بالی ووڈ کی مقبول کامیڈی فلم ’’پارٹنر‘‘ آج بھی ناظرین میں بے حد پسند کی جاتی ہے۔ حال ہی میں اداکار گووندہ نے ایک انٹرویو میں انکشاف کیا کہ فلم میں سلمان خان کے کردار اور ان کی جسمانی تبدیلی کا خیال دراصل انہی کا تھا۔ انہوں نے بتایا کہ انہوں نے ہدایتکار ڈیوڈ دھون اور پروڈیوسر سہیل خان کو سلمان خان کو فلم کا ہیرو بنانے اور انہیں ایک نئے انداز میں پیش کرنے کا مشورہ دیا تھا۔

فلم ’’پارٹنر‘‘ سن ۲۰۰۷ء میں ریلیز ہوئی تھی اور اس نے ریلیز کے بعد باکس آفس پر اچھی کامیابی حاصل کی۔ یہ فلم اپنے مزاحیہ مکالموں، دل چسپ کہانی اور اداکاروں کی بہترین کامک ٹائمنگ کی وجہ سے آج بھی شائقین میں مقبول ہے۔ اس فلم میں مرکزی کردار سلمان خان، گووندہ، کترینہ کیف اور لارا دتہ نے ادا کئے تھے۔ فلم میں رومانس اور کامیڈی کا ایسا امتزاج پیش کیا گیا تھا جس نے ناظرین کو خوب محظوظ کیا۔ دلچسپ بات یہ ہے کہ اگرچہ سلمان خان اور گووندہ دونوں نے ہدایتکار ڈیوڈ دھون کے ساتھ کئی فلموں میں کام کیا تھا، لیکن دونوں اداکار پہلی مرتبہ فلم ’’پارٹنر‘‘ میں ایک ساتھ نظر آئے۔ فلم کی کامیابی نے خاص طور پر گووندہ کو ایک طویل وقفے کے بعد دوبارہ شہرت کی روشنی میں لا کھڑا کیا تھا۔

یہ بھی پڑھئے: ’’دی بیڈز آف بالی ووڈ‘‘ دیکھ کرایچ بی او آرین خان کا مداح بن گیا، سیریز بنانے کی پیشکش

ایک حالیہ انٹرویو میں گووندہ نے بتایا کہ سلمان خان کی شخصیت اور انداز کو بدلنے کا خیال انہی کا تھا۔ انہوں نے کہا کہ انہوں نے ہدایتکار ڈیوڈ دھون اور فلم کے پروڈیوسر سہیل خان سے ملاقات کے دوران یہ تجویز دی کہ سلمان خان کو فلم کا مرکزی ہیرو بنایا جائے۔ گووندہ نے کہا، ’’ہم ان کی شخصیت کو بدل دیں گے، کل ایک نیا سلمان ہوگا۔ جو پہلے دیکھا تھا وہ الگ تھا اور جو اب دیکھیں گے وہ بالکل مختلف ہوگا۔‘‘ انہوں نے بتایا کہ اس خیال کو آزمایا گیا اور فلم میں سلمان خان کو ایک نئے انداز میں پیش کیا گیا۔
گووندہ نے سلمان خان کے بارے میں بات کرتے ہوئے انہیں ایک مخلص انسان قرار دیا۔ انہوں نے بتایا کہ سلمان خان نے ان سے پوچھا کہ انہیں اپنی شخصیت میں کیا تبدیلیاں لانی چاہئیں۔ گووندہ کے مطابق انہوں نے سلمان خان کو مشورہ دیا کہ وہ اپنی فٹنس اور شخصیت پر زیادہ توجہ دیں۔ انہوں نے کہا کہ چہرے کی چمک کم ہو گئی تھی، جسم کو زیادہ فٹ بنانے کی ضرورت تھی اور بال بھی کچھ کم ہو رہے تھے، اس لئے انہیں اپنے انداز میں تبدیلی لانی چاہیے۔

یہ بھی پڑھئے: شریا گھوشال کی لِپ سنک پر تنقید، لائیو گائیکی کو فنکار کی اصل محنت قرار دیا

گووندہ کے مطابق ان کی گفتگو کے بعد سلمان خان نے اپنی فٹنس پر کام شروع کیا اور ورزش کو معمول بنا لیا۔ انہوں نے کہا کہ فلم ’’پارٹنر‘‘ کے بعد سلمان خان کی شخصیت پہلے سے مختلف دکھائی دینے لگی۔ گووندہ نے کہا، ’’فلم ’’پارٹنر‘‘ کے بعد سلمان کو دیکھیں، وہ پہلے جیسے نہیں رہے۔‘‘ ان کے مطابق یہی تبدیلی بعد میں سلمان خان کے کریئر کیلئے بھی فائدہ مند ثابت ہوئی اور وہ بالی ووڈ کے سب سے بڑے ستاروں میں شامل ہو گئے۔