ہالی ووڈ کے معروف ہدایت کار کرسٹوفر نولن کی انتہائی متوقع فلم The Odyssey کی ریلیز سے قبل ہندوستان میں آئی میکس ٹکٹوں کی قیمتوں نے شائقین کو حیران کر دیا ہے۔ مختلف شہروں میں جاری نرخوں کے مطابق بعض مقامات پر ٹکٹوں کی قیمت ۳؍ ہزار روپے تک پہنچ گئی ہے۔ فلم ۱۷؍ جولائی کو ہندوستان میں ریلیز ہوگی۔

۲۰۲۶ء کی سب سے زیادہ متوقع ہالی ووڈ فلموں میں شامل The Odyssey کی ریلیز سے قبل ہندوستان میں اس کے آئی میکس ٹکٹوں کی قیمتیں سامنے آ گئی ہیں، جنہوں نے فلمی شائقین کو حیران کر دیا ہے۔ مشہور فلم ساز کرسٹوفر نولن کی ہدایت کاری میں بننے والی یہ فلم یونانی شاعر ہومر کی کلاسیکی رزمیہ داستان ’’اوڈیسی‘‘ پر مبنی ہے۔ نولن کی فلموں کے شائقین پہلے ہی اس منصوبے کو ان کے کریئر کے سب سے بڑے اور پرجوش پروجیکٹس میں شمار کر رہے ہیں۔ ہندوستانی میڈیا رپورٹس کے مطابق فلم کے آئی میکس شوز کے ٹکٹ کئی شہروں میں غیر معمولی حد تک مہنگے ہیں، خصوصاً ممبئی، دہلی اور پونے میں قیمتیں عام فلمی ٹکٹوں سے کہیں زیادہ دیکھی جا رہی ہیں۔

یہ بھی پڑھئے: ۴۵؍ برس بعد خواب حقیقت بنا، کمل ہاسن نے ’سنگ گیتھم‘ کو بے مثال تخلیقی سفر کہا

ممبئی میں آئی ناکس ملاڈ کو فلم دیکھنے کے نسبتاً سستے مقامات میں شمار کیا جا رہا ہے، جہاں صبح کے شوز کے ٹکٹ تقریباً ۴۰۰؍ سے ۵۰۰؍ روپے تک دستیاب ہیں۔ شام کے شوز کے لیے یہی قیمت ۷۰۰؍ سے ۸۰۰؍ روپے تک پہنچ جاتی ہے۔

ایروز آئی میکس میں صبح کے شوز کے ٹکٹ ۵۰۰؍ سے ۵۵۰؍  روپے جبکہ شام کے شوز کے لیے ۷۰۰؍ سے ۷۵۰؍ روپے تک فروخت کیے جا رہے ہیں۔

ممبئی کے پی وی آر لوور پریل میں قیمتیں مزید بلند ہیں، جہاں صبح کے شوز کے لیے ٹکٹ ۷۰۰؍ سے ۱۴۰۰؍ روپے جبکہ رات کے شوز کے لیے ۹۰۰؍ سے ۱۴۰۰؍ روپے تک پہنچ رہے ہیں۔

سنی پولیس سی ووڈز میں صورتحال مزید مختلف ہے، جہاں صبح کے شوز کے ٹکٹ ۱۳۰۰؍ سے ۱۵۰۰؍ روپے جبکہ شام کے شوز کے لیے ۱۸۰۰؍ سے ۲۰۰۰؍ روپے تک فروخت ہو رہے ہیں۔

دہلی اور این سی آر میں بھی قیمتیں خاصی بلند ہیں۔ پی وی آر ویگاس میں ٹکٹ ۸۳۰؍ سے ۱۰۵۰؍ روپے تک ہیں، جبکہ پی وی آر پریا میں بعض شوز کے لیے قیمت ۱۴۰۰؍ روپے تک پہنچ رہی ہے۔

دوسری جانب آئی ناکس پارس دہلی میں نسبتاً سستا آپشن سمجھا جا رہا ہے، جہاں صبح کے شوز کے ٹکٹ ۳۷۰؍ سے ۴۹۰؍ روپے اور رات کے شوز کے ٹکٹ ۵۲۰؍ سے ۶۲۰؍ روپے تک دستیاب ہیں۔

جنوبی اور مشرقی ہندوستان میں بھی قیمتیں نمایاں ہیں۔ سنی پولیس نیکسس میں ٹکٹ ۹۰۰؍ سے ایک ہزار روپے جبکہ سنی پولیس کوچی میں ۷۴۰؍ سے ۹۵۰؍ روپے تک فروخت کیے جا رہے ہیں۔

تاہم سب سے زیادہ توجہ پونے کی قیمتوں نے حاصل کی ہے۔ سنی پولیس اوندھ اورآئی ناکس میگا پلیکس میں بعض شوز کے لیے ٹکٹ ۱۴۰۰؍ سے ۲۶۰۰؍ روپے تک پہنچ چکے ہیں، جبکہ شام کے بعض شوز میں قیمت ۳؍ ہزار روپے تک پہنچ گئی ہے۔

یہ بھی پڑھئے: ’’بٹوارہ ۱۹۴۷ء‘‘ کے موشن پوسٹر میں تقسیم کے درد کو دکھایا گیا

فلم میں میٹ ڈیمن، ٹام ہالینڈ، رابرٹ پیٹنسن، زینڈایا اور اینی ہیتھوے سمیت کئی بین الاقوامی ستارے شامل ہیں۔ تجارتی ماہرین کا کہنا ہے کہ چونکہ فلم خصوصی طور پر آئی میکس فارمیٹ کو مدنظر رکھتے ہوئے تیار کی گئی ہے، اس لیے شائقین بڑے پردے پر اسے دیکھنے کے لیے اضافی رقم خرچ کرنے کو تیار نظر آتے ہیں۔ تاہم بعض حلقوں کا ماننا ہے کہ اتنی بلند قیمتیں عام ناظرین کی رسائی محدود کر سکتی ہیں۔ فلم ۱۷؍ جولائی کو ہندوستان میں ریلیز ہوگی اور توقع کی جا رہی ہے کہ یہ سال کی سب سے بڑی بین الاقوامی ریلیزز میں شامل ہوگی۔