بالی ووڈ میں راکھی کو ایک ایسی اداکارہ کے طور پر شمار کیا جاتا ہے جنہوں نے ۷۰ء اور۸۰ء کی دہائی میں اپنی رومانوی اور جذباتی اداکاری سے ناظرین کومحظوظ کردیا۔ راکھی کا حقیقی  نام راکھی مجمدار تھا، ان کی پیدائش ۱۵؍ اگست ۱۹۴۷ء کو مغربی بنگال کے نادیہ ضلع کے راناگھاٹ میں ہوئی تھی۔ انہوں نے اپنے فلمی کریئرکا آغاز۱۹۶۷ء میں بنگلہ فلم’ ودھوور ن‘ سے کیا تھا۔ اسی دوران ان کی ملاقات ہدایت کار سنیل دت سے ہوئی ۔

 بالی ووڈ میں راکھی کو ایک ایسی اداکارہ کے طور پر شمار کیا جاتا ہے جنہوں نے ۷۰ء اور۸۰ء کی دہائی میں اپنی رومانوی اور جذباتی اداکاری سے ناظرین کومحظوظ کردیا۔
 راکھی کا حقیقی  نام راکھی مجمدار تھا، ان کی پیدائش ۱۵؍ اگست ۱۹۴۷ء کو مغربی بنگال کے نادیہ ضلع کے راناگھاٹ میں ہوئی تھی۔ انہوں نے اپنے فلمی کریئرکا آغاز۱۹۶۷ء میں بنگلہ فلم’ ودھوور ن‘ سے کیا تھا۔ اسی دوران ان کی ملاقات ہدایت کار سنیل دت سے ہوئی جنہوں نے ان کی صلاحیت کو تسلیم کرتے ہوئے اپنی نئی فلم ریشما اور شیرا میں کام کرنے کی تجویز پیش کی  جسے انہوں نے خوشی خوشی قبول کر لیا حالانکہ فلم کی تخلیق میں تلخی ہونے کی وجہ سے ان کی فلم  ’جیون مرتیو‘ پہلے ریلیز  ہو گئی۔
 راج شری پروڈکشن کے بینر تلے بنی فلم ’جیون مرتیو‘  میں ان کے مدمقابل ہیرو دھرمیندر تھے۔  خاندانی پس منظر پر بنی یہ فلم باکس آفس  پر سپر ہٹ ثابت ہوئی اور  ان پر فلمایا یہ نغمہ ’جھلمل ستاروں  کا آنگن ہوگا ‘  سامعین کے درمیان آج بھی شدت کے ساتھ سنا جاتا ہے۔ فلم اور نغموں  کی کامیابی کے بعد راکھی بطور اداکارہ پہچان بنانے میں کامیاب ہو گئیں۔
 ۱۹۷۱ء میں راکھی کے فلمی کریئر کی ایک اور سپر ہٹ فلم ’ شرمیلی‘ آئی جس میں انہوں نے   جڑواں بہنوں کا کردار نبھایا جس میں ایک کردار گرے شیڈس لئے ہوئے تھاحالانکہ گرے شیڈس والا کردار نبھانا کسی بھی نئی اداکارہ کیلئے خطرہ  ہو سکتا تھا لیکن راکھی نے اسے ایک چیلنج کے طور پر لیا اور اپنی اداکاری سے مبصرین کے ساتھ ناظرین کا بھی دل جیت کر فلم کو سپر ہٹ بنا دیا۔
 ۱۹۷۶ء میں فلم ’ تپسیا‘  راکھی کے فلمی کریئر کی اہم فلموں میں سے ایک ہے۔ راج شری پروڈکشن کے بینر تلے بنی اس گھریلو فلم میں راکھی نے ایک ایسی لڑکی کا کردار ادا کیا جو اپنے خاندان کیلئے زندگی بھر شادی نہ کرنے کا فیصلہ کر لیتی ہے اور اپنے خاندان کی ذمہ داریوں کونبھا تی رہتی ہے۔
