ایران کے ساتھ جاری جنگ کے دوران امریکی فوجی نقصانات، اسرائیل کے بڑھتے ہوئے مالی اخراجات اور انٹیلی جنس سطح پر کنٹرول اقدامات کے حوالے سے اہم پیش رفت سامنے آئی ہے۔ رپورٹس کے مطابق سینکڑوں امریکی فوجی زخمی ہوئے ہیں جبکہ اسرائیل کے جنگی اخراجات ۱۵؍ بلین ڈالر تک پہنچ گئے ہیں۔ اسی دوران حساس معلومات کے تحفظ کیلئے سیٹیلائٹ امیجری کو محدود کرنے جیسے اقدامات بھی کیے گئے ہیں۔ ایک امریکی طیارے کے لاپتہ ہونے اور اس کی لاگت کے حوالے سے بھی تفصیلات سامنے آئی ہیں، جو جنگ کے وسیع ہوتے دائرے کی نشاندہی کرتی ہیں۔

(۱) ۳۷۳؍ امریکی فوجی ایران جنگ میں زخمی: رپورٹ
امریکی میڈیا اور دفاعی ذرائع کے مطابق ایران کے ساتھ جاری جنگ میں اب تک کم از کم ۳۷۳؍ امریکی فوجی زخمی ہو چکے ہیں۔ یہ اعداد و شمار مختلف فوجی کارروائیوں، میزائل حملوں اور فضائی جھڑپوں کے دوران ہونے والے نقصانات پر مبنی ہیں۔ رپورٹ میں کہا گیا ہے کہ ’’۳۷۳؍ امریکی سروس ممبرز ایران کے ساتھ جاری تنازع کے دوران زخمی ہوئے ہیں‘‘، جبکہ بعض زخمیوں کی حالت تشویشناک بتائی گئی ہے۔ ذرائع کے مطابق زخمی فوجیوں کو خطے میں قائم فوجی اڈوں اور بیرون ملک طبی مراکز میں منتقل کیا گیا ہے۔ امریکی محکمہ دفاع نے زخمیوں کی مکمل تفصیلات جاری نہیں کیں، تاہم یہ تسلیم کیا گیا ہے کہ نقصان ’’اہم سطح‘‘ تک پہنچ چکا ہے۔ یہ اعداد و شمار ایسے وقت میں سامنے آئے ہیں جب امریکی فوجی موجودگی خطے میں برقرار ہے اور کشیدگی میں کمی کے آثار نظر نہیں آ رہے۔

یہ بھی پڑھئے: اسرائیل کا اہم شہر حیفا لرز اُٹھا، ایرانی حملے میں ۴؍ ہلاک

(۲) ایران لبنان جنگوں کا مالی بوجھ: اسرائیل کے اخراجات ۱۵؍ بلین ڈالر تک پہنچ گئے
رپورٹس کے مطابق ایران اور لبنان میں جاری جنگی کارروائیوں کے نتیجے میں اسرائیل کے مجموعی فوجی اور سیکوریٹی اخراجات ۱۵؍ بلین ڈالر تک پہنچ گئے ہیں۔ یہ اخراجات فضائی حملوں، میزائل دفاعی نظام، فوجی تعیناتی، انٹیلی جنس آپریشنز اور ہنگامی سیکوریٹی اقدامات پر مشتمل ہیں۔ ایک رپورٹ میں کہا گیا ہے کہ ’’جنگی اخراجات میں مسلسل اضافہ ہو رہا ہے اور مجموعی لاگت ۱۵؍ بلین ڈالر تک پہنچ چکی ہے۔‘‘ ذرائع کے مطابق اسرائیلی معیشت پر بھی اس کے اثرات مرتب ہو رہے ہیں، جبکہ حکام نے مالی وسائل کی دوبارہ ترتیب کے اقدامات شروع کیے ہیں۔ اسرائیلی حکام نے کہا ہے کہ جنگی اخراجات کو پورا کرنے کیلئے اضافی بجٹ مختص کیا جا رہا ہے، جبکہ دفاعی ضروریات کو ترجیح دی جا رہی ہے۔

یہ بھی پڑھئے: ایران جنگ: جاپان کا ہرمز میں تحفظ کا مطالبہ، ایشیاء متبادل راستوں کی تلاش میں

(۳) سیٹیلائٹ نگرانی محدود: پلینٹ لیبز نے ایران تنازع کی تصاویر روک دیں
امریکی سیٹیلائٹ امیجنگ کمپنی پلانیٹ لیبس نے اعلان کیا ہے کہ وہ ایران اور مشرق وسطیٰ کے جاری تنازع سے متعلق تصاویر کو غیر معینہ مدت تک روک دے گی۔ کمپنی کے بیان میں کہا گیا ہے کہ ’’یہ اقدام اس لیے کیا گیا ہے تاکہ حساس جغرافیائی معلومات کو ایسے عناصر کے ہاتھوں میں جانے سے روکا جا سکے جو انہیں عسکری مقاصد کیلئے استعمال کر سکتے ہیں۔‘‘ رپورٹس کے مطابق یہ پابندی ۹؍ مارچ سے نافذ کی گئی اور اس کا اطلاق پہلے سے موجود ڈیٹا پر بھی کیا گیا ہے۔ کمپنی نے مزید کہا کہ اب تصاویر کو ’’منیجڈ ڈسٹری بیوشن‘‘ کے تحت جاری کیا جائے گا، جہاں صرف مخصوص اور جائز مقاصد کیلئے رسائی دی جائے گی۔