اداکارہ رکول پریت سنگھ نے فلم انڈسٹری سے وابستہ مقامات پر انکم ٹیکس محکمہ کی تلاشی سے خود کو جوڑے جانے والی خبروں کی تردید کرتے ہوئے انہیں جھوٹی اور قیاس آرائیوں پر مبنی قرار دیا ہے۔ انہوں نے کہا کہ وہ کسی غیر قانونی بیرونِ ملک رقم منتقلی یا بے نامی جائیداد میں ملوث نہیں ہیں اور ہمیشہ اپنے ٹیکس کی ذمہ داریاں پوری کرتی رہی ہیں۔

اداکارہ رکول پریت سنگھ نے حال ہی میں بالی ووڈ سے وابستہ مختلف مقامات پر انکم ٹیکس محکمہ کی جانب سے کی گئی تلاشی کی کارروائی سے خود کو جوڑے جانے والی خبروں کی سختی سے تردید کی ہے۔ اداکارہ نے ان خبروں کو ’’جھوٹی، بدنیتی پر مبنی اور قیاس آرائیوں پر مبنی‘‘ قرار دیتے ہوئے الزامات کے حوالے سے تفصیلی وضاحت پیش کی ہے۔ یہ بیان ۲۸؍ ستمبر کو ممبئی انکم ٹیکس محکمہ کی جانب سے ۱۲؍ مقامات پر کی گئی تلاشی کے تقریباً ایک ہفتے بعد سامنے آیا ہے۔ یہ کارروائی مبینہ مالی بے ضابطگیوں کی تحقیقات کے سلسلے میں کی گئی تھی۔ اطلاعات کے مطابق تحقیقات میں اس الزام کا جائزہ لیا جا رہا ہے کہ فلمی منصوبوں کی فنانسنگ کے نام پر رقم بیرونِ ملک منتقل کی جا رہی تھی۔ بتایا جاتا ہے کہ رکول پریت سنگھ، ان کے سسر اور فلم پروڈیوسر واشو بھگنانی اور پینوراما اسٹوڈیوز سے مبینہ طور پر وابستہ مقامات بھی انکم ٹیکس محکمہ کی تلاشی کے دائرے میں شامل تھے۔

یہ بھی پڑھئے: ’دریشیم ۳‘ کی شاندار کمائی، تین دن میں ۲۷۲؍ کروڑ روپے کا عالمی بزنس

سوشل میڈیا پر بیان جاری کرتے ہوئے رکول پریت سنگھ نے کہا کہ انکم ٹیکس محکمہ کی کارروائی کا ان سے کوئی تعلق نہیں ہے اور انہوں نے مبینہ مالی لین دین سے خود کو الگ قرار دیا۔ انہوں نے اپنے پس منظر کا ذکر کرتے ہوئے کہا کہ وہ مستقل طور پر اپنے ٹیکس کی ذمہ داریاں پوری کرتی رہی ہیں۔ رکول نے لکھا، ’’آئیے ایک بار ہمیشہ کیلئے صورتحال واضح کردیں۔ یہ تلاشی میرے حوالے سے نہیں تھی۔ یہ بات واضح رہے کہ میرا تعلق مسلح افواج کے پس منظر سے ہے اور فلم انڈسٹری میں میرا کوئی گاڈ فادر نہیں تھا۔ میں نے اپنی محنت کے بل پر یہاں تک کا سفر طے کیا ہے اور ایک ذمہ دار اور قانون کی پابندی کرنے والی شہری کی حیثیت سے ۲۰؍ سال کی عمر سے اپنے واجب الادا ٹیکس باقاعدگی سے ادا کرتی رہی ہوں۔‘‘ انہوں نے مزید کہا، ’’میں ذاتی حیثیت میں یا کسی پروڈکشن ہاؤس کی جانب سے کسی بھی قسم کی غیر قانونی بیرونِ ملک رقم منتقلی میں ملوث نہیں ہوں۔ میں یہ بھی واضح کرنا چاہوں گی کہ ملک یا بیرونِ ملک کہیں بھی کسی کے نام پر میری کوئی بے نامی جائیداد نہیں ہے۔ نہ ہی کسی نے کبھی مجھے کوئی جائیداد تحفے میں دی ہے اور نہ ہی میں اصولی طور پر ایسے مہنگے تحائف قبول کرتی ہوں۔‘‘

یہ بھی پڑھئے: یامی گوتم اور آدتیہ دھر نے ممبئی کو خیربادکہا، ہماچل پردیش منتقل

رکول نے میڈیا رپورٹس پر بھی تنقید کی اور کہا کہ بعض ذرائع ابلاغ نے غیر مصدقہ دعوے شائع کیے ہیں۔ انہوں نے ان رپورٹس کو واپس لینے اور حقائق واضح کرنے کا مطالبہ کیا۔ انہوں نے کہا، ’’میں ان تمام لوگوں سے اپیل کرتی ہوں جنہوں نے یہ جھوٹی، بدنیتی پر مبنی اور قیاس آرائیوں پر مبنی خبریں شائع کی ہیں کہ انہیں واپس لیں اور حقائق واضح کریں۔‘‘ انہوں نے مزید کہا، ’’میں سمجھتی ہوں کہ ہر میڈیا ادارے، خواہ وہ کتنا ہی بڑا کیوں نہ ہو، اپنے کاروباری دباؤ کا سامنا کرتا ہے۔ لیکن یہ دباؤ حقائق کی قیمت پر نہیں ہونا چاہئے اور یقینی طور پر کسی کی ساکھ اور روزگار کی قیمت پر بھی نہیں ہونا چاہئے۔‘‘ اطلاعات کے مطابق انکم ٹیکس محکمہ کی تحقیقات میں مالی دستاویزات، ریکارڈ اور مبینہ بیرونِ ملک لین دین کا جائزہ لیا جا رہا ہے۔ تلاشی کی کارروائی کے بعد فلم پروڈیوسر واشو بھگنانی کے لندن میں اسپتال میں داخل ہونے کی اطلاعات بھی سامنے آئی تھیں۔

فلمی محاذ پر رکول پریت سنگھ کو آخری مرتبہ ’’پتی پتنی اور وہ دو‘‘ میں دیکھا گیا تھا۔ اب وہ ہدایتکار نتیش تیواری کی فلم ’’رامائن‘‘ میں راون کی بہن شُورپنکھا کا کردار ادا کریں گی۔ فلم میں رنبیر کپور، سائی پلوی اور یش اہم کرداروں میں نظر آئیں گے۔