ہما قریشی کی نئی فلم Baby Do Die Do کا ٹیزر جاری کر دیا گیا ہے، جسے سوشل میڈیا پر مثبت ردعمل مل رہا ہے۔ فلم کی ہدایت کاری Nachiket Samant نے کی ہے جبکہ اسے ہما کے بھائی ثاقب سلیم پروڈیوس کر رہے ہیں۔ یہ فلم ۳؍ جولائی ۲۰۲۶ء کو سنیما گھروں میں ریلیز ہوگی، جہاں اس کا مقابلہ عالیہ بھٹ کی ’’الفا‘‘ سے ہوگا۔

ہما قریشی اپنی نئی فلم Baby Do Die Do کے ساتھ ناظرین کے سامنے آنے کے لیے تیار ہیں۔ فلم کے میکرز نے منگل کو اس کا پہلا ٹیزر جاری کیا، جس نے ریلیز ہوتے ہی سوشل میڈیا پر توجہ حاصل کر لی۔ فلم کی ہدایت کاری نچیکیت سامنت نے کی ہے جبکہ اسے ہما قریشی کے بھائی اور اداکار ثاقب سلیم پروڈیوس کر رہے ہیں۔ ٹیزر جاری ہونے کے بعد ہما قریشی نے بھی اسے اپنے سوشل میڈیا پلیٹ فارمز پر شیئر کیا اور مداحوں کو فلم کی پہلی جھلک دکھائی۔ 

فلم کی کہانی ممبئی میں رہنے والے ایک ایسے گونگے اور بہرے سیریل کلر کے گرد گھومتی ہے جو صرف اپنی مردہ بہن کی آواز سن سکتا ہے۔ ٹیزر میں فلم کے پراسرار اور غیر روایتی ماحول کی جھلک دکھائی گئی ہے، جس نے شائقین کی دلچسپی میں اضافہ کیا ہے۔ فلم میں ہما قریشی کے ساتھ سکندر کھیر، چنکی پانڈے، سیما پہوا اور رچیت سنگھ بھی اہم کرداروں میں نظر آئیں گے۔ ٹیزر کے اجراء کے بعد سوشل میڈیا پر مداحوں نے مثبت ردعمل کا اظہار کیا۔ ایک صارف نے لکھاکہ ’’مجھے ٹیزر بہت پسند آیا۔ یہ فلم کے بارے میں تجسس اور سسپنس پیدا کرنے کے لیے کافی ہے۔ امید ہے ٹریلر پوری کہانی ظاہر نہیں کرے گا‘‘

ایک اور صارف نے تبصرہ کیا کہ یہ فلم امید افزا لگ رہی ہے۔ کافی عرصے بعد کچھ نیا دیکھنے کا موقع ملا ہے۔ امید ہے اسے مناسب تعداد میں اسکرینیں ملیں گی تاکہ زیادہ لوگ اسے سنیما گھروں میں دیکھ سکیں۔‘‘ فلمی حلقوں میں اس بات پر بھی توجہ دی جا رہی ہے کہ ۳؍ جولائی کو ’’بے بی ڈو ڈائی ڈو‘‘ کا مقابلہ ’’الفا‘‘ سے ہوگا، جو یش راج فلمز کے اسپائی یونیورس کا حصہ ہے۔ اس فلم میں عالیہ بھٹ اور شروری مرکزی کردار ادا کر رہی ہیں، جبکہ اس فلم کی پہلی جھلک ۱۰؍ جون کو جاری کی جائے گی۔ دلچسپ بات یہ ہے کہ دونوں فلمیں خواتین کرداروں کے گرد گھومتی ہیں، جس کے باعث باکس آفس پر دو خواتین پر مبنی بڑی فلموں کا مقابلہ ہوگا۔

یہ بھی پڑھئے: ہندوستان میں ’’دی اوڈیسی‘‘ کی ٹکٹ کی قیمت ۳؍ ہزار روپے تک پہنچ گئی

فلمی تجزیہ کاروں کا کہنا ہے کہ ایک جانب ’’الفا‘‘ کو بڑے بینر اور اسپائی یونیورس کا فائدہ حاصل ہوگا، جبکہ دوسری جانب ’’بے بی ڈو ڈائی ڈو‘‘ اپنے منفرد موضوع اور ٹیزر کو ملنے والے مثبت ردعمل کی وجہ سے ناظرین کی توجہ حاصل کر سکتی ہے۔ اب نگاہیں اس بات پر مرکوز ہیں کہ آنے والے دنوں میں ’’الفا‘‘ کی پہلی جھلک شائقین کی توقعات پر کس حد تک پورا اترتی ہے اور کیا ہما قریشی کی فلم اپنی ابتدائی مقبولیت کو برقرار رکھتے ہوئے باکس آفس پر مضبوط مقابلہ پیش کر پاتی ہے یا نہیں۔