تمل سنیما کے سپر اسٹار رجنی کانت نے اپنی نئی فلم’ ’جیلر ۲‘‘ کی نمائش کے دوران مداحوں کو ایک یادگار تحفہ دیا۔ اداکار نے تقریباً چار دہائیوں بعد پہلی مرتبہ سینما گھر میں عام ناظرین کے ساتھ بیٹھ کر اپنی فلم دیکھی۔

 تمل سنیما کے سپر اسٹار رجنی کانت نے اپنی نئی فلم’ ’جیلر ۲‘‘ کی نمائش کے دوران مداحوں کو ایک یادگار تحفہ دیا۔ اداکار نے تقریباً چار دہائیوں بعد پہلی مرتبہ سینما گھر میں عام ناظرین کے ساتھ بیٹھ کر اپنی فلم دیکھی۔ اس موقع پر مداحوں کی خوشی دیدنی تھی، جبکہ فلم بھی دنیا بھر کے فلمی کاروبار میں شاندار کارکردگی کا مظاہرہ کرتے ہوئے  ۶۶۶؍کروڑ روپے سے زیادہ کی مجموعی کمائی کر چکی ہے۔ 
  میڈیا رپورٹس کے مطابق۷۵؍ سالہ رجنی کانت جمعہ کی شام چنئی کے ویلاچری علاقے میں واقع فینکس مارکیٹ سٹی کے پی وی آر سینما پہنچے، جہاں ان کی فلم ’’جیلر ۲‘‘ دکھائی جا رہی تھی۔ ان کے ساتھ موسیقار انیرودھ روی چندر اور ان کے پوتے لنگا بھی موجود تھے۔ فلم کے پروڈکشن ادارے سن پکچرز کی جانب سے اس خاص موقع کی ویڈیو سوشل میڈیا پر شیئر کی گئی، جس میں اداکار کو سنیما گھر پہنچتے اور ناظرین کے ساتھ فلم دیکھتے ہوئے دیکھا جا سکتا ہے۔ 

یہ بھی پڑھئے:نیوزی لینڈ نے ہنری کو باقی ٹی ۲۰؍ میچوں سے باہر کیا

فلم سازوں نے اس موقع کو خاص قرار دیتے ہوئے کہا کہ سپر اسٹار ۴۰؍ سال بعد پہلی مرتبہ مداحوں کے ساتھ سینما کی بڑی اسکرین پر اپنی فلم دیکھنے پہنچے ہیں۔ تھیٹر میں موجود ناظرین نے رجنی کانت کا استقبال کیا اور فلم کے دوران ان کے لیے اپنی خوشی کا اظہار کیا۔ ان کی یہ غیر معمولی آمد فلم کی کامیابی کے ساتھ ساتھ سوشل میڈیا پر بھی موضوعِ بحث بن گئی۔ 
رجنی کانت کی فلم ’’جیلر ۲‘‘ نے ریلیز کے پہلے۱۰؍ دنوں میں عالمی سطح پر۳۰ء۶۶۶؍ کروڑ روپے کا مجموعی کاروبار کیا۔ فلمی کاروبار کے اعداد و شمار فراہم کرنے والی ویب سائٹ سَیکنِلک کے مطابق، ۲۴؍ اکتوبر کو فلم نے ہندوستان میں تقریباً۱۵ء۲۴؍ کروڑ روپے کی خالص کمائی کی، جو گزشتہ دن کے مقابلے میں نمایاں اضافہ تھا۔ رپورٹ کے مطابق، فلم کی ہندوستان میں مجموعی کمائی ۸۰ء۴۳۶؍ کروڑ روپے تک پہنچ گئی، جبکہ بیرون ملک نمائش سے تقریباً۵۰ء۲۲۹؍ کروڑ روپے حاصل ہوئے۔ یوں ہندوستان اور بیرون ملک کی آمدنی ملا کر فلم کا عالمی مجموعی کاروبار۳۰ء۶۶۶؍ کروڑ روپے ہو گیا۔ تاہم، فلمی کاروبار کے اعداد و شمار مختلف تجارتی ذرائع کے حساب کے طریقے کے مطابق کچھ مختلف ہو سکتے ہیں۔  ہدایت کار نیلسن دلیپ کمار کی ہدایت کاری میں بننے والی ’’جیلر ۲‘‘ ،۱۵؍ اکتوبر ۲۰۲۶ءکو سنیما گھروں میں ریلیز ہوئی تھی۔ یہ ۲۰۲۳ء کی کامیاب فلم ’’جیلر‘‘ کا اگلا حصہ ہے، جس میں رجنی کانت نے ریٹائرڈ جیلر متھوویل پانڈیئن، یعنی ٹائیگر، کا کردار ادا کیا تھا۔

یہ بھی پڑھئے:فلم ’’رامائن‘‘ کا پہلا جائزہ ، امریکی صحافی نے ’’آر آر آر‘‘ کو بہتر فلم قرار دیا

 تجارتی رپورٹوں کے مطابق، نئی فلم نے اپنی پہلی قسط کی تقریباً۷ء۶۰۴؍کروڑ روپے کی عالمی مجموعی کمائی کو بھی پیچھے چھوڑ دیا ہے۔ دستیاب اعداد و شمار کی بنیاد پر’ ’جیلر ۲‘‘ عالمی سطح پر سب سے زیادہ کمائی کرنے والی تمل فلموں میں دوسرے مقام پر پہنچ گئی ہے، جبکہ رجنی کانت کی ۲۰۱۸ء کی فلم ’’۰ء۲‘‘ تقریباً ۶۹۱؍ کروڑ روپے کی کمائی کے ساتھ اس سے آگے ہے۔  ’’جیلر ۲‘‘ کو کلانِدھی مارن نے سن پکچرز کے بینر تلے تیار کیا ہے۔ فلم میں رجنی کانت کے ساتھ رمیا کرشنن، یوگی بابو، مرنا اور دیگر اداکار بھی اپنے کردار ادا کر رہے ہیں۔ اس کے علاوہ ایس جے سوریا، متھن چکرورتی، ودیا بالن، سورج ونجاراموڈو، موہن لال اور شیواراج کمار سمیت مختلف فلمی صنعتوں کے معروف فنکار بھی فلم کا حصہ ہیں۔ فلم کی کامیابی پر ہدایت کار نیلسن دلیپ کمار نے بھی ناظرین کا شکریہ ادا کیا۔ انہوں نے سوشل میڈیا پر فلم کے لیے ملنے والی پذیرائی پر خوشی کا اظہار کرتے ہوئے کہا کہ سنیما گھروں میں ناظرین کو فلم سے لطف اندوز ہوتے دیکھنا ان کے لیے خاص تجربہ ہے۔ رجنی کانت کا مداحوں کے ساتھ سنیما گھر میں بیٹھ کر اپنی فلم دیکھنا اور ’’جیلر ۲‘‘ کا عالمی سطح پر ۶۶۶؍کروڑ روپے سے زیادہ کا کاروبار کرنا، دونوں ہی اس فلم کی حالیہ کامیابی کے اہم پہلو بن گئے ہیں۔