ریسٹ آف انڈیا نے شاندار گیند بازی کا مظاہرہ کرتے ہوئے موجودہ رنجی ٹرافی چیمپئن جموں و کشمیر کو ایران کپ ۲۰۲۶ء میں ۱۶۷؍ رن سے شکست دے دی۔ اس جیت کے ساتھ ریسٹ آف انڈیا نے ایرانی کپ کا ریکارڈ ۳۱؍واں خطاب اپنے نام کر لیا۔

ریسٹ آف انڈیا نے شاندار گیند بازی کا مظاہرہ کرتے ہوئے موجودہ رنجی ٹرافی چیمپئن جموں و کشمیر کو ایران کپ ۲۰۲۶ء میں ۱۶۷؍ رن سے شکست دے دی۔  اس جیت کے ساتھ ریسٹ آف انڈیا نے ایرانی کپ کا ریکارڈ  ۳۱؍واں خطاب  اپنے نام کر لیا۔ سری نگر کے شیرِ کشمیر کرکٹ اسٹیڈیم میں کھیلے گئے مقابلے میں جموں و کشمیر کی ٹیم ۲۷۹؍ رن کے ہدف کے تعاقب میں صرف ۱۱۱؍ رن پر آل آؤٹ ہوگئی۔ 

یہ بھی پڑھئے:’’میری خواہش ہے کہ اپنے کریئر میں کوئی اچھا مزاحیہ کردار بھی ادا کروں‘‘

ریسٹ آف انڈیا نے پہلی اننگز میں ۲۳۷؍ رن  بنائے تھے، جس کے جواب میں جموں و کشمیر نے ۲۷۸؍ رن  بنا کر ۴۱؍ رن کی اہم برتری حاصل کرلی تھی۔ اس مرحلے پر میزبان ٹیم کی پوزیشن مضبوط دکھائی دے رہی تھی، لیکن ریسٹ آف انڈیا نے دوسری اننگز میں شاندار واپسی کرتے ہوئے۳۱۹؍ رن  بنائے اور جموں و کشمیر کے سامنے جیت کے لیے ۲۷۹؍ رن کا ہدف رکھا۔  ریسٹ آف انڈیا کی دوسری اننگز میں  سمرن روی چندرن  نے شاندار۱۳۵؍ رن  کی فیصلہ کن اننگز کھیلی۔ انہوں نے ۱۵۳؍ گیندوں کا سامنا کرتے ہوئے ۱۶؍ چوکے اور۵؍ چھکے لگائے۔ سمرن نے پہلی اننگز میں بھی ۶۸؍ رن بنائے تھے اور اپنی شاندار کارکردگی کی بدولت انہیں  مقابلے کا بہترین کھلاڑی  قرار دیا گیا۔ سنات سنگوان نے بھی دوسری اننگز میں ۵۵؍ رن بنا کر ٹیم کو مضبوط اسکور تک پہنچانے میں اہم کردار ادا کیا۔ 
۲۷۹؍ رن کے ہدف کا تعاقب کرتے ہوئے جموں و کشمیر نے اچھی شروعات کی۔ شبھم کھجوریہ اور قمران اقبال نے پہلی وکٹ کے لیے ۵۴؍ رن کی شراکت قائم کی۔ قمران اقبال نے ۳۲؍ اور شبھم کھجوریہ نے ۳۶؍ رن بنائے، جبکہ عبدالصمد نے ۲۰؍ رن کا حصہ ڈالا۔ ایک وقت میں جموں و کشمیر کا اسکور ۱۹؍ اوورز میں ۸۹؍ رن پر تین وکٹ تھا، لیکن اس کے بعد ریسٹ آف انڈیا کے تیز گیند بازوں نے ایسا تباہ کن حملہ کیا کہ پوری ٹیم صرف ۱۱۱؍رن پر سمٹ گئی۔ 

یہ بھی پڑھئے:جہاں بھی وہ ہمیں روکیں گے وہیں ہمارا جنتر منتر بن جائے گا: ابھیجیت دپکے

مکیش کمار ریسٹ آف انڈیا کی جیت کے سب سے بڑے ہیرو رہے۔  انہوں نے دوسری اننگز میں صرف ۳۳؍رن دے کر ۶؍وکٹ حاصل کیے اور جموں و کشمیر کی بیٹنگ کی کمر توڑ دی۔ مکیش نے ایک مرحلے پر صرف چار گیندوں کے اندر تین وکٹ حاصل کرکے مقابلے کا رخ مکمل طور پر اپنی ٹیم کے حق میں موڑ دیا۔ آکاش دیپ نے بھی عمدہ گیند بازی کرتے ہوئے ۲۵؍ رن دے کر۳؍ وکٹ حاصل کیے۔ دونوں نے مل کر جموں و کشمیر کی آخری اننگز میں ۹؍وکٹ حاصل کیے۔  اس مقابلے میں ریسٹ آف انڈیا کی قیادت  رشبھ پنت  کر رہے تھے، تاہم بخار کے باعث وہ چوتھے دن میدان میں نہیں اتر سکے اور  سرفراز خان  نے قائم مقام کپتان کی ذمہ داری سنبھالی۔ ان کی قیادت میں ٹیم نے ۲۷۹؍ رن کے ہدف کا کامیابی سے دفاع کیا۔  
اس طرح ایرانی کپ کا یہ مقابلہ ریسٹ آف انڈیا کی شاندار واپسی کے ساتھ اختتام  کوپہنچا ۔ پہلی اننگز میں ۴۱؍رن سے پیچھے رہنے کے باوجود ٹیم نے بلے بازی میں سمرن روی چندرن کی سنچری اور گیند بازی میں مکیش کمار و آکاش دیپ کی تباہ کن کارکردگی کی بدولت  ۱۶۷؍رن کی بڑی فتح** حاصل کی۔ یہ مقابلہ سری نگر میں پہلی مرتبہ ایران کپ کی میزبانی کے حوالے سے بھی خاص اہمیت رکھتا ہے۔