کیا آپ نے کبھی غور کیا کہ جب ہم بہت ہنستے ہیں تو آنکھوں میں اکثر آنسو آ جاتے ہیں۔ ایسا کیوں ہوتا ہے؟

انسانی جسم میں کئی ایسے فطری ردعمل پائے جاتے ہیں جو بظاہر عجیب لگتے ہیں مگر دراصل جسم کے اندرونی نظام کی بھرپور ہم آہنگی اور توازن کو ظاہر کرتے ہیں۔ انہی دلچسپ مظاہر میں سے ایک ہے آنکھوں سے آنسو آنا۔ کیا آپ نے کبھی غور کیا کہ جب ہم بہت ہنستے ہیں تو آنکھوں میں اکثر آنسو آ جاتے ہیں۔ ایسا کیوں ہوتا ہے؟
ہنسنے اور آنکھوں کے پٹھوں کا تعلق 
جب ہم زور سے ہنستے ہیں تو ہمارے چہرے اور آنکھوں کے گرد موجود پٹھے (Particularly Orbicularis Oculi) سکڑ جاتے ہیں۔ ان پٹھوں کے دباؤ کی وجہ سے آنکھوں کے قریب موجود غدود (Lacrimal Glands) متحرک ہو جاتےہیں۔ جب یہ اس عمل سے گزرتے ہیں تو آنکھوں سے آنسو نکلنے لگتے ہیں۔ 
سانس اور دباؤ کا بڑھ جانا
ہنسنے کے دوران ہم تیزی سے اور بار بار سانس لیتے ہیں۔ اس سے سینے اور چہرے کے دوران خون اور دباؤ میں اضافہ ہوتا ہے۔ یہ دباؤ آنکھوں کی طرف منتقل ہو کر آنسو بنانے والے غدود کو تحریک دیتا ہے جس کے نتیجے میں آنکھوں میں پانی بھر آتا ہے اور وہ آنسو کی طرح بہنے لگتے ہیں۔ 
جسم کا قدرتی حفاظتی ردعمل 
بہت زیادہ ہنسنے سے آنکھوں میں خشکی یا جلن پیدا ہو سکتی ہے۔ جسم اس کیفیت کے تدارک کیلئے اضافی آنسو پیدا کرتا ہے تاکہ آنکھوں کو نم رکھ سکے اور انہیں نقصان سے بچائے۔ 
اعصابی نظام کی سرگر می 
ہنسی کے دوران دماغ کا ’’پیراسیمپتھیٹک نروس سسٹم‘‘ (Parasympathetic Nervous System)متحرک ہو جاتا ہے۔ یہی نظام آنسوؤں کے اخراج کو کنٹرول کرتا ہے۔ زیادہ ہنسنے سے دماغ آنکھوں کے غدود کو سگنل بھیجتا ہے اورآنسو بہنے لگتے ہیں۔ 
خوشی اور جذبات کا ملاپ 
انسان کیلئے ہنسی صرف جسمانی عمل نہیں بلکہ جذباتی ردعمل بھی ہے۔ کبھی کبھی ہنسی اتنی شدید ہوتی ہے کہ دماغ اسے جذباتی کیفیت سے جوڑ دیتا ہے جیسے رونا۔ اس ملاپ کی وجہ سےکبھی کبھی آنکھوں میں آنسو آ سکتے ہیں۔ 
آنکھوں کی نالیوں پر دباؤ
جب ہم زور سے ہنستے ہیں تو چہرے کے مختلف حصوں پر دباؤ بڑھ جاتا ہے، خاص طور پر آنکھوں کے آس پاس۔ اس دباؤ کی وجہ سے آنکھوں میں موجود چھوٹی نالیاں (Tear Ducts) جزوی طور پر دب جاتی ہیں اور آنسو باہر کی طرف نکلنے لگتے ہیں۔ 
زیادہ ہنسنے کے بعد آنکھوں میں آنسو آنا دراصل جسم کا ایک فطری اور صحتمند عمل ہے جو خوشی کے اظہار کو اور بھی منفرد بنا دیتا ہے۔