ہم روزمرہ زندگی میں دیکھتے ہیں کہ جب نمک کو پانی میں ڈالا جائے تو وہ گھل کر غائب ہو جاتا ہے مگر جب ریت کو پانی میں ملایا جائے تو وہ نیچے بیٹھ جاتی ہے اور پانی الگ دکھائی دیتا ہے۔ بظاہر دونوں ہی پاؤڈر کی شکل میں ہیں لیکن کیا کبھی سوچا کہ نمک پانی میں حل ہوجاتا ہے لیکن ریت نہیں ہوتی، کیوں ؟

جب ہم نمک اور ریت کو پانی میں ڈالتے ہیں تو دونوں کا برتاؤ مختلف ہوتا ہے۔ نمک پانی میں گھل کر محلول بنا لیتا ہے، جبکہ ریت نیچے بیٹھ جاتی ہے اور پانی سے الگ رہتی ہے۔ اس فرق کی وجہ ان دونوں مادّوں کی کیمیائی ساخت اور پانی کے ساتھ ان کے تعامل کی نوعیت ہے۔

نمک ایک آئونی مرکب (Ionic compound) ہے جو سوڈیم (Na⁺) اور کلورائیڈ (Cl⁻) آئنوں پر مشتمل ہوتا ہے۔ ریت بنیادی طور پر سلکان ڈائی آکسائیڈ پر مشتمل ہوتی ہے جو ایک غیر محلول مادّہ ہے۔

پانی ایک قطبی (polar) سالمہ ہے یعنی اس کے ایک حصے پر جزوی مثبت چارج (ہائڈروجن) اور دوسرے حصے پر جزوی منفی چارج (آکسیجن) ہوتا ہے۔یہی خصوصیت پانی کو ایک عالمی محلل (universal solvent) بناتی ہے کیونکہ وہ دوسرے قطبی یا آئونی مادّوں کے ذرات کو اپنے اندر کھینچ کر منتشر کر سکتا ہے۔

جب نمک کو پانی میں ڈالا جاتا ہے توپانی کے قطبی سالمے نمک کے آئنوں ( این اے اور سی ایل ⁻) کو گھیر لیتے ہیں۔آکسیجن والے حصے کلورائیڈ آئن (Cl⁻) کو اور ہائڈروجن والے حصے سوڈیم آئن (Na⁺) کو اپنی طرف کھینچتے ہیں۔یوں نمک کے آئن الگ ہو کر پانی میں منتشر ہو جاتے ہیں اور ایک یکساں محلول (homogeneous solution) بن جاتا ہے۔

ریت کے سالمے غیر قطبی (non-polar) نوعیت کے ہوتے ہیں اور ان کے درمیان بہت مضبوط کوویلنٹ بونڈز پائے جاتے ہیں۔پانی چونکہ قطبی محلل ہے اس لئے وہ غیر قطبی مادّوں کو نہیں توڑ سکتا۔پانی کے سالمے ریت کے ذرات کو تو الگ نہیں کر پاتے بس ان کے ارد گرد بہہ جاتے ہیں۔ اسی وجہ سے ریت نیچے بیٹھ جاتی ہے اور حل نہیں ہوتی۔یعنی نمک اور ریت کی کیمیائی ساخت اور سالماتی خصوصیات بالکل مختلف ہیں۔