ایئر فون کی تاریں عموماً لمبی، باریک اور لچک دار ہوتی ہیں۔ یہی خصوصیات انہیں آسانی سے مڑنے اور ایک دوسرے کے گرد لپٹنے کے قابل بناتی ہیں۔

جیب میں رکھے ہوئے ایئر فون کی تاریں جب باہر نکالی جاتی ہیں تو اکثر آپس میں بری طرح الجھی ہوئی ملتی ہیں، حالانکہ انہیں سلیقے سے سمیٹ کر رکھا گیا ہوتا ہے۔ کیا آپ نے کبھی غور کیا کہ ایسا کیوں ہوتا ہے؟
حرکت اور رگڑ (Friction)کا کمال
جب ہم ایئر فون کی تاروں کو جیب میں رکھتے ہیں تو چلنے پھرنے، بیٹھنے، اٹھنے اور جسم کی حرکت کے باعث جیب کے اندر مسلسل ہلچل پیدا ہوتی رہتی ہے۔ اس دوران تاریں کبھی ایک دوسرے سے ٹکراتی ہیں، کبھی مڑتی ہیں اور کبھی ایک دوسرے کے اوپر سے گزر جاتی ہیں۔ ان حرکات کی وجہ سے تاروں میں چھوٹے چھوٹے بل پڑنے لگتے ہیں۔ جیب کے کپڑے اور تاروں کے درمیان پیدا ہونے والی رگڑ (Friction) انہیں اپنی جگہ پر قائم رکھنے میں مدد دیتی ہے جس سےتاروں کی الجھن مزید بڑھ جاتی ہے۔ 
تاروں کی لمبائی اور لچک
ایئر فون کی تاریں عموماً لمبی، باریک اور لچک دار ہوتی ہیں۔ یہی خصوصیات انہیں آسانی سے مڑنے اور ایک دوسرے کے گرد لپٹنے کے قابل بناتی ہیں۔ جب ایک لمبی تار کو کسی چھوٹی سی جگہ، مثلاً جیب میں رکھا جاتا ہے تو اس کے پاس حرکت کرنے کی محدود گنجائش ہوتی ہے۔ اس محدود جگہ میں جسم کی معمولی حرکت بھی تار کے مختلف حصوں کو ایک دوسرے کے گرد گھما سکتی ہے۔ نتیجتاً تاریں الجھنے لگتی ہیں۔

یہ بھی پڑھئے: کمرے میں پہنچ کر یاد نہیں رہتا کہ کس کام سےآئے تھے، کیوں؟

ریاضی اورفزکس کا دلچسپ تعلق
۲۰۰۷ء میں کیلیفورنیا یونیورسٹی کے سائنسدانوں نے اس موضوع پر ایک دلچسپ تحقیق کی جس میں بتایا گیا کہ ڈوریوں یا تاروں کا الجھنا محض اتفاق نہیں بلکہ اس کے پیچھے ریاضی اور فزکس کے اصول کام کرتے ہیں۔ اس تحقیق میں مختلف لمبائیوں کی ڈوریوں کو ایک ڈبے میں گھما کر دیکھا گیا کہ وہ کس طرح گرہیں بناتی ہیں۔ معلوم ہوا کہ جب ڈوری کو حرکت کرنے کے لیے جگہ ملتی ہے تو اس کے مختلف حصے ایک دوسرے کے گرد لپٹ کر گرہیں بنا سکتے ہیں۔ 
تاروں کو الجھنے سے کیسے بچائیں؟
ایئر فون کی تاروں کو الجھنے سے بچانے کیلئے انہیں جیب میں کھلا رکھنے کے بجائے احتیاط سے لپیٹ کر رکھنا چاہئے۔ اس مقصد کیلئے چھوٹے کیبل ہولڈر، تار باندھنے والے کلپ یا مخصوص کیس کا استعمال کیا جا سکتا ہے۔ تاروں کو زیادہ سختی سے لپیٹنے سے بھی گریز کرنا چاہئے کیونکہ اس سے ان کے اندرونی حصوں کو نقصان پہنچ سکتا ہے۔ اس طرح معمولی سی احتیاط سے تاروں کو الجھنے اور خراب ہونے سے بچایا جا سکتا ہے۔ 
سائنس کی دنیا میں تاروں اور ڈوریوں کے الجھنے کے اس عمل کو سمجھنے کیلئے ریاضی کی ایک شاخ ٹاپولوجی (Topology) بھی مددگار ثابت ہوتی ہے۔