دشانی چکرورتی فلم ’دی گیسٹ ‘ میں نظر آئیں گی، ۲؍ اشتہاری فلمیں بھی کرچکی ہیں

 بالی ووڈ اداکار متھن چکرورتی کی بیٹی دشانی چکرورتی ہالی ووڈ کی مختصر فلم ’دی گیسٹ‘ سے اپنی اداکاری کا آغاز کر رہی ہیں۔
   فلم ’’دی گیسٹ‘‘ نے کئی بین الاقوامی فلمی پروگراموں میں پزیرائی حاصل کی ہے۔ دشانی نے فلم سازی کے کرتب سیکھنے کیلئے ایک طویل وقت لاس اینجلس میں گزارا ہے۔دشانی چکرورتی  نے بطور اداکارہ اپنا کیریئر شروع کرنے سے پہلے ممبئی کے جیف گولڈ برگ اسٹوڈیوز اور پھر نیویارک فلم اکیڈمی میں اداکاری اور فلم سازی کی تربیت حاصل کی ہے۔ انہیں دو اشتہاری فلموں میں بھی  کام کرنے کا موقع  مل چکا  ہے۔   دشانی چکرورتی کے مطابق’’لاس اینجلس میں اپنے کیریئر کو شروع کرنے کیلئے غیر روایتی راستے کا انتخاب کرنا  آسان نہیں تھا لیکن مجھے ان کہانیوں اور کرداروں کیلئے اتنا جنون ہے کہ میں ہر اچھا کردار  ادا کرنا چاہتی ہوں۔ میں اپنے والد سے بہت کچھ سیکھ کر بڑی  ہوئی  ہوں اور مجھے امید ہے کہ  اپنے کام  سے اس کی عکاسی کر سکوں گی۔‘‘