کترینہ کیف طویل وقفے کے بعد فلمی دنیا میں واپسی کی تیاری کر رہی ہیں۔ میڈیا رپورٹس کے مطابق وہ ہدایت کار اجے بہل کی مجوزہ فلم ’’چاندنی بار ۲‘‘ میں مرکزی کردار ادا کر سکتی ہیں۔ یہ فلم ۲۰۰۱ء کی قومی ایوارڈ یافتہ فلم ’’چاندنی بار‘‘ کا سیکوئل بتائی جا رہی ہے، جس میں تبو نے یادگار کردار نبھایا تھا۔

بالی ووڈ کی معروف اداکارہ کترینہ کیف کے بارے میں اطلاعات ہیں کہ وہ طویل وقفے کے بعد ایک اہم فلمی منصوبے کے ذریعے بڑے پردے پر واپسی کر سکتی ہیں۔ میڈیا رپورٹس کے مطابق کترینہ کیف کو ہدایت کار اجے بہل کی مجوزہ فلم ’’چاندنی بار ۲‘‘  کے لیے زیر غور لایا جا رہا ہے۔ اگر یہ منصوبہ حتمی شکل اختیار کرتا ہے تو یہ زچگی کے بعد اداکارہ کی پہلی بڑی بالی ووڈ فلم ہوگی۔ گزشتہ کچھ عرصے سے کترینہ کیف اپنی ذاتی زندگی، خاندان اور اپنے بیوٹی برانڈ Kay Beauty پر توجہ مرکوز کیے ہوئے تھیں۔ اسی دوران ان کی فلمی سرگرمیاں محدود رہیں، جس کے باعث مداح ان کی واپسی کے منتظر تھے۔

یہ بھی پڑھئے: وِہان کی پیدائش کے بعد کترینہ کیف کے کم بیک کی تیاریاں، او ٹی ٹی ڈیبیو کا امکان

رپورٹس کے مطابق ’’چاندنی بار ۲‘‘ کا موضوع ریڈ لائٹ ایریا اور اس سے جڑے جرائم کے نیٹ ورک کے گرد گھومے گا۔ تاہم فلم کی کہانی، کاسٹ اور پروڈکشن سے متعلق تفصیلات تاحال باضابطہ طور پر جاری نہیں کی گئیں۔ اصل ’’چاندنی بار‘‘ کی ہدایت کاری مدھر بھنڈارکر نے کی تھی جس میں تبو نے مرکزی کردار ادا کیا تھا۔ فلم کو ناقدین اور شائقین دونوں کی جانب سے زبردست پذیرائی ملی تھی اور اسے جدید ہندوستانی سنیما کی اہم فلموں میں شمار کیا جاتا ہے۔ ذرائع کے مطابق بعض رپورٹس میں یہ دعویٰ بھی کیا گیا ہے کہ تبو سیکوئل میں کسی نہ کسی شکل میں نظر آ سکتی ہیں، لیکن اس حوالے سے بھی کوئی سرکاری تصدیق موجود نہیں۔

یہ بھی پڑھئے: ’’کالا ہرن‘‘ تنازع: سلمان خان ہائی کورٹ سے رجوع ، ریلیز روکنے کی درخواست

اس دوران او ٹی ٹی کے ذریعے بھی کترینہ کیف کی واپسی کی خبریں گردش کررہی ہیں، تاہم اداکارہ کے قریبی ذرائع نے ان اطلاعات کی تردید کی۔ ذرائعکے مطابق، ’’کترینہ کیف کے آئندہ اداکاری کے منصوبوں سے متعلق زیر گردش دعوؤں میں کوئی صداقت نہیں۔ یہ تمام خبریں قیاس آرائیوں اور غیر مصدقہ معلومات پر مبنی ہیں۔‘‘ فلم کے عنوان کے حوالے سے بھی تنازع سامنے آ چکا ہے۔ مدھر بھنڈارکر نے پروڈیوسر سندیپ سنگھ اور ہدایت کار اجے بہل کے خلاف انڈین موشن پکچر پروڈیوسرز اسوسی ایشن میں شکایت درج کرائی تھی۔ ان کا مؤقف تھا کہ ’’چاندنی بار‘‘ کے عنوان کا استعمال ان کی اجازت کے بغیر کیا جا رہا ہے۔

یہ بھی پڑھئے: فرحان اختر آر ڈی برمن کی بایوپک میں ان کا کردار ادا کریں گے

بعد ازاں پروڈیوسر کے نمائندوں نے وضاحت کرتے ہوئے کہا کہ چاندنی بار کے عنوان اور دانشورانہ ملکیت کے حقوق اصل مالکان سے باقاعدہ طور پر حاصل کیے جا چکے ہیں اور قانونی تقاضے پورے کیے جا رہے ہیں۔ کترینہ کیف کو آخری مرتبہ ’’میری کرسمس‘‘ میں وجے سیتھوپتی کے ساتھ دیکھا گیا تھا۔ فلم میں ان کی اداکاری کو سراہا گیا، تاہم اس کے بعد وہ کسی نئے فلمی منصوبے میں نظر نہیں آئیں۔ فلمی حلقوں کا ماننا ہے کہ اگر ’’چاندنی بار ۲‘‘ میں کترینہ کیف کی شمولیت کی باضابطہ تصدیق ہو جاتی ہے تو یہ ان کے کریئر کے اہم ترین اور غیر روایتی کرداروں میں سے ایک ثابت ہو سکتا ہے، کیونکہ اصل فلم سماجی حقیقت نگاری اور سنجیدہ موضوعات کی وجہ سے خاص مقام رکھتی ہے۔