کانگریس کی سینئر لیڈر اور کانگریس پارلیمانی پارٹی کی چیئرپرسن سونیا گاندھی کی زندگی اور سیاسی سفر اب بڑے پردے پر پیش کرنے کی تیاری کی جارہی ہے۔

 کانگریس کی سینئر لیڈر اور کانگریس پارلیمانی پارٹی کی چیئرپرسن سونیا گاندھی کی زندگی اور سیاسی سفر اب بڑے پردے پر پیش کرنے کی تیاری کی جارہی ہے۔ تلنگانہ پردیش کانگریس کمیٹی (ٹی پی سی سی) کے ورکنگ صدر اور سینئر کانگریس لیڈر ٹی جگا ریڈی نے سونیا گاندھی کی خودنوشت سوانح عمری ’Belonging: A Journey of Love‘ پر تیلگو زبان میں فیچر فلم بنانے کا اعلان کیا ہے۔ اس فلم میں سونیا گاندھی کی ذاتی زندگی، خاندانی حالات، مشکلات، ہندوستان آمد اور ملک کی سیاست میں ان کے اہم کردار کو پیش کیا جائے گا۔ اس منصوبے کا اعلان جگا ریڈی نے سنگاریڈی میں کانگریس کارکنوں اور منتخب نمائندوں کے ایک اجلاس کے دوران کیا۔ انہوں نے پارٹی رہنماؤں اور کارکنوں سے اپیل کی کہ وہ فلم کی تیاری کے لیے مالی تعاون کریں اور اس منصوبے کو کامیاب بنانے میں اپنا کردار ادا کریں۔

یہ بھی پڑھئے:’’مرزا پور: دی مووی‘‘ کی شاندار کامیابی کے بعد شویتا ترپاٹھی کی تھیٹر میں واپسی

جگا ریڈی نے فلم کی تیاری کے لیے تقریباً ۵۰؍ اراکین  پر مشتمل ایک کمیٹی تشکیل دینے کی تجویز پیش کی ہے، جو ابتدائی تیاریوں اور مالی وسائل جمع کرنے کی ذمہ داری سنبھالے گی۔ گاندھی بھون کے تعلقات عامہ کے افسر ہری پرساد اس کمیٹی کے کام کی نگرانی کریں گے۔ اس موقع پر سنگاریڈی اسمبلی حلقے کے کانگریس کنوینر جولاکانتی انجنے یولو نے فلم کی تیاری کے لیے ۲؍ کروڑ روپے دینے کا اعلان کیا۔جگا ریڈی نے پارٹی کارکنوں سے خطاب کرتے ہوئے کہا کہ جس طرح انتخابات کے دوران رقم خرچ کی جاتی ہے، اسی طرح اس فلم کے لیے بھی وسائل جمع کیے جائیں اور ایک اچھے ہدایت کار کا انتخاب کیا جائے۔ انہوں نے واضح کیا کہ فلم کی تیاری کے لیے بیرونی افراد سے مالی مدد لینے کے بجائے سنگاریڈی حلقے کے کانگریسی لیڈروں اور کارکنوں کے تعاون سے رقم جمع کرنے کی کوشش کی جائے گی۔انہوں نے کہا کہ فلم کی ابتدائی تیاریاں مکمل ہونے کے بعد تلنگانہ کے وزیر اعلیٰ اے ریونت ریڈی اور تلنگانہ پردیش کانگریس کمیٹی کے صدر بی مہیش کمار گوڑ کو فلم کی شوٹنگ کے افتتاح کے لیے مدعو کیا جائے گا۔
جگا ریڈی کے مطابق مجوزہ فلم میں سونیا گاندھی کی زندگی کے مختلف ادوار کو نمایاں کیا جائے گا۔ اس میں سابق وزیر اعظم اندرا گاندھی کی بہو، سابق وزیر اعظم راجیو گاندھی کی اہلیہ اور راہل گاندھی و پرینکا گاندھی کی والدہ کی حیثیت سے ان کی زندگی کے اہم واقعات شامل ہوں گے۔فلم میں اندرا گاندھی اور راجیو گاندھی کے قتل کے بعد گاندھی خاندان کو پیش آنے والے صدموں، سونیا گاندھی کو درپیش ذاتی مشکلات اور اپنے بچوں کی پرورش کے دوران انہیں پیش آنے والے چیلنجوں کو بھی دکھایا جائے گا۔ اس کے علاوہ ہندوستانی سیاست میں ان کی آمد، کانگریس پارٹی میں ان کے کردار اور ایک اہم سیاسی لیڈر کے طور پر ان کے سفر کو بھی کہانی کا حصہ بنایا جائے گا۔جگا ریڈی نے کہا کہ سونیا گاندھی نے ہندوستان جیسے کثیر مذہبی، کثیر لسانی اور متنوع ثقافتوں والے ملک میں اپنی الگ شناخت قائم کی ہے۔ ان کے مطابق سونیا گاندھی نے کانگریس پارٹی کی پیچیدہ سیاسی تاریخ اور نظام کو سمجھتے ہوئے اپنی سیاسی صلاحیتوں کا مظاہرہ کیا۔

یہ بھی پڑھئے:سولر سیلز کے معاملے میں واری انرجیز نے امریکہ میں غلطی تسلیم کرلی

کانگریس لیڈر نے اجلاس میں سونیا گاندھی کے اس فیصلے کا بھی ذکر کیا جس کے تحت انہوں نے ۲۰۰۴ء میں متحدہ ترقی پسند اتحاد (یو پی اے) کی حکومت قائم ہونے کے بعد وزیر اعظم کا عہدہ قبول کرنے سے انکار کردیا تھا اور ڈاکٹر منموہن سنگھ کو وزیر اعظم بنانے کی حمایت کی تھی۔ جگا ریڈی نے اس فیصلے کو ان کے سیاسی سفر کا ایک اہم واقعہ قرار دیا۔انہوں نے مہاتما گاندھی قومی دیہی روزگار ضمانت اسکیم (منریگا) کے قیام میں سونیا گاندھی، ڈاکٹر منموہن سنگھ اور راہل گاندھی کے کردار کا بھی ذکر کیا۔ ان کے مطابق اس اسکیم کے ذریعے دیہی علاقوں میں روزگار کے مواقع فراہم کرنے کی کوشش کی گئی۔