 اداکاری میں یکسانیت سے بچنے اور خود کوکریکٹر ایکٹر کے طور پر بھی پیش کرنے کے لئے راکھی نے  مختلف کردار نبھائے۔ ۱۹۸۰ء میں  پرکاش مہرہ کی سپرہٹ فلم لاوارث میں اور رمیش سپی کی فلم شکتی میں وہ فلم اداکار امیتابھ بچن کی ماں کا کردار ادا   کرنے سے بھی نہیں ہچکچائیں۔ حالانکہ اس سے قبل وہ امیتابھ بچن   کے ساتھ بطور  ہیروئن اداکاری کرچکی ہیں۔   فلم لاوارث میں ان پر فلمایا یہ نغمہ ’ میرے انگنے میں تمہارا کیا کام ہے‘  آج بھی سامعین کے درمیان بے حد مقبول ہے۔
 ۹۰ء کی دہائی میں نے راکھی نے کئی فلموں میں  ’ماں ‘ کے کردار کو سلور ا سکرین پر پیش کیا  ہے۔ان فلموں میں رام لكھن،جیون ایک سنگھرش، پرتیکار، سوگندھ، کھلنائیک،  اناڑی، بازیگر، کرن ارجن اور سولجر جیسی فلمیں خاص طور پر قابل ذکر ہیں۔ فلم رام لكھن میں  بہترین اداکاری کے لئے انہیں بہترین معاون اداکارہ کے ایوارڈ سے نوازا گیا۔
  راجستھان کے پس منظر پر بنی۱۹۹۳ء میں فلم ’ رودالي‘ میں راکھی نے ایک ایسی لڑکی کا کردار نبھایا  جو کسی کی موت کے بعد رو کر اپنی گزر بسر کرتی ہے۔ اگرچہ یہ فلم باکس آفس  پر ناکام ثابت ہوئی لیکن اپنی  بااثر اداکاری سے راکھی نے سامعین کے ساتھ ناقدین کو بھی محظوظ کردیا۔
 فلم انڈسٹری کے  پردۂ سیمیں  پر راکھی کی جوڑی سپر اسٹار امیتابھ بچن کے ساتھ خوب پسند  کی گئی۔ یہ فلمی جوڑی  سب سے پہلے ۱۹۷۶ء میں آئی فلم ’ کبھی کبھی ‘ میں نظر آئی۔ اس کے بعد اس جوڑی نے قسمیں وعدے، مقدر کا سکندر، ترشول، جرمانہ، کالا پتھر، برسات کی ایک رات، بے مثال اور رشتہ دی بانڈ آف لو میں ایک ساتھ کام کر کےناظرین کو مسحور کردیا۔ راکھی اپنے فلمی کریئر میں ۳؍ مرتبہ فلم فیئر ایوارڈ سے نوازی جا چکی ہیں۔  انہیں سب سے پہلے فلم داغ کے لئے بہترین معاون اداکارہ کا ایوارڈ ملا۔اس کے بعد۱۹۷۶ء میں فلم تپسیا کے لئے بہترین اداکارہ اور۱۹۸۹ء میں فلم رام لكھن کیلئے بہترین معاون اداکارہ کا فلم فیئر ایوارڈ دیا گیا۔
 ۲۰۰۳ءمیں آئی فلم شبھ مہورت کیلئے راکھی بہترین معاون اداکارہ کے قومی ایوارڈ سے بھی نوازی گئیں۔ فلمی صنعت میں راکھی کی  اہم خدمات کو دیکھتے ہوئے حکومت ہند نے انہیں   ۲۰۰۳ءمیں پدم شری ایوارڈ سے نوازا۔ راکھی نے اپنے۳؍ دہائی طویل فلمی کریئر میں تقریباً ۹۰؍فلموں  میں کام کیا ہے۔ وہ ان دنوں بالی ووڈ میں سرگرم نہیں ہیں۔