سنجے کپور کی سابق اہلیہ کرشمہ کپور نے اپنے بچوں کی جانب سے کپور کی متنازع وصیت کو چیلنج کر رکھا ہے۔ انہوں نے الزام لگایا کہ اس کے ذریعے ان کے بچوں کو ان کی جائز وراثت سے محروم کر دیا گیا ہے۔ یہ کیس عدالت میں زیرِ غور ہے۔

اداکارہ کرینہ کپور نے اپنی بہن کرشمہ کپور کے بچوں کو مرحوم تاجر سنجے کپور کی وراثت سے جڑے تنازع میں عدالتی حکم کے ذریعے عبوری ریلیف ملنے پر اپنا ردِعمل ظاہر کیا ہے۔ دہلی ہائی کورٹ کے فیصلے کے تھوڑی دیر بعد، کرینہ کپور نے انسٹاگرام پر اسٹوری میں ایک پیغام شیئر کیا جس میں انہوں نے لکھا کہ ”اور روشنی آگئی۔ انصاف اور سچائی ہمیشہ غالب رہتی ہے... چڑھدی کلا۔“ اس پیغام کو واضح طور پر عدالتی فیصلے پر ان کے ردِعمل کے طور پر دیکھا جا رہا ہے۔ اگرچہ انہوں نے براہِ راست کیس کا ذکر نہیں کیا، لیکن اس پوسٹ کو ان کی بھانجی اور بھانجے کی حمایت کے طور پر لیا جارہا ہے۔

واضح رہے کہ دہلی ہائی کورٹ نے جمعرات کو سائرہ اور کیان کپور کی جانب سے دائر کردہ عبوری حکمِ امتناعی کی درخواست منظور کرتے ہوئے حکم دیا کہ سنجے کپور کی تقریباً ۳۰ ہزار کروڑ روپے کی مالیت کی جائیداد پر موجودہ صورتحال کو جوں کا توں برقرار رکھا جائے۔ عدالت نے ان کی بیوہ پریا کپور کو مزید کارروائی تک اثاثوں تک رسائی حاصل کرنے یا ان میں کسی قسم کے لین دین سے بھی روک دیا ہے۔ عدالتی نے حکام سے اکاؤنٹ اسٹیٹمنٹس طلب کی ہیں اور اس جائیداد سے منسلک غیر ملکی بینک اکاؤنٹس اور کرپٹو کرنسی ہولڈنگز کے آپریشنز کو محدود کر دیا گیا ہے۔ عدالت نے نوٹ کیا کہ چونکہ ٹرائل میں وقت لگ سکتا ہے، اس لئے جائیداد کا تحفظ ضروری ہے اور درخواست گزاروں کے اٹھائے گئے خدشات کا ازالہ ہونا چاہئے۔

یہ بھی پڑھئے: فلم ’’تال ۲‘‘ سے انل کپور،ایشوریہ رائے باہر، اکشے کھنہ بھی نظرنہیں آئیں گے

یہ قانونی تنازع پریا کپور کی جانب سے پیش کردہ وصیت نامہ کی اصلیت کے گرد گھومتا ہے۔ سائرہ اور کیان کپور کی نمائندگی کرتے ہوئے سینئر ایڈووکیٹ مہیش جیٹھ ملانی نے دلیل دی کہ اس دستاویز میں تضادات موجود ہیں۔ انہوں نے موقف اختیار کیا کہ اس کی مزید جانچ پڑتال ضروری ہے، خاص طور پر اس لئے کہ پریا کپور اس وصیت کو پیش کرنے والی اور واحد مستفید بھی ہیں۔

یہ معاملہ گزشتہ سال ۱۲ جون کو سنجے کپور کے انتقال کے بعد پیدا ہوا۔ انگلینڈ میں ایک پولو میچ کے دوران انہیں مبینہ طور پر دل کا دورہ پڑا اور ان کا انتقال ہوگیا۔ ان کی وفات کے بعد ان کی وسیع جائیداد پر قانونی جنگ چھڑ گئی۔ کرشمہ کپور، جو ۲۰۱۶ء میں طلاق لینے سے پہلے تک سنجے کپور کی اہلیہ تھیں، نے اپنے بچوں کی جانب سے اس وصیت کو چیلنج کر رکھا ہے۔ انہوں نے الزام لگایا کہ اس کے ذریعے انہیں ان کی جائز وراثت سے محروم کر دیا گیا ہے۔ یہ کیس عدالت میں زیرِ غور ہے۔