اداکار اور سیاستداں روی کشن، کارتک آرین کی آنے والی فلم ’’ناگ زیلا‘‘ کی کاسٹ میں شامل ہو گئے ہیں۔ رپورٹس کے مطابق وہ فلم میں منفی کردار ادا کریں گے۔ اگرچہ باضابطہ اعلان تاحال نہیں ہوا، مگر فلم میں کارتک آرین اور روی کشن کے درمیان مضبوط مناظر کی توقع کی جا رہی ہے۔ فلم کی مجوزہ ریلیز ۱۴؍ اگست ۲۰۲۶ء بتائی جا رہی ہے۔

کارتک آرین کی آنے والی فلم ’’ناگ زیلا‘‘ میں روی کشن کی شمولیت کی خبریں سامنے آئی ہیں۔ حالیہ رپورٹس کے مطابق، اداکار سے سیاستداں بننے والے روی کشن اس فلم میں ویلن کا کردار ادا کریں گے۔ تاہم، اس حوالے سے نہ تو روی کشن اور نہ ہی فلم کے میکرز نے اب تک کوئی باضابطہ تصدیق کی ہے۔ رپورٹس میں یہ بھی کہا گیا ہے کہ روی کشن فلم کی شوٹنگ شروع کرنے کے لیے خاصے پُرجوش ہیں۔ بالی ووڈ ہنگامہ کے حوالے سے ذرائع کا کہنا ہے کہ فلم میں کارتک آرین کا کردار نہایت اہم ہے اور کہانی میں ویلن کا کردار بھی مضبوط ہوگا۔ میکرز کو محسوس ہوا کہ روی کشن اس کردار کے لیے بالکل موزوں ہیں۔ انہوں نے حالیہ برسوں میں ’’لاپتہ لیڈیز‘‘ (۲۰۲۴ء)، ’’معاملہ قانونی ہے‘‘ (۲۰۲۴ء) اور ’’سن آف سردر‘‘ (۲۰۲۴ء) جیسی فلموں میں اپنی اداکاری سے اپنی صلاحیت ثابت کی ہے۔ اسی وجہ سے انہیں اس منفرد اور اچھی طرح سے لکھے گئے کردار کے لیے منتخب کیا گیا۔

یہ بھی پڑھئے:پرینکا چوپڑہ ۸۳؍ویں گولڈن گلوب ایوارڈز کی پرزینٹیٹر بنیں

ذرائع کے مطابق، کارتک آرین اور روی کشن کے درمیان اسکرین پر آنے والے مناظر فلم کا خاص حصہ ہوں گے، جو ناظرین کے لیے خاص کشش کا باعث بن سکتے ہیں۔’’ناگ زیلا‘‘ میں کارتک آرین پریم وادیشور پیارے چند کا کردار ادا کر رہے ہیں، جو ایک اِچھادھاری ناگ ہے۔ فلم سے ان کی پہلی جھلک اپریل ۲۰۲۵ء میں جاری کی گئی تھی۔ اس فلم کو کرن جوہر، مہاویر جین، آدر پونا والا، اپوروا مہتا، مرگھدیپ سنگھ لامبا اور سوجیت جین پروڈیوس کر رہے ہیں۔ ’’ناگ زیلا‘‘ کو فینٹسی، لوک داستانوں اور مکمل تفریح کا امتزاج قرار دیا جا رہا ہے، تاہم اس کی کہانی سے متعلق مزید تفصیلات ابھی منظرِ عام پر نہیں آئیں۔

یہ بھی پڑھئے:شاہ رخ خان کی فلم ’’کنگ‘‘ کا حصہ بننا میرے لیے بڑی بات ہے: اکشے اوبرائے

کیا ’’ناگ زیلا‘‘ کی ریلیز مؤخر ہو سکتی ہے؟
فی الحال فلم کی ریلیز کی تاریخ ۱۴؍ اگست ۲۰۲۶ء بتائی جا رہی ہے۔ تاہم، رواں ماہ کے آغاز میں سامنے آنے والی ایک رپورٹ میں دعویٰ کیا گیا تھا کہ فلم کی شوٹنگ ابھی جاری ہے اور اسے مکمل ہونے میں مزید چند ماہ لگ سکتے ہیں۔ چونکہ میکرز اس پروجیکٹ کو جلد بازی میں مکمل نہیں کرنا چاہتے، اس لیے امکان ظاہر کیا جا رہا ہے کہ فلم کی ریلیز میں معمولی تاخیر ہو سکتی ہے۔