فلمی نمائشوں سے لے کر فوٹو ایگزیبیشنز تک، ہالی ووڈ اس مشہور فلمی آئیکون مارلن منرو کے ۱۰۰؍ ویں پیدائش کی سالگرہ منانے کے لیے شاندار تقریبات کا منصوبہ بنارہا ہے۔

مارلن منرو کے آبائی شہر ہالی ووڈ میں پیر کے روز خصوصی تقریبات کا آغاز ہو رہا ہے، جو اس فلمی ستارے کی ۱۰۰؍ ویں سالگرہ کی یاد میں منعقد کی جا رہی ہیں۔ تاریخی چائنیز تھیٹر میں، جہاں منرو کے ہاتھوں کے نشانات امر کر دیے گئے ہیں اور جہاں ۱۹۵۳ء کی فلم ’’جینٹلمین پریفر بلونڈیس‘‘ کی شریک اداکارہ جین رسل کی نشانی بھی موجود ہیں، مداح ’’یپی برتھ ڈے‘‘ گانے کا منصوبہ بنا رہے ہیں۔ یہ اسی مشہور دلکش انداز کی یاد میں ہے جس سے انہوں نے صدر جان ایف کینیڈی کے لیے گایا تھا۔

یہ بھی پڑھئے:مادھوری دکشت نےکانز میں ایشوریہ رائے کے لُک کی حمایت کی

اس مقام پر ایک سو گلاب اور ایک کیک رکھا جائے گا، جو ہالی ووڈ کے سنہری دور کی علامت ہے اور ایک مقبول سیاحتی مقام بھی ہے۔ہالی ووڈ کی اس مشہور بیٹی کو خراجِ عقیدت پیش کرنے کا سلسلہ اتوار سے شروع ہو چکا ہے، جب اکیڈمی میوزیم میں’’مارلن منرو :ہالی ووڈ آئیکون‘‘ کے عنوان سے ایک نمائش کا آغاز ہوا، جو ان کے فلمی کریئر اور مختصر زندگی کو خراجِ عقیدت پیش کرتی ہے۔۱۹۵۰ءکی دہائی میں شہرت کی بلندیوں پر پہنچنے کے بعد یہ اداکارہ اور ماڈل اگست ۱۹۶۲ء میں اپنے برینٹ ووڈ کے گھر میں منشیات کی زیادتی کے باعث ۳۶؍ سال کی عمر میں وفات پا گئیں۔ اکیڈمی میوزیم پورے مہینے ان کی فلموں کی خصوصی نمائش بھی کرے گا ۔ یہ نمائش، جو فروری ۲۰۲۷ء تک جاری رہے گی، سیکڑوں اصل اشیاء پر مشتمل ہے جن میں سے کچھ بہت کم دکھائی جاتی  ہیںجیسے وہ مشہور گلابی لباس جو انہوں نے’’جینٹلمین پریفر بلونڈیس‘‘  میں ایک  پرفارمنس کے دوران پہنا تھا۔
اسی ہفتے کے آخر میں، ۴؍ جون کو جولینز آکشن  مارلن منرو سے متعلق تقریباً ۲۰۰؍ اشیاء نیلام کرے گا، جو’’۱۰۰؍ایئرس آف مارلن “کی خصوصی فروخت کا حصہ ہوں گی۔ان اشیاء میں غیر شائع شدہ تصاویر، ان کی آخری فلم کی پروڈکشن کے نوٹس کے ساتھ اسکرپٹ، نامکمل مختصر فلم’’سمتھنگز گاٹ ٹو گیو‘‘ اور ان کی ذاتی اشیاء جیسے ہاتھ سے لکھی ہوئی ترکیبیں اور ایلزبتھ آرڈن کی لپ اسٹک شامل ہیں۔

یہ بھی پڑھئے:بوبی دیول نے عالیہ بھٹ کے ساتھ اختلافات کی افواہوں پر خاموشی توڑ دی

 یکم جون ۱۹۲۶ء کو لاس اینجلس میں پیدا ہونے والی منرو کا بچپن غیر مستحکم رہا، جو یتیم خانوں اور فوسٹر گھروں میں گزرا۔ انہوں نے ۱۶؍ سال کی عمر میں پہلی شادی کی۔ ۱۹۴۴ء میں ان کا شوبز سے پہلا تعلق اس وقت ہوا جب وہ ایک فیکٹری میں کام کر رہی تھیں اور ایک فوٹوگرافر دوسری جنگِ عظیم کے دوران پروڈکشن لائنز پر کام کرنے والی خواتین کی تصاویر لینے آیا۔ اس کے بعد وہ ماڈلنگ کی دنیا میں داخل ہو گئیں، اپنے شوہر سے طلاق لے لی اور ایک تاریخی فیصلہ کیا، اپنے بھورے بالوں کو پلاٹینم سنہرے رنگ میں رنگ لیا۔ انہوں نے فاکس کے ساتھ اپنا پہلا معاہدہ کیا  اور۳۰؍ سال کی عمر تک وہ ایک عالمی اسٹار بن چکی تھیں۔ پردے کے پیچھے، منرو نے اپنی پروڈکشن کمپنی قائم کی، نیویارک کے مشہور اَکٹرز اسٹوڈیو میں تعلیم حاصل کی، اور اسٹوڈیوز کے خلاف بھی آواز اٹھائی۔