بالی ووڈ کی معروف اور تجربہ کار اداکارہ منیشا کوئرالا نے ہالی ووڈکی جانب ایک اور قدم بڑھا دیا ہے۔ اداکارہ آئندہ امریکی انڈی فلم ’کاؤ گرلز اینڈ انڈینس‘‘ میں مرکزی کردار ادا کریں گی، جس کی شوٹنگ رواں سال نومبر میں آسٹن، ٹیکساس اور اس کے آس پاس کے علاقوں میں شروع ہونے والی ہے۔

بالی ووڈ کی معروف اور تجربہ کار اداکارہ منیشا کوئرالا  نے ہالی ووڈکی جانب ایک اور قدم بڑھا دیا ہے۔ اداکارہ آئندہ امریکی انڈی فلم ’کاؤ گرلز اینڈ انڈینس‘‘ میں مرکزی کردار ادا کریں گی، جس کی شوٹنگ رواں سال نومبر میں آسٹن، ٹیکساس اور اس کے آس پاس کے علاقوں میں شروع ہونے والی ہے۔ فلم کو پہلے ’’کاؤ بوائز اینڈ انڈینس‘‘  کے نام سے جانا جاتا تھا۔ ’’کاؤ گرلز اینڈ انڈینس‘‘  ایک درمیانی عمر کی ہندوستان خاتون  آشا  کی کہانی ہے، جو امریکی جنوب مغرب  کے ماحول میں اپنی شناخت، تعلق اور زندگی کے نئے پہلوؤں کو سمجھنے کی کوشش کرتی ہے۔ فلم میں ثقافتی نقل مکانی، شناخت، دوستی اور خود کو دوبارہ دریافت کرنے جیسے موضوعات کو نمایاں کیا گیا ہے۔  فلم کی کہانی میں ہندوستانی ثقافت اور ٹیکساس کی امریکی زندگی کا دلچسپ امتزاج دیکھنے کو ملے گا، جس میں ایک ہندوستانی خاتون کو نئے ماحول اور غیر متوقع دوستیوں کے درمیان اپنی زندگی کا نیا راستہ تلاش کرتے ہوئے دکھایا جائے گا۔

یہ بھی پڑھئے:انشومن جھا اور رگھوبیر یادو کی فلم ’’اوم کا ہری‘‘۱۸؍ ستمبر کو ریلیز ہوگی

منیشا کوئرالا نے اس فلم کے بارے میں بات چیت کرتے ہوئے کہا کہ ایک مخصوص عمر کی خواتین کے لیے مضبوط کردار اب بھی کم لکھے جاتے ہیں، اگرچہ صورتحال آہستہ آہستہ تبدیل ہو رہی ہے۔ ان کے مطابق جب انہیں ’’کاؤ گرلز اینڈ انڈینس‘‘کی کہانی سنائی گئی اور انہوں نے ہدایت کار  تیجل دیسائی سے ملاقات کی تو انہیں محسوس ہوا کہ اس کہانی میں مختلف ثقافتوں اور سرحدوں کو جوڑنے کی بھرپور صلاحیت موجود ہے۔ 
اداکارہ نے اس منصوبے کے حوالے سے ٹیکساس کے ماحول میں گھوڑے پر سوار ہو کر شوٹنگ کرنے اور وہاں اپنی ’’چائے‘‘ سے لطف اندوز ہونے کا بھی دلچسپ انداز میں ذکر کیا۔ اسی وجہ سے فلم کے حوالے سے ’’چائے اِن ٹیکساس‘‘ کی سرخی بھی توجہ حاصل کر رہی ہے۔ فلم کو تیجل دیسائی نے لکھا اور ہدایتکاری کی ہے۔ وہ نکول فیلو بھی رہ چکی ہیں۔’’کاؤ گرلز اینڈ انڈینس‘‘ دراصل ان کی ایوارڈ یافتہ مختصر فلم’’کاؤبوائز اور ہندوز‘‘ کے تصور کو ایک مکمل فیچر فلم میں وسعت دینے کا منصوبہ ہے۔ فلم کی پروڈیوسرکرتانا بنسکوٹا ہیں۔  ہدایت کار تیجل دیسائی نے منیشا کوئرالا کے انتخاب کی وجہ بیان کرتے ہوئے کہا کہ اداکارہ کی پرفارمنس میں حقیقت پسندی، حساسیت اور مضبوطی کا خاص امتزاج ہے۔ ان کے مطابق ’’آشا‘‘ کے کردار کے لیے ایسی اداکارہ درکار تھی جو کردار کے جذبات اور زندگی کے تجربات کو اپنی اداکاری کے ذریعے مؤثر انداز میں پیش کرسکے۔ 

یہ بھی پڑھئے:مراد آباد: سرکٹ ہاؤس کے احاطہ میں نماز پڑھنے پر ایس پی کے لیڈر پر ایف آئی آر

منیشا کوئرالا نے اپنے کئی دہائیوں پر محیط کریئر میں ہندی سنیما کی متعدد یادگار فلموں میں کام کیا ہے اور اب وہ عالمی سطح پر بھی اپنی اداکاری کا دائرہ وسیع کر رہی ہیں۔ ان کی حالیہ نمایاں اسکرین پرفارمنس  سنجے لیلا بھنسالی کی نیٹ فلکس سیریز ’’ہیرا منڈی ‘‘میں دیکھی گئی تھی۔’’کاؤ گرلز اینڈ انڈینس‘‘ ان کے لیے اس لحاظ سے بھی اہم منصوبہ ہے کہ فلم کا مرکزی کردار ایک جنوبی ایشیائی خاتون کی شناخت اور جذباتی سفر کے گرد گھومتا ہے۔ اس طرح فلم میں ہندوستانی پس منظر رکھنے والی اداکارہ کو امریکی انڈی سنیما کے ایک منفرد ماحول میں مرکزی کردار ادا کرنے کا موقع مل رہا ہے۔
رپورٹس کے مطابق فلم کی پروڈکشن  نومبر ۲۰۲۶ء میں آسٹن، ٹیکساس اور قریبی مقامات پر شروع ہوگی۔ فلم کے پلاٹ اور دیگر کاسٹ سے متعلق تفصیلات فی الحال محدود ہیں، تاہم منیشا کوئرالا کی شمولیت نے اس منصوبے کو خاصی توجہ دلا دی ہے۔ یہ فلم منیشا کوئرالا کے کریئر میں ایک اور بین الاقوامی باب کا اضافہ کرے گی اور ہندوستانی سنیما کے ایک معروف چہرے کو امریکی انڈی فلم کے منفرد ماحول میں دیکھنے کا موقع فراہم کرے گی۔