کرن جوہر کا شو ’کافی ود کرن‘ طویل عرصے سے بالی ووڈ میں اقربا پروری کی بحث کا حصہ رہا ہے، لیکن پہلے آٹھ سیزن کے مہمانوں کی فہرست کا تجزیہ ایک مختلف تصویر پیش کرتا ہے۔ اعداد و شمار کے مطابق، شو میں فلمی خاندانوں سے تعلق رکھنے والی شخصیات کے ساتھ بڑی تعداد میں ایسے فنکار بھی شریک ہوئے جن کا فلمی صنعت سے خاندانی تعلق نہیں تھا۔

کرن جوہر طویل عرصے سے بالی ووڈ میں اقربا پروری کی بحث کے مرکز میں رہے ہیں۔ اس تنازع نے اس وقت مزید شدت اختیار کرلی تھی جب اداکارہ کنگنا رناوت نے انہیں فلم انڈسٹری میں ’’اقربا پروری کا سب سے بڑا علم بردار‘‘ قرار دیا تھا۔ تاہم گزرتے برسوں کے ساتھ کرن جوہر کے چیٹ شو ’’کافی ود کرن‘‘ نے بھی اس بحث کو ہوا دی۔ ناقدین اکثر سوال اٹھاتے رہے ہیں کہ کیا فلم ساز اپنے شو میں معروف اداکاروں کے بچوں اور فلمی خاندانوں سے تعلق رکھنے والی شخصیات کو ترجیح دیتے ہیں۔ اب جبکہ اطلاعات ہیں کہ یہ چیٹ شو اپنے آخری مرحلے میں ہے، اس کے پہلے آٹھ سیزن کے مہمانوں پر نظر ڈالنے سے یہ جانچنے کا موقع ملتا ہے کہ کیا مہمانوں کی فہرست واقعی اس تاثر کی تائید کرتی ہے۔

یہ بھی پڑھئے: کرن راؤ اور صبا آزاد عمران خان کی حمایت میں سامنے آگئیں

کافی ود کرن: فلمی خاندانوں کے بچے بمقابلہ بیرونی شخصیات

اعداد و شمار سے عوامی تاثر کے مقابلے میں قدرے مختلف تصویر سامنے آتی ہے۔ ’’دی پرنٹ‘‘ کی جانب سے سیزن ۱؍ سے ۸؍ تک کے مہمانوں کی مرتب کردہ فہرست کے تجزیے کے مطابق، شو میں آنے والے ۱۲۳؍ مہمانوں میں سے تقریباً ۶۲؍ ایسے تھے جن کے خاندانوں کا فلمی صنعت سے کوئی مضبوط یا معروف تعلق نہیں تھا۔ دوسری جانب، تقریباً ۵۵؍ مہمانوں کا تعلق ان شخصیات سے تھا جنہیں عام طور پر ’’نیپو بیبیز‘‘ یعنی فلمی خاندانوں میں پیدا ہونے والے افراد کہا جاتا ہے۔ اس فہرست میں پانچ ایسی خواتین بھی شامل تھیں جنہوں نے فلمی شخصیات سے شادی کی ہے۔ ان میں گوری خان، ماہیپ کپور، میرا راجپوت، بھاونا پانڈے اور سوزین روشن شامل ہیں۔

فلمی پس منظر نہ رکھنے والی کئی معروف شخصیات بھی اس شو کے مشہور صوفے پر جلوہ گر ہوچکی ہیں۔ ان میں شاہ رخ خان، دپیکا پڈوکون، پرینکا چوپڑا، انوشکا شرما، جان ابراہم، کترینہ کیف، ودیا بالن، سشمیتا سین، کنگنا رناوت، کریتی سینن اور ثانیہ ملہوترا شامل ہیں۔ بین الاقوامی شہرت یافتہ اداکار رچرڈ گیر بھی اس شو کے مہمان بن چکے ہیں۔ اگرچہ یہ اعداد و شمار اقربا پروری سے متعلق بحث کو مکمل طور پر ختم نہیں کرتے، تاہم ان سے ظاہر ہوتا ہے کہ شو کی مہمانوں کی فہرست میں ایسی بڑی تعداد میں مشہور شخصیات شامل رہی ہیں جن کا تعلق روایتی طور پر فلمی خاندانوں سے نہیں ہے۔

