بھائی بہن کے اٹوٹ پیار کو ظاہر کرنے والے رکشا بندھن کے تہوار سے متعلق فلمی نغمے بھی سامعین کو بہت پسند آتے ہیں۔

ہندوستانی فلموں میں تہواروں کو اہمیت دینے کی روایت بہت پرانی ہے۔ وہ ہولی ہو یا دیوالی، عید ہو یا کرسمس، بودھ پورنیما ہو یا بیساکھی۔ اسی طرح رکشا بندھن کا تہوار بھی ہے۔ ہندوستانی فلموں نے کہانیوں اور گانوں کے ذریعہ اس تہوار کو کئی فلموں میں دکھایا ہے۔ بھائی بہن کے اٹوٹ پیار کو ظاہر کرنے والے رکشا بندھن کے تہوار سے متعلق فلمی نغمے بھی سامعین کو بہت پسند آتے ہیں۔ 
پروڈیوسر ایل وی پرساد کی۱۹۵۹ء میں ریلیز ہونے والی فلم ’چھوٹی بہن‘ غالباً پہلی فلم تھی جس میں بھائی بہن کے اٹوٹ پیار کے رشتے کو سلور اسکرین پر دکھایا گیا تھا۔ اس فلم میں بلراج ساہنی نے بڑے بھائی کا کردار ادا کیا تھاجبکہ نندا نے چھوٹی بہن کا کردار نبھایا تھا۔ شیلندر کا لکھا ہوا اور لتا منگیشکر کا گایا ہوا گانا ’’بھیا میری راکھی کے بندھن کو نبھانا‘‘ بہت مقبول ہوا۔ یہ گانا آج بھی رکشا بندھن کے گانوں میں ایک خاص مقام رکھتا ہے۔ اس فلم نے باکس آفس پر بھی کامیابی کا پرچم لہرایا تھا۔ اس میں بلراج ساہنی اور نندا کے علاوہ دھومل، محمود، شوبھا کھوٹے، شیاما اور رحمان بھی اہم کرداروں میں تھے۔ اس فلم میں مشہور اداکارہ ببیتاکپور (کرشمہ اور کرینہ کپور کی ماں ) کے والد ہری شیوداسانی بھی تھے۔ 
پروڈیوسر اور ہدایت کار اے بھیم سنگھ نے بھائی بہن کے رشتے پر مبنی دو فلمیں ’راکھی‘ اور ’بھائی بہن‘ بنائیں۔ ۱۹۶۲ء میں ریلیز ہونے والی فلم ’راکھی‘ میں اشوک کمار اور وحیدہ رحمان نے بھائی بہن کا کردار ادا کیا تھا۔ سنیل دت اور نوتن۱۹۶۸ء میں ریلیز ہونے والی ’بھائی بہن‘ میں مرکزی کردار میں تھے۔ اس دوران ’اَن پڑھ‘ اور ’کاجل‘ جیسی فلموں میں بھائی بہن کی پاکیزہ محبت پر دو خوبصورت گانے پیش کئے گئے۔ ان میں لتا منگیشکر کی آواز میں فلم ’ان پڑھ‘ میں مالا سنہا پر فلمایا گیا گانا ’رنگ برنگی راکھی لے کر آئے بہنا‘ آج بھی سامعین کےدلوں پر چھا جاتا ہے۔ فلم میں بلراج ساہنی بھائی کا کردار ادا کر رہے تھے۔ فلم ’کاجل‘ میں ایک بہت ہی خوبصورت گانا ’میرا بھیا میرے چندا میرے انمول رتن‘ مینا کماری پر فلمایا گیا تھا۔ پلے بیک گلوکارہ آشا بھوسلے نے روی کی موسیقی کی ہدایت کاری میں اس گانے کو آواز دی۔ بمل رائے کی فلم ’بندنی‘ میں بھی ایک بہت ہی دل کو چھو لینے والا گانا تھا جس میں بہن اپنے والد سے اپنے بھائی کو ساون میں بھیجنے کی درخواست کرتی ہے’ اب کے سال بھیج بھیا کو بابل ساون میں دجو بلائے ری‘ آشا بھوسلے نے شیلندر کے لکھے ہوئے اور ایس ڈی برمن کے بنائے ہوئے اس گانے کو اپنی سریلی آواز دی تھی، جو ایک بہن کی کہانی بیان کرتا ہے۔ 
۱۹۷۱ء میں ریلیز ہوئی، دیو آنند اور زینت امان نے ہرے راما ہرے کرشنا میں بھائی بہن کا کردار ادا کیا ہے۔ فلم کا گانا ’پھولوں کا تاروں کا سب کا کہنا ہے، ایک ہزاروں میں میری بہنا ہے‘ آج بھی سدا بہار گانوں میں شامل ہے۔ ریشم کی ڈوری میں سمن کلیان پوری کا گایا ہوا گانا’ بہنا نے بھائی کی کلائی سے پیار باندھا ہے‘ اب بھی رکشا بندھن پر ریڈیو پر چلایا جاتا ہے۔ اسی طرح فلم ’بے ایمان‘ کا گانا ’یہ راکھی بندھن ہے ایسا‘، فلم’ سچا جھوٹا‘ کا گانا’میری پیاری بہنا بنے گی دلہنیا‘ فلم چنبل کی قسم کا گانا ’چندا رے میرے بھیا سے کہنا‘ فلم’پیاری بہنا‘ کا گانا’ راکھی کے دن‘، اور فلم’ ہم ساتھ ساتھ ہیں ‘ کا نغمہ ’ چھوٹے چھوٹے بھائیوں کے‘ وغیرہ کافی مقبول ہوئے ہیں۔ ابھی ۲۰۲۲ء میں اکشے کمار اور بھومی پیڈنیکر کی ایک فلم ریلیز ہوئی تھی جس کا نام ہی ’رکشا بندھن‘ ہے۔