بالی ووڈ کے مرحوم اداکار عرفان خان کے بیٹےبابیل خان نے اننیا پانڈے اور دیگر بالی ووڈ سٹارز کو `بدتمیز کہنے کے بعد انسٹاگرام اکاؤنٹ ڈی ایکٹیویٹ کردیا۔ایک وائرل ویڈیو میں بابیل کو کہتے سنا جا سکتا ہےکہ بالی ووڈ سب سے زیادہ جعلی، جعلی، جعلی انڈسٹری ہے جس کا میں کبھی حصہ رہا ہوں۔

اداکار بابیل خان نے اپنے انسٹاگرام اسٹوریز پر کئی ویڈیوز شیئر کرنے کے فوراً بعد اپنا انسٹاگرام اکاؤنٹ ڈی ایکٹیویٹ کر لیا۔ ان ویڈیوز میں وہ رو پڑے تھے اور انہوں نے اننیا پانڈے، شانایا کپور، رگھو جویل، سدھانت چترویدی اور ارجن کپور سمیت کئی بالی ووڈ ستاروں پر `بدتمیزی کا الزام لگایا تھا۔  
اگرچہ بابیل نے بعد میں یہ ویڈیوز حذف کر دیں، لیکن یہ کلپس سوشل میڈیا پر وائرل ہو چکے ہیں۔ ایک ویڈیو میں بابیل کو کہتے ہوئے سنا جا سکتا ہے، ’’بالی ووڈ سب سے زیادہ جعلی، جعلی، جعلی انڈسٹری ہے جس کا میں کبھی حصہ رہا ہوں۔ لیکن کچھ لوگ ہیں جو چاہتے ہیں کہ بالی ووڈ بہتر ہو، میں تمہیں بہت کچھ دکھانے والا ہوں، بہت کچھ، بہت کچھ۔ میرے پاس تمہیں دینے کے لیے بہت کچھ ہے۔‘‘ ۲۶؍ سالہ اداکار نے کہا، ’’ میرا مطلب یہ ہے کہ میں صرف آپ لوگوں کو بتانا چاہتا ہوں کہ شانایا کپور، اننیا پانڈے، ارجن کپور، سدھانت چترویدی اور رگھو جویل جیسے لوگ موجود ہیں اور بھی بہت سے نام ہیں۔ بالی ووڈ بہت خراب ہے۔ بالی ووڈ بہت، بہت بدتمیز ہے۔‘‘

یہ بھی پڑھئے: عرفان خان نے ہالی ووڈ میں بھی خوب نام کمایا تھا

بعد میں، بابیل کی والدہ، اداکارہ و مصنفہ سوتپا سکدار نے ایک بیان جاری کرتے ہوئے وضاحت کی کہ بابیل کا دن مشکل گزر رہا تھا۔ سوتپا نے اتوار کو اپنے انسٹاگرام اسٹوری پر شیئر کیے گئے بیان میں کہا، ’’پچھلے کچھ سالوں میں، بابیل خان نے اپنے کام اور اپنی ذہنی صحت کے سفر کے بارے میں کھلے پن کی وجہ سے بہت محبت اور تعریف حاصل کی ہے۔ کسی اور کی طرح، بابیل کو بھی مشکل دن کا سامنا ہے اور یہ ان میں سے ایک تھا۔ ہم ان کے تمام خیرخواہوں کو یقین دلاتے ہیں کہ وہ محفوظ ہیں اور جلد بہتر محسوس کریں گے۔‘‘ سوتپا نے سوشل میڈیا صارفین سے درخواست کی کہ وہ بابیل کے الفاظ کو غلط طور پر نہ لیں۔  
کام کے حوالے سے، بابیل خان کو نیٹ فلکس سیریز ،’’ دی ریلوے مین‘‘ ’’ دی انٹولڈ سٹوری آف بھوپال ۱۹۸۴ء‘‘ میں ان کی شاندار اداکاریکیلئے جانا جاتا ہے۔ اس کے علاوہ انہوں نے انویتا دت کی فلم ’’قالہ‘‘ میں تریپتی ڈمری اور سواستیکا مکھرجی کے ساتھ کام کیا۔ مرحوم اداکار عرفان خان کے بڑے بیٹے بابیل خان نے حال ہی میں امیت گولانی کے’’ زی فائیو ‘‘کے سائبر تھرلر ’’لاگ آؤٹ‘‘  میں بھی اہم کردار ادا کیا ہے۔