انسانی دماغ ایک حیرت انگیز خزانہ ہے جو روزانہ بے شمار مناظر، باتیں اور تجربات اپنے اندر سمو لیتا ہے۔ ہم جو کچھ دیکھتے، سنتے، محسوس کرتے یا سیکھتے ہیں، وہ سب کسی نہ کسی درجے میں ہماری یادداشت کا حصہ بن جاتا ہے۔ کبھی کوئی واقعہ برسوں بعد بھی یوں یاد آتا ہے جیسے کل ہی پیش آیا ہو، اور کبھی کوئی اہم بات چند لمحوں میں ذہن سے محو ہو جاتی ہے۔ کیا آپ نے کبھی غور کیا کہ انسان کو کچھ باتیں یاد رہ جاتی ہیں تو کچھ وہ بھول جاتا ہے، کیوں؟

یادداشت (Memory) انسانی دماغ کی وہ صلاحیت ہے جس کے ذریعے ہم معلومات کو محفوظ، برقرار اور دوبارہ یاد کر سکتے ہیں۔ یہ عمل ایک ذہنی اور کیمیائی نظام ہے جو مختلف عوامل سے متاثر ہوتا ہے۔ کچھ باتیں ذہن میں نقش ہو جاتی ہیں جبکہ کچھ وقت گزرنے کے ساتھ مدھم یا بالکل مٹ جاتی ہیں۔

جب ہم کوئی نئی بات سنتے یا دیکھتے ہیں تو دماغ پہلے اس کو حسی یادداشت (Sensory Memory) میں محفوظ کرتا ہے۔ اگر ہم اس پر توجہ دیں تو وہ مختصر مدتی یادداشت (Short Term Memory) میں جاتی ہے اور بار بار دہرائی جائے تو جذباتی اثر کے ذریعے وہ طویل مدتی یادداشت (Long Term Memory) کا حصہ بن جاتی ہے۔یعنی یاد رکھنے کیلئے توجہ، تکرار اور جذباتی وابستگی تین بنیادی عناصر ہیں۔

جذباتی تعلق: جو واقعات ہمیں ہنساتے، رُلاتے یا حیران کرتے ہیں وہ گہرے نقوش چھوڑتے ہیں۔

ذاتی اہمیت:جو باتیں ہمارے مفاد یا زندگی سے براہِ راست تعلق رکھتی ہیں وہ زیادہ عرصہ یاد رہتی ہیں۔

تکرار اور مشق: بار بار پڑھی یا دہرائی جانے والی معلومات (جیسے دعائیں، اشعار، یا نصابی سبق) لمبے عرصے تک یاد رہتی ہیں۔

جذباتی یا بصری یادیں: اگر کوئی چیز کسی تصویر، آواز، یا خوشبو کے ساتھ منسلک ہو، تو دماغ اسے بہتر طریقے سے محفوظ رکھتا ہے۔

توجہ کی کمی:اگر کسی چیز پر دھیان نہ دیا جائے تو دماغ اسے مختصر مدتی یادداشت پر روک دیتا ہے۔

معلومات کا بوجھ: زیادہ معلومات ایک ساتھ حاصل کرنے سے پرانی باتیں نئی یادوں کے نیچے دب جاتی ہیں۔

وقت کا گزر جانا:اگر کسی بات کو دہرانا یا یاد نہیں کیا جائے تو وہ آہستہ آہستہ مٹ جاتی ہے۔

جذباتی دباؤ : صدمے کی حالت میں دماغ نئی یادیں محفوظ کرنے میں کمزور ہو جاتا ہے۔