ایس ایس راجامولی نے بتایا کہ مہیش بابو شوٹنگ کے دوران اپنا موبائل فون کار میں ہی چھوڑ دیتے ہیں، تاکہ ان کی پوری توجہ صرف اپنے کام پر رہے۔

فلم ڈائریکٹر ایس ایس راجامولی نے اداکار مہیش بابو کے نظم و ضبط اور کام کے تئیں ان کی لگن کی جم کر تعریف کی ہے۔ ایس ایس راجامولی نے بتایا کہ مہیش بابو شوٹنگ کے دوران اپنا موبائل فون کار میں ہی چھوڑ دیتے ہیں، تاکہ ان کی پوری توجہ صرف اپنے کام پر رہے۔

یہ بھی پڑھئے:کنگنا رناوت جنتا کی آوازکی حیثیت سے ’’ لاک اپ ۲‘‘میں واپسی کریں گی

راجامولی نے اپنی آنے والی فلم ’’وارانسی‘‘ کی شوٹنگ کے تجربات شیئر کرتے ہوئے کہا کہ وہ طویل عرصے سے مہیش بابو کی اداکاری کے مداح رہے ہیں اور ان کی صلاحیتوں سے پہلے ہی واقف تھے  تاہم، اس بار وہ سب سے زیادہ مہیش بابو کے پیشہ ورانہ رویے اور سیٹ پر ان کی غیر متزلزل توجہ کو دیکھ کر متاثر ہوئے۔
انہوں نے بتایا کہ مہیش بابو سیٹ پر کبھی موبائل فون کا استعمال نہیں کرتے۔ وہ شوٹنگ کی جگہ پر پہنچنے سے پہلے اپنا فون کار میں چھوڑ دیتے ہیں اور کام ختم ہونے کے بعد ہی اسے دیکھتے ہیں۔ راجامولی کے مطابق، وقفے کے دوران بھی مہیش فون میں مصروف رہنے کے بجائے خاموشی سے بیٹھ کر آس پاس ہونے والی سرگرمیوں کا مشاہدہ کرتے رہتے ہیں۔ راجامولی نے کہا کہ مہیش بابو کی یہ عادت انہیں ذاتی طور پر بھی متاثر کرتی ہے اور اب وہ بھی اپنے خاندان کے ساتھ وقت گزارتے ہوئے موبائل فون سے دوری بنانے کی کوشش کرتے ہیں۔
قابلِ ذکر ہے کہ راجامولی کی انتہائی منتظر فلم ’’وارانسی‘‘ میں مہیش بابو کے ساتھ پرینکا چوپڑا جونس اور پرتھوی راج سوکومارن بھی اہم کرداروں میں نظر آئیں گے۔ فلم کو۷؍ اپریل ۲۰۲۷ء کو دنیا بھر کے سنیما گھروں میں ریلیز کرنے کا منصوبہ ہے۔
جیا پردا، مہیش مانجریکر اور زرینہ وہاب کی فلم ’’جے ہند جے سندھ‘‘  کا پہلا پوسٹر جاری
ہندوستان اور پاکستان تقسیم کے پس منظر پر مبنی تاریخی ڈرامہ فلم ’’جے ہند جے سندھ‘‘ کا پہلا پوسٹر جاری کر دیا گیا ہے۔ اس فلم کی ہدایت کاری اندرجیت لنکیش نے کی ہے جبکہ جیا پردا، زرینہ وہاب اور مہیش مانجریکر مرکزی کرداروں میں نظر آئیں گے۔

یہ بھی پڑھئے:میدان میں شکست، دلوں میں فتح:ایکواڈور کے کوچ کا جذباتی لیکن باوقار استعفیٰ

جاری کیے گئے پوسٹر میں ۱۹۴۷ء کی تقسیمِ ہند کی جھلک پیش کی گئی ہے۔ فلم میں تقسیم کے المیے کے ساتھ محبت، وطن پرستی اور اپنی شناخت کے لیے جدوجہد کی کہانی کو بھی نمایاں انداز میں پیش کیا گیا ہے۔ فلم میں وکرم کوچر، اُپاسنا سنگھ، امیت بہل، چھایا قدم اور راہل دیو بھی اہم کردار ادا کر رہے ہیں۔ اس فلم کو سیمیز انٹرٹینمنٹ کے بینر تلے سیمی نانوانی نے پروڈیوس کیا ہے۔’’جے ہند جے سندھ ‘‘  اکتوبر ۲۰۲۶ء میں سنیما گھروں میں ریلیز ہوگی، تاہم اس کی حتمی ریلیز کی تاریخ کا ابھی اعلان نہیں کیا گیا ہے۔