امریکہ کی معروف مصنفہ کیٹ چوپن کی شہرہ آفاق کہانی ’’دی اسٹوری آف این آور ‘‘ The Story of an Hourکا اردو ترجمہ۔

مسز میلرڈ کو دل کی بیماری تھی۔ یہی وجہ تھی کہ اس کے اردگرد موجود لوگ ہمیشہ اس بات کا خیال رکھتے تھے کہ اسے کسی بھی اچانک صدمے سے بچایا جائے۔ اس کی زندگی بظاہر پرسکون تھی مگر جسم کی کمزوری نے اس کے وجود کے گرد ایک ایسی احتیاط کی دیوار کھڑی کر دی تھی جسے ہر کوئی محسوس کرتا تھا۔ اس کے گھر والے، خاص طور پر بہن جوزفین، ہر خبر کو، ہر تبدیلی کو، اس کے سامنے پیش کرنے سے پہلے کئی بار سوچتے تھے۔ 
اسی احتیاط کے ساتھ وہ خبر بھی اس تک پہنچی۔ یہ ایک حادثے کی خبر تھی۔ ریلوے حادثہ۔ اور اس حادثے میں اس کے شوہر، برینٹلی میلرڈ، کا نام ان لوگوں میں شامل تھا جو ہلاک ہو چکے تھے۔ یہ خبر اسے سیدھے انداز میں نہیں دی گئی۔ جوزفین نے اسے آہستہ آہستہ، ٹوٹے ہوئے جملوں میں، نرم آواز میں سنایا، جیسے وہ ہر لفظ کو احتیاط سے چن رہی ہو تاکہ وہ اس کے دل پر کم سے کم اثر ڈالے۔ اس کے ساتھ رچرڈز بھی تھا، جو خاندان کا قریبی دوست تھا۔ اسی نے اخبار میں یہ خبر سب سے پہلے دیکھی تھی۔ وہ اس بات کو یقینی بنانا چاہتا تھا کہ کوئی اور اس خبر کو مسز میلرڈ تک نہ پہنچائے تاکہ اسے اچانک صدمہ نہ لگے۔ جب خبر مکمل ہوئی تو ایک لمحے کیلئے کمرے میں خاموشی چھا گئی۔ وہ خاموشی جس میں الفاظ ختم ہو جاتے ہیں اور صرف احساس باقی رہ جاتا ہے۔ 
مسز میلرڈ نے خبر سنی۔ 
اور پھر اس نے رونا شروع کر دیا۔ یہ رونا کسی دبے ہوئے ردِعمل کا اظہار نہیں تھا بلکہ ایک کھلا، بے اختیار اظہار تھا۔ وہ اپنی بہن کے کندھے پر سر رکھ کر روتی رہی، جیسے اس کے اندر جمع ہونے والا ہر احساس ایک ساتھ باہر آ گیا ہو۔ اس کے آنسو حقیقی تھے، اس کے دکھ میں کوئی بناوٹ نہیں تھی۔ مگر یہ رونا زیادہ دیر قائم نہ رہا۔ کچھ ہی لمحوں بعد، وہ اچانک خاموش ہو گئی۔ 
اس نے خود کو اپنی بہن سے الگ کیا، اور بغیر کچھ کہے اپنے کمرے کی طرف چل دی۔ جوزفین نے اسے روکنے کی کوشش کی لیکن اس نے دروازہ بند کر لیا۔ وہ اکیلی رہنا چاہتی تھی۔ یہ تنہائی ان کیلئے ضروری بھی تھی۔ کمرے کے اندر ایک بڑی کھڑکی تھی، جو کھلی ہوئی تھی، جس کے سامنے ایک آرام دہ کرسی رکھی ہوئی تھی۔ وہ جا کر اس کرسی پر بیٹھ گئی، جیسے اس کے جسم میں اب مزید کھڑے رہنے کی طاقت نہ ہو۔ 
وہ کھڑکی کے باہر دیکھنے لگی۔ باہر کا منظر اس کے باطن کے برعکس تھا۔ درختوں کی شاخوں پر نئی کونپلیں تھیں، ہوا میں ایک تازگی تھی، اور کہیں دور کسی پرندے کی آواز سنائی دے رہی تھی۔ آسمان پر ہلکے بادل تھے، اور ان کے درمیان سے نیلا رنگ جھلک رہا تھا۔ 
