کولکاتا میں ٹی ایم سی سے وابستہ  بی ایل او کی تنظیم کا بیمار اراکین کے اہل خانہ کے ساتھ الیکٹورل آفیسر کے دفتر کے باہر احتجاج، دباؤ کو نظر انداز کرنے کا الزام

مغربی بنگال میں ایس آئی آر کے دوران  بیمار یا فوت ہونےوالے بی ایل اوز  اوران کے اہل خانہ کیلئے معاوضہ کا مطالبہ کرتے ہوئے سنیچر کو پھر ترنمول کانگریس سے وابستہ  بی ایل او کارکنان  نے چیف الیکٹورل آفیسر   کے دفتر کے باہر احتجاج کیا۔ مظاہرین کے ساتھ  بیمار اور فوت ہونےوالے بی ایل اوز کے اہل خانہ بھی تھے۔ انہوں نے الزام لگایا کہ الیکشن کمیشن ایس آئی آر کے دوران کام کے دباؤ کو نظر انداز کر رہا ہے۔
 یہ احتجاج ایسے وقت کیا گیا جب الیکشن کمیشن کی ایک خصوصی ٹیم کولکاتا کے دورے پر   ہے۔ مظاہرین نے الزام لگایا کہ گھنٹوں انتظار کے باوجود انہیں دورے پر آئے افسران سے ملنے کا موقع نہیں دیا گیا۔ ’بی ایل او ادھیکار رکشا کمیٹی‘ کے بینر تلے کئے گئے اس احتجاج میں مرشدآباد کے ایک بلاک لیول آفیسر کے اہل ِ خانہ بھی شامل تھے، جنہیں بقول مظاہرین، کام کے شدید دباؤ کے باعث فالج کا حملہ ہوا تھا اور انہیں اسپتال میں داخل کرایا گیا تھا۔ گروپ نے الیکشن کمیشن پر ’’حقیقی شکایات کو نظرانداز‘‘ کرنے کا الزام لگایا۔ بی ایل او فورم نے دو اہم مطالبات پیش  کئے۔ اول یہ کہ  ان کارکنوں کے خاندانوں کو معاوضہ دیا جائے جنہیں خصوصی گہری نظرثانی(ایس آئی آر) کے عمل کے دوران مبینہ طور پر شدید طبی مسائل کا سامنا کرنا پڑا یا جن کی موت ہو گئی۔دوم یہ کہ  یہ یقین دہانی کرائی جائے کہ مستقبل میں ایس آئی آر کا   عمل بہتر منصوبہ بندی اور مناسب تیاری کے بعد ہی کیا جائے گا۔
 کمیشن نے اس سے قبل مغربی بنگال کے پولیس ڈائریکٹر جنرل اور کولکاتا پولیس کمشنر کو خط لکھ کر سی ای او دفتر کے احاطے میں سخت  سیکوریٹی  یقینی بنانے کی ہدایت دی تھی۔ احتجاج جاری رہنے پر مظاہرین کو علاقے سے ہٹانے  کیلئے  پولیس تعینات کی گئی ہے۔ حکام نے بتایا کہ کمیشن نے جمعہ کوترنمول کانگریس کے ایک وفد کو واضح پیغام دیا تھا کہ تمام فریقین سرکاری کارروائی میں رکاوٹ ڈالنے سے گریز کریں۔