۲۰۲۴ء میں کنال کھیمو نے ’’مڈگاؤں ایکسپریس‘‘ کے ذریعے بطور ہدایت کار شروعات کی تھی، جسے ناقدین اور ناظرین دونوں کی جانب سے مثبت ردعمل ملا تھا۔ اب تقریباً دو سال بعد کنال کھیمو ایک نئی فلم ’’وائب‘‘ کے ساتھ واپسی کر رہے ہیں، جس میں وہ صرف ہدایت کاری ہی نہیں بلکہ اداکاری، تحریر اور پروڈکشن کی ذمہ داریاں بھی سنبھال رہے ہیں۔

’’وائب‘‘ کا پہلا پوسٹر جاری کر دیا گیا ہے، جس میں چاروں مرکزی کردار ایک ٹیرس پر کھڑے دکھائی دیتے ہیں جبکہ پس منظر میں نیون لائٹس سے جگمگاتا ہوا VIBE کا بورڈ نظر آ رہا ہے۔ پوسٹر کے انداز سے واضح اشارہ ملتا ہے کہ فلم جدید شہری ماحول، دوستی، مزاح اور افراتفری سے بھرپور ایڈونچر پر مبنی ہوگی۔ امیزون ایم جی ایم اسٹوڈیوز نے پوسٹر شیئر کرتے ہوئے لکھا کہ ’’VIBE کے ساتھ پنچ اور پنچ لائن دونوں کی گارنٹی‘‘، جس کے بعد فلم سوشل میڈیا پر تیزی سے موضوعِ بحث بن گئی۔

یہ بھی پڑھئے : اب عالیہ بھٹ اور شرواری واگھ کی ’’الفا‘‘ کے لیے طویل انتظارکرنا ہوگا

فلم کا سب سے اہم حصہ پریتی زنٹا کی واپسی بھی ہے کیونکہ وہ تقریباً آٹھ برس بعد کسی بڑی ہندی فلم میں نظر آئیں گی۔ اس سے قبل ان کی واپسی کی خبریں ’’لاہور ۱۹۴۷ء‘‘ کے حوالے سے بھی سامنے آئی تھیں، تاہم ’’وائب‘‘ کے اعلان نے مداحوں کے جوش میں مزید اضافہ کر دیا ہے۔ سوشل میڈیا پر کئی صارفین نے پریتی زنٹا کی واپسی کو ’’نوستالجک لمحہ‘‘ قرار دیا جبکہ کچھ مداحوں نے کنال کھیمو کی ہدایت کاری پر اعتماد ظاہر کرتے ہوئے کہا کہ ’’مڈگاؤں ایکسپریس‘‘ کے بعد وہ ایک اور ’’سلیپر ہٹ‘‘ دے سکتے ہیں۔

یہ بھی پڑھئے : نیتو کپور کی واپسی سے خود کو جوڑ پاتی ہوں، خواتین کو ایسی ہمت ملنی چاہیے: روبینہ دلائک

 فلم کا آفیشل خلاصہ بتاتا ہے کہ ’’وائب‘‘ دو قریبی دوستوں کی کہانی ہے جن کی عام اور بے ترتیب زندگی اچانک ایک خطرناک اور تیز رفتار مہم جوئی میں بدل جاتی ہے۔ اس سفر کے دوران نہ صرف ان کی بقا بلکہ ان کی دوستی بھی آزمائش سے گزرتی ہے۔ فلم کو ایک ہائی انرجی کامیڈی-ایڈونچر کے طور پر پیش کیا جا رہا ہے، جس میں جذبات، مزاح اور سنسنی کو یکجا کرنے کی کوشش کی گئی ہے۔ کنال کھیمو کی پہلی ہدایت کاری والی فلم ’’مڈگاؤں ایکسپریس‘‘ نے ریلیز کے وقت غیر متوقع طور پر مثبت بز پیدا کیا تھا۔ اویناش تیواری، دیویندو اور پرتیک گاندھی پر مشتمل اس فلم نے تقریباً ۹۸ء۴۸؍ کروڑ روپے کی کمائی کی تھی اور اسے باکس آفس پر سلیپر ہٹ قرار دیا گیا تھا۔ اسی کامیابی کے بعد اب وائب سے بھی انڈسٹری کو کافی امیدیں وابستہ ہیں۔

 

 

 

 

 

View this post on Instagram

 

 

 

 

 

 

 

 

 

 

 

A post shared by Amazon MGM Studios India (@amazonmgmstudiosin)

’’وائب‘‘ ۱۸؍ ستمبر ۲۰۲۶ء کو ریلیز ہوگی اور دلچسپ بات یہ ہے کہ یہ آیوشمان کھرانہ اور سارہ علی خان کی فلم ’’اڑتا تیر‘‘ کے صرف ایک ہفتے بعد سنیما گھروں میں آئے گی، جس کی ہدایت کاری آکاش کوشک کر رہے ہیں جبکہ اسے کرن جوہر پروڈیوس کر رہے ہیں۔ فلمی تجزیہ کاروں کے مطابق ستمبر ۲۰۲۶ء باکس آفس کے لیے ایک بڑا مقابلہ ثابت ہو سکتا ہے، جہاں کامیڈی اور نوجوان ناظرین کو ہدف بنانے والی فلمیں آمنے سامنے ہوں گی۔