ہندوستانی مردوں کی بیڈمنٹن ٹیم کو جاپان کے آئیچی میں کھیلے گئے ایشین گیمز۲۰۲۶ءکے سیمی فائنل میں پیپلز ری پبلک آف چائنا کے ہاتھوں ۱۔۳؍ سے شکست کے بعد کانسہ کے تمغے پر اکتفا کرنا پڑا۔

ہندوستانی مردوں کی بیڈمنٹن ٹیم کو بدھ کو جاپان کے آئیچی میں کھیلے گئے ایشین گیمز۲۰۲۶ءکے سیمی فائنل میں پیپلز ری پبلک آف چائنا کے ہاتھوں ۱۔۳؍ سے شکست کے بعد کانسہ کے تمغے پر اکتفا کرنا پڑا۔ ہانگژو  ۲۰۲۳ء میں چاندی کا تمغہ جیتنے والی ہندوستانی ٹیم مسلسل دوسرے ایشین گیمز میں پوڈیم تک پہنچنے میں کامیاب رہی، تاہم فائنل میں جگہ نہیں بنا سکی۔

یہ بھی پڑھئے:ٹی وی شو ’’سی آئی ڈی ‘‘کی مقبول ٹیم کی واپسی، اندازبالکل نیا ہوگا

ساتوک سائی راج رنکی ریڈی اور چراغ شیٹی نے مردوں کے ڈبلز مقابلے میں موجودہ عالمی چیمپئن جوڑی لیانگ وی کینگ اور وانگ چانگ کو ۱۱۔۲۱، ۲۰۔۲۲؍ سے شکست دے کر مقابلے میں ہندوستان کی واحد کامیابی حاصل کی۔ اس سے قبل بیڈمنٹن عالمی رینکنگ میں ۱۴؍ویں نمبر کے لکشیا سین کو اچینومیا سٹی میونسپل جمنازیم میں کھیلے گئے پہلے مقابلے میں  ۲۰۲۵ء کے عالمی چیمپئن شی یوکی کے ہاتھوں ۱۶۔۲۱، ۱۸۔۲۱؍ سے شکست کا سامنا کرنا پڑا۔ لکشیا نے اچھی شروعات کی، لیکن شی یوکی نے واپسی کرتے ہوئے پہلا گیم جیت لیا۔ ہندوستانی کھلاڑی نے دوسرے گیم میں بھی مقابلہ سخت کرتے ہوئے اسکور۱۶۔۱۶؍ سے برابر کیا، لیکن چینی کھلاڑی نے آخرکار کامیابی حاصل کرلی۔
اس کے بعد عالمی ڈبلز رینکنگ میں پانچویں نمبر کی ساتوک اور چراغ کی جوڑی نے دنیا کی نمبر تین چینی جوڑی کے خلاف شاندار کارکردگی کا مظاہرہ کیا۔ اسی جوڑی نے گزشتہ ماہ نئی دہلی میں ہونے والی عالمی چیمپئن شپ میں ساتوک اور چراغ کو شکست دے کر بعد میں خطاب بھی اپنے نام کیا تھا۔ ایشین گیمز میں مردوں کے ڈبلز کی موجودہ چیمپئن ہندوستانی جوڑی نے پہلے گیم میں غلبہ برقرار رکھا، جبکہ دوسرے گیم میں اسے چینی جوڑی کی جانب سے سخت مزاحمت کا سامنا کرنا پڑا۔
چینی جوڑی نے دو میچ پوائنٹس بچاتے ہوئے اسکور  ۲۰۔۲۰؍ سے برابر کردیا، تاہم ہندوستانی کھلاڑیوں نے تحمل کا مظاہرہ کیا اور تیسرے موقع کو کامیابی میں تبدیل کرتے ہوئے ہندوستان کو ۱۔۱؍سے برابری دلادی۔ بیڈمنٹن ایشیا چیمپئن شپ میں چاندی کا تمغہ جیتنے والے آیوش شیٹی کو عالمی نمبر ۱۲؍لی شی فینگ نے ۱۹۔۲۱،۱۳۔۲۱؍ سے شکست دے دی، جس سے چین نے ایک بار پھر برتری حاصل کرلی۔ ۲۱؍ سالہ ہندوستانی کھلاڑی نے رواں سال کے آغاز میں براعظمی چیمپئن شپ میں لی شی فینگ کو شکست دی تھی۔ اس بار سخت مقابلے والے پہلے گیم میں آیوش وقفے تک  ۱۰۔۱۱؍سے آگے تھے۔ دوسرے گیم میں بھی انہوں نے ۱۳۔۱۶؍کے اسکور پر فرق کم کرکے تین پوائنٹس کردیا، لیکن چینی کھلاڑی کو جیت سے نہیں روک سکے۔

یہ بھی پڑھئے:دپیکا سہراوت نے ۹؍ گول داغے، ہندوستان نے تھائی لینڈ کو ۱۔۲۰؍ سے ہرایا

ہندوستان کے ۱۔۲؍ سے پیچھے ہونے کے بعد ہرِہَرن امساکرونن اور ایم آر ارجن نے چوتھے اور فیصلہ کن مقابلے میں ہی جی ٹنگ اور لیو یی کا سامنا کیا۔ تاہم، ہندوستانی جوڑی کو۱۶۔۲۱، ۲۱۔۱۷، ۹۔۲۱؍ سے شکست کا سامنا کرنا پڑا، جس کے ساتھ ہی مسلسل دوسری بار مردوں کی ٹیم کے فائنل میں پہنچنے کی ہندوستان کی امیدیں ختم ہوگئیں۔ ہندوستان نے منگل کو کوارٹر فائنل میں میزبان جاپان کو ۰۔۳؍ سے شکست دے کر اپنا تمغہ یقینی بنایا تھا۔ لکشیا، ساتوک-چراغ اور آیوش نے اپنے اپنے مقابلے جیتے تھے۔
ہانگژو  ۲۰۲۳ء میں ہندوستانی مردوں کی ٹیم نے طلائی تمغے کے مقابلے میں چین سے ۲۔۳؍ سے شکست کے بعد چاندی کا تمغہ جیتا تھا۔ دوسری جانب ہندوستانی خواتین کی بیڈمنٹن ٹیم منگل کو میزبان جاپان سے ۱۔۳؍ سے شکست کے بعد کوارٹر فائنل میں ہی باہر ہوگئی تھی۔ ایشین گیمز ۲۰۲۶ءمیں بیڈمنٹن کے انفرادی مقابلے جمعہ سے شروع ہوں گے۔ مردوں اور خواتین کے سنگلز اور ڈبلز مقابلے ۲۵؍ سے ۲۹؍ ستمبر ۲۰۲۶ءتک جاری رہیں گے۔