فوربس کی ریئل ٹائم ارب پتیوں کی فہرست کے مطابق مکیش امبانی کی مجموعی دولت بڑھ کر تقریباً ۸۸ء۸؍ ارب ڈالر ہوگئی۔ ان کی دولت میں یہ اضافہ ریلائنس انڈسٹریز کے حصص میں تقریباً ۱۲ ؍فیصد کی زبردست تیزی کے نتیجے میں ہوا، جس سے ایک ہی کاروباری دن میں ان کی دولت میں اندازاً ۸ء۵ ارب ڈالر کا اضافہ ہوگیا۔

ریلائنس انڈسٹریز کے چیئرمین اور معروف صنعت کار مکیش امبانی کی دولت میں پیر کے روز غیر معمولی اضافہ درج کیا گیا، جس کے بعد انہوں نے ایک بار پھر ایشیا کے امیر ترین شخص کا اعزاز حاصل کرلیا۔ فوربس کی ریئل ٹائم ارب پتیوں کی فہرست کے مطابق مکیش امبانی کی مجموعی دولت بڑھ کر تقریباً ۸۸ء۸ ؍ارب ڈالر ہوگئی۔ ان کی دولت میں یہ اضافہ ریلائنس انڈسٹریز کے حصص میں تقریباً ۱۲ ؍فیصد کی زبردست تیزی کے نتیجے میں ہوا، جس سے ایک ہی کاروباری دن میں ان کی دولت میں اندازاً ۸ء۵ ؍ارب ڈالر کا اضافہ ہوگیا۔ اس اضافے کے ساتھ انہوں نے چین کی معروف ٹیکنالوجی کمپنی بائٹ ڈانس (ByteDance) کے بانی ژانگ یِی منگ کو پیچھے چھوڑ دیا، جن کی دولت تقریباً ۸۴ ؍ارب ڈالر بتائی گئی ہے۔ 
مکیش امبانی کی دولت میں اس غیر معمولی اضافے کی بنیادی وجہ ریلائنس انڈسٹریز کے حصص میں آنے والی تیزی ہے۔ پیر کو کمپنی کے حصص تقریباً ۱۱ء۶۴ ؍فیصد اضافے کے ساتھ  ۱۲۹۹؍ روپے پر بند ہوئے، جو گزشتہ چھ برس سے زیادہ عرصے میں کمپنی کی بہترین کاروباری کارکردگی میں سے ایک ہے۔ اس تیزی کے نتیجے میں ریلائنس انڈسٹریز کی مارکیٹ ویلیو میں ۱۹؍ ارب ڈالر سے زیادہ کا اضافہ ہوا۔ کمپنی کے حصص میں یہ اضافہ سہ ماہی مالی نتائج توقعات سے بہتر رہنے کے بعد دیکھنے میں آیا۔ 

یہ بھی پڑھئے:سچترا سین ان معنوں میں خود کو خوش نصیب سمجھتی تھیں کہ ان کی پہلی ہندی فلم دلیپ کمار کےساتھ تھی

ریلائنس انڈسٹریز نے جولائی سے ستمبر ۲۰۲۶ء کی سہ ماہی میں شاندار مالی کارکردگی کا مظاہرہ کیا۔ کمپنی کی مجموعی آمدنی سالانہ بنیاد پر ۲۸؍ فیصد اضافے کے ساتھ ریکارڈ ۳ء۶۲ ؍لاکھ کروڑ روپے تک پہنچ گئی، جبکہ ایبٹڈا (EBITDA) میں ۲۴ ؍فیصد اضافہ درج کیا گیا اور یہ ۴۰۹۶۲ کروڑ روپے ہوگیا۔ کمپنی کا خالص منافع بھی ۳۴ ؍فیصد اضافے کے ساتھ ۲۹,۵۵۰ کروڑ روپے تک پہنچ گیا۔ تیل، کیمیکل، ٹیلی کام اور ڈجیٹل خدمات کے کاروبار میں بہتری نے ان نتائج میں اہم کردار ادا کیا۔ 
ریلائنس کے آئل ٹو کیمیکلز (O2C) کاروبار نے سہ ماہی کے دوران نمایاں ترقی کی۔ ریفائننگ مارجن میں بہتری، خام تیل کی زیادہ پروسیسنگ اور پیٹرو کیمیکل کاروبار کی کارکردگی نے کمپنی کے منافع کو سہارا دیا۔ دوسری جانب ریلائنس کے ٹیلی کام کاروبار جیو پلیٹ فارمز نے بھی صارفین میں اضافے اور منافع میں بہتری کے ذریعے کمپنی کی مالی کارکردگی کو مضبوط کیا۔ اس کے علاوہ جیو پلیٹ فارمز کی حالیہ اسٹاک مارکیٹ میں لسٹنگ کے دوران حصص میں تقریباً ۲۷ فیصد اضافے نے بھی سرمایہ کاروں کی توجہ ریلائنس گروپ کی جانب مبذول کرائی تھی۔ 

یہ بھی پڑھئے:ٹرمپ کی مداخلت پر بھی آئزن کوٹ نیتن یاہو کے اتحادی نہیں بنیں گے: رپورٹ

فوربس کی ریئل ٹائم ارب پتیوں کی فہرست کے مطابق مکیش امبانی تقریباً ۸۸ء۸ ارب ڈالر کی دولت کے ساتھ دنیا کے امیر ترین افراد میں ۲۳؍ویں مقام پر پہنچ گئے، جبکہ بائٹ ڈانس کے بانی ژانگ یِی منگ تقریباً ۸۴ ؍ارب ڈالر کی دولت کے ساتھ ان سے پیچھے ہوگئے۔ اس طرح ریلائنس کے حصص میں تیزی نے نہ صرف مکیش امبانی کو ایشیا کا امیر ترین شخص بنایا بلکہ عالمی ارب پتیوں کی درجہ بندی میں بھی ان کی پوزیشن بہتر کردی۔  واضح رہے کہ دولت میں ۸ء۵ ؍ارب ڈالر کا اضافہ حصص کی قیمتوں اور سرمایہ کاری کی مارکیٹ ویلیو میں اضافے کی بنیاد پر لگایا گیا تخمینہ ہے، یہ رقم براہ راست نقد آمدنی نہیں ہے۔ اسٹاک مارکیٹ میں حصص کی قیمتوں میں اتار چڑھاؤ کے ساتھ مکیش امبانی کی مجموعی دولت اور ارب پتیوں کی فہرست میں ان کی پوزیشن بھی تبدیل ہوسکتی ہے۔