رنویر سنگھ کی فلم’’دُھرندھر: دی ریوینج‘‘ کی کامیابی کے درمیان دپیکاپڈوکون سوشل میڈیا پر بحث کا موضوع ہیں۔ فلم کے بارے میں کوئی پوسٹ نہ کرنے اور اسکریننگ میں شرکت نہ کرنے پر مداح ان کے ردِعمل کا انتظار کر رہے ہیں۔

دپیکا پڈوکون  اوردُھرندھر ۲؍ تنازع: جہاں رنویر سنگھ کی فلم’’دُھرندھر: دی ریوینج‘‘ باکس آفس پر دھوم مچا رہی ہے، وہیں اس فلم سے جڑا ایک الگ تنازع سوشل میڈیا پر چھایا ہوا ہے۔ ۱۹؍ مارچ کو فلم سنیما گھروں میں ریلیز ہوئی، جس کے بعد فلمی ستاروں سے لے کر عام لوگوں تک سب اس کی تعریف کر چکے ہیں  لیکن اب ایک نئی بحث شروع ہو گئی ہے، جس کی وجہ بنی ہیں رنویر سنگھ کی اہلیہ دپیکا پڈوکون۔ مداح یہ سوال کر رہے ہیں کہ آخر انہوں نے اب تک فلم کے بارے میں کوئی پوسٹ یا ردِعمل کیوں نہیں دیا۔
 فلم’’دُھرندھر: دی ریوینج‘‘ کی زبردست کامیابی کے باوجود دپیکا پڈوکون کو سوشل میڈیا پر ٹرولنگ کا سامنا کرنا پڑ رہا ہے۔ رپورٹس کے مطابق  اداکارہ نہ تو فلم کی خصوصی اسکریننگ میں نظر آئیں اور نہ ہی انہوں نے اپنے شوہر رنویر سنگھ کی اس بڑی ریلیز کے حوالے سے کوئی سوشل میڈیا پوسٹ شیئر کی۔ یہی بات اب انٹرنیٹ صارفین کے درمیان موضوعِ بحث بن گئی ہے۔ کئی لوگوں کا کہنا ہے کہ جب فلم اتنی بڑی ہٹ ہو رہی ہے تو دپیکا کو اس کی حمایت کرنی چاہیے تھی۔

یہ بھی پڑھئے:امریکی محکمہ انصاف کا ہارورڈ پر مقدمہ، سام دشمنی کا الزام

 کنسرٹ میں نظر آئیں دپیکا 
کچھ صارفین نے تو یہاں تک لکھ دیا کہ وہ دوسرے معاملات پر لمبی پوسٹس کرتی ہیں  لیکن اپنے شوہر کی فلم کے لیے ایک اسٹوری بھی نہیں ڈالی۔ معاملہ اس وقت مزید بڑھ گیا جب فلم کی اسکریننگ مس کرنے کے بعد اگلے ہی دن دپیکا اپنے سسرال والوں کے ساتھ ایک کنسرٹ میں نظر آئیں۔ اس بات نے سوشل میڈیا پر مزید سوالات کھڑے کر دیے۔ لوگوں نے ان کی اس موجودگی اور فلم سے دوری کو آپس میں جوڑ کر دیکھنا شروع کر دیا، جس سے بحث مزید تیز ہو گئی۔

یہ بھی پڑھئے:امریکہ روس کو تمام توانائی کے بازاروں سے باہر نکالنے کی کوشش کر رہا ہے: لاوروف

پہلے بھی اٹھ چکے ہیں سوالات 
تاہم، یہ پہلی بار نہیں ہے کہ دپیکا کی خاموشی زیرِ بحث آئی ہو۔ اس سے پہلے بھی کئی مواقع پر ان کی سوشل میڈیا سرگرمیوں پر سوال اٹھائے جا چکے ہیں، لیکن ہر بار مداحوں کا ایک گروپ ان کے حق میں بھی کھڑا ہوا ہے۔ کچھ لوگوں کا ماننا ہے کہ کسی رشتے کو سوشل میڈیا پوسٹس کی بنیاد پر نہیں پرکھنا چاہیے۔ دوسری طرف، انڈسٹری میں بھی یہ بات نوٹ کی جا رہی ہے کہ دپیکا نے اب تک فلم کی کامیابی پر کوئی ردِعمل نہیں دیا۔