کچھ تتلیوں کے دھبے انہیں اپنے ماحول میں چھپنے میں مدد دیتے ہیں۔ ان دھبوں کے رنگ پتےیا پھول سے ملتے جلتے ہوتے ہیں جس سے شکاریوں کیلئے انہیں پہچاننا مشکل ہو جاتا ہے۔

قدرت نے ہر جاندار کو اپنی بقا اور حفاظت کیلئے مخصوص اوصاف عطا کئے ہیں۔ انہی میں تتلی ایک نہایت حسین اور نازک مخلوق ہے جس کے پروں پر بنے رنگین دھبے ہمیشہ سے انسان کی توجہ کا مرکز رہے ہیں۔ کیا آپ نے کبھی غور کیا کہ تتلی کے پروں پر رنگین دھبے کیوں ہوتے ہیں ؟ 
فطرت کی خوبصورتی اور کشش 
تتلی کے پروں پر موجود رنگین دھبے فطرت کی ایک حیرت انگیز صناعی ہیں۔ یہ دھبے نہ صرف تتلی کو خوبصورت بناتے ہیں بلکہ دوسروں کی توجہ بھی اپنی طرف کھینچتے ہیں۔ ان کے رنگ اور ڈیزائن دیکھنے والوں کے دل کو لبھاتے ہیں، اسی لئے تتلی کو اکثر خوبصورتی کی علامت سمجھا جاتا ہے۔ 
دشمن سے حفاظت 
یہ دھبے تتلی کیلئے ایک قسم کا حفاظتی ہتھیار بھی ہیں۔ بہت سی تتلیوں کے پروں پر بنے ہوئے بڑے اور گہرے دھبے آنکھوں کی شکل سے ملتے ہیں۔ شکاری جانور، مثلاً پرندے، انہیں دیکھ کر ڈر جاتے ہیں اور یہ سمجھتے ہیں کہ تتلی کوئی بڑا اور خطرناک جاندار ہے، اس طرح وہ قریب نہیں آتے، یوں تتلی اپنی جان بچانے میں کامیاب ہو جاتی ہے۔ 
ماحول کے ساتھ مطابقت 
کچھ تتلیوں کے دھبے انہیں اپنے ماحول میں چھپنے میں مدد دیتے ہیں۔ ان دھبوں کے رنگ پتےیا پھول سے ملتے جلتے ہوتے ہیں جس سے شکاریوں کیلئے انہیں پہچاننا مشکل ہو جاتا ہے۔ اسے’’کیموفلاج‘‘ کہتے ہیں۔ 
حیاتیاتی وجہ
سائنسی طور پر یہ رنگ اور دھبے تتلی کے پروں پر موجود باریک چھوٹے ذرات (اسکیلز) کی وجہ سے بنتے ہیں۔ یہ اسکیلز روشنی کو مختلف زاویوں سے توڑتے اور منعکس کرتے ہیں جس سے حیرت انگیز رنگ ابھرتے ہیں۔ 
حرارت کو قابو میں رکھنے میں مدد 
تتلی چونکہ ایک نازک اور حساس جسم والا جاندار ہےاس لئے اسے درجۂ حرارت کے مطابق اپنے جسم کو گرم یا ٹھنڈا رکھنے کی ضرورت پیش آتی ہے۔ پروں پر موجود دھبے اور رنگ سورج کی روشنی کو جذب یا منعکس کرنے میں مدد دیتے ہیں۔ گہرے رنگ سورج کی حرارت کو جذب کر کے تتلی کو گرم رکھتے ہیں جبکہ ہلکے رنگ زیادہ روشنی منعکس کر کے زیادہ گرمی سے بچاتے ہیں۔ اس طرح یہ دھبے تتلی کے جسم کے درجۂ حرارت کو قابو میں رکھنے کا کام بھی کرتے ہیں۔