یہ سب زندگی کے آثار تھے۔ لیکن اس کے اندر اس وقت صرف ایک ہی احساس تھا، خلا۔ وہ سیدھی نہیں بیٹھ پا رہی تھی۔ اس کا جسم کرسی میں دھنس گیا تھا، جیسے وہ اس خبر کے بوجھ تلے دب گئی ہو۔ اس کی آنکھیں کھلی تھیں، مگر وہ کسی خاص چیز کو نہیں دیکھ رہی تھی۔ وہ صرف محسوس کر رہی تھی۔ کچھ ایسا جو ابھی واضح نہیں تھا۔ 
ایک لمحے کیلئے اس نے خود سے پوچھا، ’’کیا یہ سچ ہے؟ کیا وہ واقعی چلا گیا ہے؟‘‘
یہ سوال اس کے ذہن میں آیا لیکن ان کا جواب مسز میلرڈ کے پاس پہلے ہی تھا۔ ہاں۔ 
اور اسی جواب کے ساتھ اس کے اندر ایک اور احساس نے جنم لینا شروع کیا۔ یہ احساس شروع میں بہت ہلکا تھا، جیسے کوئی دور سے آ رہا ہو، جیسے کوئی چیز آہستہ آہستہ اس کے قریب آ رہی ہو۔ وہ اسے پہچان نہیں پا رہی تھی۔ وہ اس سے تھوڑا سا خوفزدہ بھی تھی کیونکہ یہ اس دکھ جیسا نہیں تھا جو حقیقت میں ہونا چاہئے تھا۔ 
یہ کچھ اور تھا۔ وہ اپنی کرسی پر سیدھی ہو کر بیٹھ گئی۔ اس کی سانسیں تیز ہو گئیں۔ اور اس کی آنکھوں میں ایک عجیب سی چمک آنے لگی۔ 
یہ وہ لمحہ تھا جہاں اس کے اندر کچھ بدلنے لگا تھا۔ مگر وہ ابھی اس تبدیلی کو سمجھ نہیں پائی تھی۔ 
وہ کرسی پر بیٹھی کھڑکی کے باہر دیکھتی رہی مگر اس کی نظر اب درختوں یا آسمان پر نہیں تھی بلکہ اس کے اندر کی طرف مڑ چکی تھی جہاں ایک نیا احساس آہستہ آہستہ اپنی شکل بنا رہا تھا اور وہ اسے روکنا بھی چاہتی تھی مگر وہ رک نہیں رہا تھا کیونکہ وہ کسی سوچ کا نتیجہ نہیں بلکہ ایک تجربے کی طرح اس پر طاری ہو رہا تھا۔ 
اس کی سانسیں تیز ہو رہی تھیں اور سینے میں ایک ہلکی سی لرزش پیدا ہو گئی تھی جیسے اس کا دل کسی نئی حقیقت کو قبول کرنے کیلئے خود کو تیار کر رہا ہو۔ 
اس نے اپنی آنکھیں کچھ لمحوں کیلئے بند کیں مگر جیسے ہی انہیں دوبارہ کھولا اس کے ہونٹوں پر ایک بہت دھیمی سی سرگوشی ابھری جو پہلے تو خود اس کیلئے بھی واضح نہیں تھی مگر پھر وہ ایک لفظ کی صورت میں سامنے آئی:
’’آزاد‘‘، اور یہ لفظ ایک بار نہیں بلکہ بار بار اس کے اندر گونجنے لگا، ’’آزاد...آزاد... آزاد‘‘، اور ہر بار اس کے ساتھ اس کے جسم میں ایک نئی توانائی پیدا ہونے لگی جیسے وہ کسی بوجھ سے نکل رہی ہو جو وہ اب تک محسوس بھی نہیں کر پائی تھی۔ 
یہ احساس اسے خوفزدہ بھی کر رہا تھا کیونکہ وہ جانتی تھی کہ اسے غم محسوس کرنا چاہئے تھا اور وہ واقعی غمزدہ بھی تھی لیکن اس غم کے ساتھ ساتھ ایک اور سچ بھی اس کے اندر جگہ بنا رہا تھا جس سے انکار نہیں کیا جا سکتا تھا۔ 
اس نے اپنی زندگی کے ان لمحوں کو یاد کیا جب اس نے خود کو محدود محسوس کیا تھا، جب اس کے فیصلے اس کے اپنے نہیں تھے بلکہ کسی اور کے ساتھ جڑے ہوئے تھے، جب اس کی خواہشات کو خاموشی سے دبانا پڑتا تھا کیونکہ زندگی ایک مشترکہ ذمہ داری تھی اور اس میں اس کی اپنی خواہش کیلئے زیادہ جگہ نہیں تھی، یہ سب یادیں ایک ایک کر کے اس کے ذہن میں آئیں مگر اب وہ انہیں ایک نئے زاویے سے دیکھ رہی تھی کیونکہ اب وہ سب ختم ہو چکا تھا، اب اس کے سامنے ایک ایسی زندگی کھل رہی تھی جس میں وہ اپنے اصولوں پر زندگی گزارے گی، جہاں اس کے دن اس کے اپنے ہوں گے اور اس کی سانسیں کسی اور کے ساتھ بندھی نہیں ہوں گی۔ 