یہ بھی پڑھئے: ماجد مجیدی کی ’’مڈ ڈے میل‘‘ نے بوسان فلم فیسٹیول کا سب سے بڑا ایوارڈ جیت لیا

کافی ود کرن میں سب سے زیادہ مرتبہ کون آیا؟

مختلف اداکاروں کی شو میں شرکت کی تعداد اس کی مہمانوں کی تاریخ کا جائزہ لینے کا ایک اور طریقہ ہے۔ ہر سیزن کے حساب سے مرتب کردہ اعداد و شمار کے مطابق، پہلے آٹھ سیزن میں ۲۳؍ مہمان کم از کم چار مرتبہ شو میں شریک ہوئے۔ عالیہ بھٹ، ارجن کپور، دپیکا پڈوکون، پرینکا چوپڑا، کاجول اور سدھارتھ ملہوترا، ہر ایک پانچ مرتبہ شو میں آئے۔ ورون دھون بھی پانچ سیزن میں نظر آئے، لیکن ان کی مجموعی شرکت کی تعداد چھ تھی۔ سیزن ۵؍ میں وہ قسط نمبر ۳؍ میں ارجن کپور کے ساتھ صوفے پر بیٹھے، جبکہ قسط نمبر ۱۵؍ میں عالیہ بھٹ کے ساتھ دوبارہ شریک ہوئے۔ رنویر سنگھ چھ مرتبہ شو میں آچکے ہیں، جبکہ شاہد کپور سات مرتبہ نظر آئے۔ شاہ رخ خان بھی چار سیزن کے دوران سات مرتبہ شو میں شریک ہوئے۔ تاہم، سب سے زیادہ شرکت کا ریکارڈ کرینہ کپور کے پاس ہے، جو ’’کافی ود کرن‘‘ کے صوفے پر آٹھ مرتبہ بیٹھ چکی ہیں۔

شو میں شاہ رخ خان کا سفر

شاہ رخ خان شو کے آغاز سے ہی ’’کافی ود کرن‘‘ کے مستقل مہمانوں میں شامل رہے ہیں۔ انہوں نے سیزن ۱؍ کی پہلی قسط میں کاجول کے ساتھ شرکت کی۔ اسی سیزن میں وہ بعد میں گوری خان، رتیک روشن اور سوزین روشن کے ساتھ بھی نظر آئے۔ اس کے علاوہ انہوں نے امیتابھ بچن پر مشتمل ایک خصوصی قسط میں بھی شرکت کی۔ سیزن ۲؍ میں سپر اسٹار نے کاجول اور رانی مکھرجی کے ساتھ صوفہ شیئر کیا، جبکہ بعد میں فرح خان اور دپیکا پڈوکون کے ساتھ ایک اور قسط میں شریک ہوئے۔ سیزن ۳؍ کی نویں قسط میں وہ تنہا مہمان بن کر آئے اور پھر سیزن ۵؍ میں عالیہ بھٹ کے ساتھ شو میں واپس آئے۔

یہ بھی پڑھئے: شاہ رخ خان نے ابوظہبی میں موسیقی کے بڑے میلے ’یونیفائیڈ‘ کا اعلان کردیا

مہمانوں کی فہرست کے یہ اعداد و شمار اقربا پروری کے حوالے سے کرن جوہر پر ہونے والی تنقید کے مقابلے میں ایک مختلف پہلو ضرور پیش کرتے ہیں، لیکن اس بحث کو مکمل طور پر ختم نہیں کرتے۔ یہ اعداد و شمار شو کے آٹھ سیزن میں فلمی خاندانوں سے تعلق رکھنے والے اداکاروں اور بیرونی پس منظر سے آنے والی شخصیات کے درمیان توازن کا جائزہ لینے کا ایک ذریعہ ہیں۔ ’’کافی ود کرن‘‘ کی آئندہ اقساط میں ایس ایس راجامولی، شاہ رخ خان، عالیہ بھٹ اور دیگر معروف شخصیات شرکت کریں گی۔