھی نوازا گیا تھا۔ ڈاکٹر کملا سوہونی کا انتقال ۲۸؍ جون ۱۹۹۸ء کو نئی دہلی میں ہوا تھا۔

(وکی پیڈیا)