ہالی ووڈ کی معروف اداکارہ پینیلوپ کروز اور ان کے شوہر و اداکار جیویر بارڈیم کی نئی فلم ’’بَنکر‘‘ نے ۸۳؍ویں وینس انٹرنیشنل فلم فیسٹیول میں شاندار پذیرائی حاصل کی، جہاں فلم کے پریمیئر کے بعد ناظرین نے تقریباً ۱۵؍ منٹ اور ۳۰؍ سیکنڈ تک کھڑے ہوکر تالیاں بجائیں۔

ہالی ووڈ کی معروف اداکارہ  پینیلوپ کروز  اور ان کے شوہر و اداکار  جیویر بارڈیم کی نئی فلم   ’’بَنکر‘‘ نے ۸۳؍ویں وینس انٹرنیشنل فلم فیسٹیول میں شاندار پذیرائی حاصل کی، جہاں فلم کے پریمیئر کے بعد ناظرین نے تقریباً  ۱۵؍ منٹ اور ۳۰؍ سیکنڈ  تک کھڑے ہوکر تالیاں بجائیں۔ یہ ۲۰۲۶ء کے فیسٹیول میں اب تک فلم کو ملنے والی سب سے طویل اور پُرجوش پزیرائی قرار دی جارہی ہے۔ 

یہ بھی پڑھئے:لیہ پولٹن انگلینڈ ویمنز کی نئی منیجنگ ڈائریکٹر مقرر

فلم کے اختتام پر پینیلوپ کروز جذبات پر قابو نہ رکھ سکیں اور ان کی آنکھوں میں آنسو آگئے۔ انہوں نے اپنے شوہر اور فلم میں شریک اداکار جیویر بارڈیم کو بوسہ دیا اور سامعین کی جانب سے جاری زبردست  تالیوںکے دوران ان کا شکریہ ادا کیا۔ کروز کو بعد میں مداحوں سے ہاتھ ملاتے اور ’’تھینک یو‘‘ کہتے ہوئے بھی دیکھا گیا۔ ’’بَنکر‘‘کی کہانی ایک شادی شدہ جوڑے کے گرد گھومتی ہے۔ جیویر بارڈیم نے  میگوئل  نامی ایک معروف معمار کا کردار ادا کیا ہے، جسے ایک ٹیک ارب پتی کے لیے ایک پرتعیش زیرِ زمین بنکر تعمیر کرنے کا کام ملتا ہے۔ یہ منصوبہ نہ صرف اس کے پیشہ ورانہ اور اخلاقی نظریات کو چیلنج کرتا ہے بلکہ اس کی تقریباً ۱۷؍ سالہ ازدواجی زندگی میں بھی دراڑیں پیدا کرنے لگتا ہے۔ پینیلوپ کروز نے میگوئل کی اہلیہ  صوفیہ  کا کردار ادا کیا ہے۔ 

“Bunker” di Florian Zeller, con Penélope Cruz e Javier Bardem, ha ricevuto una standing ovation di 15,5 minuti all’83. Mostra del Cinema di Venezia. La più lunga al momento di questa edizione del festival. #Venezia83 pic.twitter.com/Tsu22K6Hj7

— RB Casting (@RBcasting) September 9, 2026

فلم کی ہدایت کاری آسکر ایوارڈ یافتہ فرانسیسی فلم ساز  فلوریان زیلر  نے کی ہے، جن کی سابقہ فلموں ’’دی فادر‘‘ اور ’’دی سَن‘‘کو بھی خاصی توجہ حاصل ہوئی تھی۔ ’’بَنکر‘‘ ان کے ان فلمی منصوبوں سے مختلف ہے جو پہلے اسٹیج ڈراموں سے سنیما میں منتقل ہوئے؛ یہ ان کی براہِ راست سنیما کے لیے لکھی اور بنائی گئی کہانی ہے۔ زیلر نے اسکرپٹ کروز اور بارڈیم کو ذہن میں رکھ کر لکھا تھا۔ فلم میں  پال ڈینو، اسٹیفن گراہم اور پیٹرک شوارزنیگر  سمیت دیگر اداکار بھی اہم کرداروں میں شامل ہیں۔ ’’بَنکر‘‘ میں انگریزی اور ہسپانوی دونوں زبانوں کا استعمال کیا گیا ہے اور فلم کو وینس فلم فیسٹیول کے  مسابقتی سیکشن  میں شامل کیا گیا ہے، جہاں یہ گولڈن لائن (Golden Lion) کے لیے مقابلہ کر رہی ہے۔ 
فلم کا مرکزی موضوع صرف ازدواجی تعلقات تک محدود نہیں بلکہ یہ  دولت، سماجی عدم مساوات، تنہائی، طاقت، ماحولیاتی خدشات اور معاشرے کے ممکنہ انہدام  جیسے عصری مسائل کو بھی اجاگر کرتی ہے۔ کہانی میں ایک ایسے ٹیک ارب پتی کا تصور پیش کیا گیا ہے جو دنیا کو ڈجیٹل طور پر جوڑنے والی صنعت سے دولت کماتا ہے، لیکن خود ممکنہ عالمی تباہی سے بچنے کے لیے معاشرے سے الگ ایک محفوظ بنکر تعمیر کروانا چاہتا ہے۔  

یہ بھی پڑھئے:فلم ’’گوڈزیلا مانئس زیرو‘‘ کا نیا ٹریلر جاری، نومبر میں ’’رامائن‘‘سے بڑا مقابلہ ہوگا

وینس میں فلم کو اگرچہ زبردست عوامی پزیرائی ملی، تاہم ناقدین کا ردعمل یکساں نہیں رہا۔ بعض جائزوں میں کروز اور بارڈیم کی اداکاری اور باہمی کیمسٹری کو سراہا گیا، جبکہ کچھ ناقدین نے فلم کی کہانی اور اس کے سماجی و سیاسی موضوعات کو غیر مؤثر اور سطحی قرار دیا۔  پینیلوپ کروز اور جیویر بارڈیم حقیقی زندگی میں بھی شادی شدہ ہیں اور دونوں نے اس سے قبل متعدد فلموں میں ایک ساتھ کام کیا ہے۔ ’’بَنکر‘‘ میں دوبارہ ایک شادی شدہ جوڑے کا کردار ادا کرنا فلم کی خاص کشش بن گیا ہے، تاہم دونوں اداکاروں نے وینس میں واضح کیا کہ وہ اپنی حقیقی ازدواجی زندگی اور فلم کے کرداروں کے درمیان واضح فرق برقرار رکھتے ہیں۔  ’’بَنکر‘‘ کی وینس میں شاندار پذیرائی نے اسے فیسٹیول کی نمایاں فلموں میں شامل کر دیا ہے۔ فلم کی اگلی نمائش  ٹورنٹو انٹرنیشنل فلم فیسٹیول  میں متوقع ہے جبکہ سرچ لائٹ پکچرس  اسے ۲۰۲۷ء کے اوائل میں سنیما گھروں میں ریلیز کرے گا۔