شاہ رخ خان اور ایشوریا رائے کی مشہور فلم ’’شکتی: دی پاور‘‘ کے مقبول گیت ’’عشق کمینہ‘‘ کا نیا ری کری ایٹڈ ورژن آنے والی فلم ’’بے بی ڈو ڈائی ڈو‘‘ میں شامل کیا گیا ہے۔ اداکارہ ہما قریشی نے کہا ہے کہ اس کلٹ کلاسک گانے کو دوبارہ پیش کرنا پوری ٹیم کے لیے ایک بڑی ذمہ داری تھی اور وہ اس حوالے سے حقیقی معنوں میں گھبرائے ہوئے تھے۔

شاہ رخ خان اور ایشوریا رائے بچن پر فلمایا گیا بالی ووڈ کا مقبول ڈانس نمبر ’’عشق کمینہ‘‘ ایک نئے انداز میں دوبارہ پیش کیا جا رہا ہے۔ اس گانے کا ری کری ایٹڈ ورژن آنے والی فلم ’’بے بی ڈو ڈائی ڈو‘‘ میں شامل کیا گیا ہے، جس میں ہما قریشی اور رچیت سنگھ مرکزی کردار ادا کر رہے ہیں۔ گانے کی ریلیز کے موقع پر ہما قریشی نے اعتراف کیا کہ اتنے مقبول اور یادگار گانے کو نئے انداز میں پیش کرنا پوری ٹیم کے لیے ایک بڑا چیلنج تھا۔ انہوں نے کہا کہ ’’جب یہ گانا ہمارے پاس آیا تو ہم اسے دوبارہ زندہ کرنے کے لیے بہت پرجوش تھے۔عشق کمینہ ایک بہت بڑا گانا ہے، تقریباً ہر شخص نے زندگی میں کبھی نہ کبھی اس پر رقص کیا ہے، اور یہی چیز اسے ایک بڑی ذمہ داری بنا دیتی ہے۔ ہم واقعی گھبرائے ہوئے تھے، حقیقی معنوں میں نروس تھے۔‘‘

یہ بھی پڑھئے: ملی بوبی براؤن کی بالی ووڈ میں کام کرنے کی خواہش

ہما نے اس سے قبل سوشل میڈیا پر گانے کی جھلک شیئر کرتے ہوئے اسے دہلی کے ان نوجوانوں کے لیے ایک جذباتی اور پرانی یادوں سے بھرپور لمحہ قرار دیا تھا جو ۹۰؍ کی دہائی اور ۲۰۰۰ء کی دہائی کے آغاز میں بالی ووڈ کے مشہور گانوں پر بڑے ہوئے۔ انہوں نے شاہ رخ خان اور ایشوریا رائے بچن کے لیے اپنی پسندیدگی کا اظہار کرتے ہوئے لکھا تھا کہ یہ گانا ان کی نسل کی یادوں کا اہم حصہ ہے۔ دوسری جانب رچیت سنگھ نے کہا کہ ’عشق کمینہ‘ جیسے مقبول گانے کا حصہ بننا ان کے لیے اعزاز بھی ہے اور ذمہ داری بھی۔ انہوں نے کہا کہ ’’یہ میرا پہلا بڑا کمرشیل ہندی پروموشنل ٹریک ہے، اس لیے میرے سامنے بہت بڑے جوتے تھے جنہیں بھرنا تھا۔‘‘ رچیت نے مزید کہا کہ ہما قریشی کے ساتھ کام کرنا ان کے لیے نہایت آسان اور خوشگوار تجربہ رہا اور انہیں امید ہے کہ دونوں کے درمیان قدرتی کیمسٹری ناظرین کو بھی پسند آئے گی۔

یہ بھی پڑھئے: ’’کالا ہرن‘‘ تنازع: سلمان خان پر مبنی کردار ادا کرنے والے سونو مشرا فلم سے الگ

’’بے بی ڈو ڈائی ڈو‘‘ کے ذریعے یہ مشہور گانا نئی نسل کے لیے دوبارہ پیش کیا جا رہا ہے، جبکہ اصل گانا آج بھی بالی ووڈ کے مقبول ترین ڈانس نمبرز میں شمار کیا جاتا ہے۔ ری کری ایٹڈ ورژن کی ریلیز کے بعد سوشل میڈیا پر شائقین کی جانب سے ملا جلا ردعمل سامنے آیا ہے، جہاں کچھ صارفین نے کلاسک گانے کو نئے انداز میں پیش کرنے کو سراہا، جبکہ بعض نے اصل ورژن کو ناقابلِ فراموش قرار دیتے ہوئے اس سے موازنہ کیا۔