پنکج کپور اور ڈمپل کپاڈیہ کی آنے والی فلم ’’جب کھلی کتاب‘‘ کا ٹریلر جاری کر دیا گیا ہے۔ فلم ایک ایسے جوڑے کی کہانی بیان کرتی ہے جو ۵۰؍ سالہ شادی کے بعد اچانک طلاق کے موڑ پر کھڑا ہو جاتا ہے۔ ہدایت کار سوربھ شکلا کی یہ فلم بڑھتی عمر کی محبت، سچائی اور وقار کے موضوعات کو نرمی اور گہرائی کے ساتھ پیش کرتی ہے۔

’’جب کھلی کتاب‘‘ کا ٹریلر گوپال اور انوسویا کی بظاہر پُرسکون زندگی کی جھلک پیش کرتا ہے۔ گوپال کا کردار پنکج کپور اور انوسویا کا کردار ڈمپل کپاڈیہ نے ادا کیا ہے۔ کہانی کا آغاز اس چونکا دینے والے لمحے سے ہوتا ہے جب گوپال ۵۰؍ برس کی مشترکہ زندگی کے بعد، اپنی بیوی سے طلاق لینے کا فیصلہ کرتا ہے۔ دونوں کی زندگی یادوں، عادتوں اور خاموش سمجھوتوں سے بنی ہوئی ہے، مگر ایک طویل عرصے سے دبا ہوا راز سب کچھ بدل دیتا ہے۔ ٹریلر میں دکھایا گیا ہے کہ انوسویا ایک ایسا انکشاف کرتی ہے جو برسوں سے ان کے درمیان خاموشی میں دفن تھا۔ یہ سچ گوپال کے لیے دل توڑ دینے والا ثابت ہوتا ہے۔ وہ اپنے وقار، دکھ اور محبت کے درمیان الجھ جاتا ہے اور بالآخر قانونی راستہ اختیار کرنے کا فیصلہ کرتا ہے۔

 

 

 

 

 

View this post on Instagram

 

 

 

 

 

 

 

 

 

 

 

A post shared by ZEE5 (@zee5)

یہی موڑ انہیں ایک نوجوان وکیل کے پاس لے جاتا ہے، جس کا کردار اپارشکتی کھرانہ ادا کر رہے ہیں۔ عدالت کی کارروائی کے دوران وہ گفتگو سامنے آتی ہے جو برسوں سے دلوں میں دبی ہوئی تھی، ناراضی، پچھتاوا، اور کہیں نہ کہیں باقی رہ جانے والی محبت۔ فلم کی ہدایت کاری سو ربھ شکلا نے کی ہے۔ پنکج کپور نے اپنے کردار کے بارے میں کہا کہ ’’جو چیز ’’جب کھلی کتاب‘‘ کو واقعی خاص بناتی ہے وہ سوربھ شکلا کا وژن ہے۔ ایسا فلمساز بہت کم ملتا ہے جو بوڑھے، بالغ محبت پر روشنی ڈالنے اور اسے اتنی ایمانداری، مزاح اور نرمی کے ساتھ پیش کرے۔ وہ ہمیں یاد دلاتا ہے کہ محبت عمر کے ساتھ ختم نہیں ہوتی، بلکہ پیچیدہ ہو جاتی ہے۔‘‘ان کے مطابق، یہ فلم وقار اور سچائی کے ساتھ اس مرحلے کی محبت کو بیان کرتی ہے جسے اکثر سنیما میں نظر انداز کر دیا جاتا ہے۔

یہ بھی پڑھئے: ریڈ کارپٹ انکشاف؟ زینڈایا اور ٹام ہالینڈ کی خفیہ شادی کی افواہ

ڈمپل کپاڈیہ نے انوسویا کے کردار کو ایک گہرے انسانی تجربے سے تعبیر کیا۔ انہوں نے کہا کہ ’’’’جب کھلی کتاب‘‘ ایک ایسا پروجیکٹ ہے جہاں میرے تمام خانے ٹک ہو گئے،ایک خوبصورت کہانی، پنکج کپور کے ساتھ کام کرنے کا موقع، اور سوربھ جی کی ہدایت کاری۔ انوسویا اپنی شادی کو توڑنے کی کوشش نہیں کر رہی، وہ صرف سچ بول رہی ہے۔ کئی دہائیوں بعد ایسی ایمانداری بہت کم دیکھنے کو ملتی ہے۔‘‘ ان کے مطابق، کردار کی جذباتی گہرائی اور انسانی کمزوریاں ہی اسے حقیقی بناتی ہیں۔
فلم کا مرکزی خیال یہ ہے کہ محبت صرف جوانی کا جذبہ نہیں، بلکہ وقت کے ساتھ اس کی شکل بدلتی ہے۔ برسوں کی خاموشی، روایات اور ذمہ داریوں کے نیچے چھپی ہوئی سچائیاں جب سامنے آتی ہیں تو رشتے نئے امتحان سے گزرتے ہیں۔ ’’جب کھلی کتاب‘‘ نہ صرف ایک ازدواجی تنازع کی کہانی ہے بلکہ یہ اس سوال کو بھی اٹھاتی ہے کہ کیا سچائی دیر سے سہی، مگر رشتوں کو آزاد کر سکتی ہے؟