وہ کرسی میں تھوڑی سیدھی ہو کر بیٹھی اور اس کی آنکھوں میں ایک نئی روشنی پیدا ہو گئی جو پہلے کبھی نہیں تھی، اس کے ہونٹوں پر ایک بہت ہلکی سی مسکراہٹ آئی جو کسی خوشی کی نہیں بلکہ ایک ادراک کی تھی، اس نے اپنے ہاتھوں کو اپنے سینے پر رکھا اور اپنی دھڑکن کو محسوس کیا اور اسے ایسا لگا جیسے وہ پہلی بار زندہ ہے، جیسے اس کا جسم اور اس کا ذہن ایک نئی ہم آہنگی میں آ گئے ہوں۔ 
اس نے آہستہ سے کہا کہ اب اس کے سامنے لمبے سال ہیں جو صرف اس کے ہوں گے اور اس خیال نے اسے ایک عجیب سی طاقت دی، وہ اب اس خبر کو ایک نقصان کے طور پر نہیں بلکہ ایک دروازے کے طور پر دیکھ رہی تھی جو اس کیلئے کھل چکا تھا۔ 
اسی لمحے دروازے کے باہر جوزفین کی آواز آئی جو مسلسل اسے پکار رہی تھی اور اس سے کہہ رہی تھی کہ وہ دروازہ کھولے کیونکہ وہ پریشان ہو رہی ہے، مگر مسز میلرڈ اب پہلے جیسی نہیں رہی تھی، اس نے آہستہ سے جواب دیا کہ وہ ٹھیک ہے اور وہ دروازہ کھول دے گی۔ 
وہ اٹھی اور اس کے قدم اب پہلے سے زیادہ مضبوط تھے جیسے اس کے اندر کوئی نئی طاقت آ گئی ہو، اس نے دروازہ کھولا اور جوزفین نے اسے دیکھا تو اسے لگا کہ وہ بدل گئی ہے مگر وہ یہ نہیں سمجھ سکی کہ کیسے۔ 
دونوں آہستہ آہستہ سیڑھیوں کی طرف بڑھنے لگیں اور نیچے جانے لگیں جہاں رچرڈز انتظار کر رہا تھا۔ 
اسی لمحے دروازہ کھلا۔ 
اور برینٹلی میلرڈ اندر داخل ہوا۔ وہ زندہ تھا۔ 
اس کے ہاتھ میں ایک بیگ تھا اور اس کے چہرے پر وہی عام سا تاثر تھا جیسے وہ کسی معمول کے سفر سے واپس آیا ہو، وہ اس حادثے سے مکمل طور پر بے خبر تھا کیونکہ وہ اس میں شامل ہی نہیں تھا، وہ صرف تھکا ہوا تھا اور گھر واپس آیا تھا، مگر اس کی موجودگی نے اس لمحے کو ایک ایسا جھٹکا دیا جس کا کوئی مقابلہ نہیں تھا۔ 
مسز میلرڈ نے اسے دیکھا۔ 
اور اسی لمحے اس کے اندر سب کچھ ٹوٹ گیا۔ وہ جو احساس ابھی کچھ لمحے پہلے اس کے اندر پیدا ہوا تھا، آزادی کا احساس، نئی زندگی کا احساس، وہ ایک ہی لمحے میں ختم ہو گیا کیونکہ حقیقت اس کے سامنے کھڑی تھی، اور یہ حقیقت اس کے تصور سے زیادہ طاقتور تھی، اس کے دل نے اس صدمے کو برداشت نہیں کیا اور وہ وہیں گر گئی۔ 
ڈاکٹر آئے۔ 
انہوں نے معائنہ کیا۔ 
اور پھر انہوں نے کہا کہ اس کی موت دل کے دورے سے ہوئی ہے، ایک ایسی خوشی کے باعث جو برداشت سے باہر تھی۔ 
مگر شاید حقیقت کچھ اور تھی۔ شاید وہ خوشی نہیں تھی۔ شاید وہ اس آزادی کے کھو جانے کا صدمہ تھا جو اسے ایک لمحے کیلئے ملی تھی۔ اور جو اب ہمیشہ کیلئے ختم ہو چکی تھی۔