آسٹریلیا کے وزیر داخلہ ٹونی بُرک نے ایک حالیہ انٹرویو میں ہندی سنیما سے اپنی گہری دلچسپی کا اظہار کرتے ہوئے شاہ رخ خان کو اپنا پسندیدہ اداکار قرار دیا۔ انہوں نے ’’اوم شانتی اوم‘‘ کو اپنی پسندیدہ فلم کہا۔

بالی ووڈ کی عالمی مقبولیت ایک بار پھر نمایاں ہوئی ہے۔ آسٹریلیا کے وزیر داخلہ Tony Burke نے نہ صرف ہندی سنیما کے لیے اپنی دلچسپی کا اظہار کیا بلکہ شاہ رخ خان کو اپنا پسندیدہ اداکار قرار دیا۔ انڈین لنک پوڈکاسٹ میں میزبان پون لوتھرا سے گفتگو کرتے ہوئے ٹونی نے کہا کہ ’’میں شاہ رخ خان کا بہت بڑا مداح ہوں۔ اس کے علاوہ، میں اے آر رحمان کے ساؤنڈ ٹریکس سے بھی لطف اندوز ہوتا ہوں۔‘‘ یہ بیان اس بات کی عکاسی کرتا ہے کہ ہندوستانی فلمی موسیقی اور سنیما نہ صرف جنوبی ایشیا بلکہ مغربی دنیا میں بھی اپنی مضبوط جگہ بنا چکے ہیں۔ اے آر رحمان کا ذکر کرتے ہوئے انہوں نے بالی ووڈ کے میوزک کی عالمی کشش کو بھی اجاگر کیا۔

یہ بھی پڑھئے: فلم ’’پیڈی‘‘ میں ڈانس نمبر کے لیے شروتی ہاسن کو خطیر رقم ملی

فلموں کے حوالے سے گفتگو کرتے ہوئے ٹونی نے اپنی پسندیدہ فلموں کی ایک دلچسپ فہرست بھی شیئر کی۔ انہوں نے کہا کہ ’’اس معاملے میں مَیں متعصب ہوں، میں ’’چک دے انڈیا‘‘ کو بہترین کہوں گا کیونکہ اسے یہاں فلمایا گیا تھا۔‘‘ انہوں نے مزید وضاحت کرتے ہوئے کہا کہ ’’حالانکہ میں نے ’’لگان‘‘ دیکھتے ہوئے ہندوستان کیلئے فخر محسوس کیا تھا لیکن ’’چک دے انڈیا‘‘ دیکھتے وقت میں آسٹریلیا کے ساتھ تھا۔‘‘

اسی دوران، انہوں نے ’’جودھا اکبر‘‘ کی بھی تعریف کرتے ہوئے اسے ’’ایک خوبصورت اور غیر معمولی فلم‘‘ قرار دیا، جس سے واضح ہوتا ہے کہ وہ صرف کمرشیل فلموں ہی نہیں بلکہ تاریخی اور بصری طور پر بھرپور پروجیکٹس کو بھی سراہتے ہیں۔ تاہم، ان تمام فلموں میں سب سے نمایاں انتخاب ’’اوم شانتی اوم‘‘ رہا، جسے انہوں نے اپنی ہر وقت کی پسندیدہ فلم قرار دیا۔ انہوں نے کہا کہ ’’یہ صرف میری پسندیدہ بالی ووڈ فلم نہیں ہے، بلکہ یہ میری ہر وقت کی پسندیدہ فلم ہے۔‘‘ انہوں نے فلم کے ایک مشہور مکالمے کا حوالہ دیتے ہوئے مزید کہا کہ ’’ آج اس بات کا بھی یقین ہو گیا کہ ہماری فلموں کی طرح ہماری زندگی میں بھی آخر تک سب کچھ ٹھیک ہو جاتا ہے ’’ہیپیز اینڈنگز‘‘، اور اگر ٹھیک نہ ہو، تو وہ آخر نہیں، پکچر ابھی باقی ہے، میرے دوست!‘‘

یہ بھی پڑھئے: عامر کا نمبرمحفوظ نہیں تھا اسلئے’’لال سنگھ چڈھا‘‘ کیلئے نغمے نہیں لکھ سکا: ارشاد

یہ جملہ، جو شاہ رخ خان نے فلم میں ادا کیا تھا، عالمی سطح پر امید اور مثبت سوچ کی علامت کے طور پر جانا جاتا ہے۔ ’’اوم شانتی اوم‘‘ کی ہدایتکاری کے فرائض فرح خان نے انجام دیئے تھے جو نہ صرف باکس آفس پر کامیاب رہی بلکہ اس نے دپیکا پڈوکون کو بالی ووڈ میں ایک مضبوط آغاز بھی دیا۔