کرینہ کپور خان اور پرتھوی راج سوکمارن کی ’دائرہ‘ کی ۳؍ دن کی کمائی ۵۰ء۴؍ کروڑ۔ کنال کھیمو کی فلم ’وائب‘ نے ۴۵ء۷؍ کروڑ کا کاروبار کیا۔

بالی ووڈ میں ۱۸؍ ستمبر کو ریلیز ہونے والی ۲؍ نئی فلموں کے درمیان باکس آفس مقابلے میں کنال کیمو کی ’وائب‘ نے ابتدائی برتری حاصل کرلی ہے۔ کنال کیمو، پریتی زنٹا اور اسپرش شریواستو کی فلم نے پہلے ۳؍  دن میں ہندوستان میں تقریباً ۴۵ء۷؍ کروڑ نیٹ کمائے، جبکہ میگھنا گلزار کی ہدایت کاری میں بنی کرینہ کپور خان اور پرتھوی راج سوکمارن کی ’دائرہ‘ کی ۳؍ روزہ نیٹ کمائی ۵۰ء۴؍ کروڑ رہی۔ ’وائب‘ نے جمعہ کو ۷۰ء۱؍ کروڑ کے ساتھ شروعات کی۔ سنیچر کو فلم کی کمائی بڑھ کر ۷۵ء۲؍ کروڑ ہوگئی، جبکہ اتوار کو اس نے ۳؍ دن کی سب سے زیادہ یومیہ کمائی کرتے ہوئے ۳؍ کروڑ حاصل کئے۔ اس طرح فلم کا ۳؍ روزہ ہندوستانی نیٹ کلیکشن ۴۵ء۷؍ کروڑ تک پہنچ گیا۔ فلم کی اسکرین قبضے کی شرح بھی جمعہ کے تقریباً ۱۴؍ فیصد سے بڑھ کر سنیچر کو ۲۱؍ فیصد اور اتوار کو ۲۳؍ فیصد تک پہنچی۔

یہ بھی پڑھئے:کرینہ کپور نے فلمی دنیا میں خاتون پولیس افسر کی ’مردانہ‘ شبیہ پر سوال قائم کیا

دوسری جانب ’دائرہ‘ نے پہلے دن تقریباً ایک کروڑ کمائے تھے۔ سنیچر کو فلم کی کمائی بڑھ کر ۷۵ء۱؍ کروڑ ہوئی، لیکن اتوار کو بھی یہ اسی سطح پر رہی۔ یوں فلم نے ۳؍ دن میں ۵۰ء۴؍ کروڑ نیٹ اور تقریباً ۴۰ء۵؍  کروڑ گراس کلیکشن درج کیا۔ اتوار کو فلم کی قبضے کی شرح تقریباً ۲۰؍ فیصد رہی۔ ’وائب‘ کے لیے یہ نتیجہ اس لحاظ سے بھی قابل ذکر ہے کہ یہ کنال کیمو کی بطور ہدایت کار دوسری فلم ہے۔ ان کی پہلی ہدایت کاری ’مڈگاؤں ایکسپریس‘ تھی، جس نے اپنے پہلے ویک اینڈ میں تقریباً ۱۶ء۷؍ کروڑ کمائے تھے۔ موجودہ اعداد کے مطابق ’وائب‘ نے ۳؍  دن میں ہی اپنی پہلی فلم کے اوپننگ ویک اینڈ کلیکشن کو پیچھے چھوڑ دیا ہے۔ ’وائب‘ میں کنال کیمو کے ساتھ پریتی زنٹا، اسپرش شریواستو اور وانشیکا دھیر اہم کرداروں میں ہیں۔ فلم کی کہانی ۲؍ دوستوں کے گرد گھومتی ہے، جن کی معمول کی زندگی اچانک ایک غیر متوقع اور خطرناک مہم میں بدل جاتی ہے۔ کنال کیمو نے فلم کی ہدایت کاری کے ساتھ اسے لکھا بھی ہے۔

یہ بھی پڑھئے:کرینہ کپور نے بے باک اداکاری سے فلموں میں شہرت حاصل کی

’دائرہ‘ ایک تحقیقاتی کرائم تھریلر ہے، جس میں کرینہ کپور خان اور پرتھوی راج سوکمارن مرکزی کردار ادا کر رہے ہیں۔ میگھنا گلزار کی ہدایت کاری میں بنی یہ فلم ایک ایسے حساس معاملے کی تفتیش کے پس منظر میں آگے بڑھتی ہے جہاں نظام، جواب دہی اور انصاف کے مختلف پہلو سامنے آتے ہیں۔ دونوں فلموں کو ناقدین سے مجموعی طور پر مثبت ردعمل ملا، تاہم ابتدائی دنوں میں ناظرین کی تعداد توقع کے مطابق نہیں رہی۔ ’وائب‘ نے ہفتے اور اتوار کو اپنی کمائی میں مسلسل اضافہ کیا، جبکہ ’دائرہ‘ کی ہفتہ کے بعد اتوار کو کمائی میں مزید اضافہ نہیں ہوا۔ اس مقابلے میں ایک اور اہم بات یہ ہے کہ دونوں فلمیں ایسے وقت میں سنیما گھروں میں پہنچی ہیں جب ’ہنومان انش‘ اور ’مرزاپور: دی مووی‘ پہلے سے ناظرین کی بڑی تعداد اپنی جانب متوجہ کر رہی ہیں۔ ’ہنومان انش‘ نے اپنے ۷؍ ویں ویک اینڈ پر ہی ۵۰ء۲۸؍  کروڑ کا کاروبار کیا، جس سے نئی ریلیز ہونے والی فلموں کے لیے مقابلہ مزید سخت ہوگیا ہے۔