سلمان خان کی جنگی ڈراما فلم کی ریلیز تاریخ کا اعلان، شردھا کپور کی سوانحی فلم سے ٹکراؤ طے؛ دونوں فلموں کی کامیابی کے لیے شائقین کی توجہ حاصل کرنا اہم چیلنج ہوگا۔

بالی ووڈ کے سپر اسٹار سلمان خان کی طویل عرصے سے زیرِ انتظار فلم’’ماتربھومی: مے وار ریسٹ اِن پیس‘‘ کی ریلیز تاریخ کا اعلان کردیا گیا ہے۔ یہ فلم ۴؍ دسمبر ۲۰۲۶ء کو ملک بھر کے سنیما گھروں میں نمائش کے لیے پیش کی جائے گی۔ دلچسپ بات یہ ہے کہ اسی دن اداکارہ شردھا کپور کی فلم ’ایٹھا‘  بھی ریلیز ہوگی، جس کے باعث دونوں فلموں کے درمیان باکس آفس پر براہِ راست مقابلہ دیکھنے کو ملے گا۔ ایک طرف سلمان خان جنگی پس منظر پر مبنی فلم میں مرکزی کردار ادا کررہے ہیں، تو دوسری جانب شردھا کپور ایک معروف مراٹھی لوک فنکارہ کی زندگی پر مبنی سوانحی فلم کے ذریعے بڑے پردے پر واپسی کی تیاری کررہی ہیں۔ یوں دسمبر کے پہلے ہفتے میں بالی ووڈ شائقین کو دو مختلف موضوعات اور انداز کی فلمیں دیکھنے کا موقع ملے گا۔ 

یہ بھی پڑھئے:اُرمیلا ماتونڈکر نے کلاسیکی گیت ’میرے پیا گئے رنگون‘ پر پرفارمنس دیا

 سلمان خان کی اس فلم کا اعلان ابتدا میں ’’بیٹل آف گلوان‘‘ کے نام سے کیا گیا تھا، لیکن بعد میں اس کا عنوان تبدیل کرکے ’ماتربھومی: مے وار ریسٹ اِن پیس‘ رکھ دیا گیا۔ فلم کی ہدایت کاری اپوروا لکھیا نے کی ہے اور سلمان خان کے ساتھ چترانگدا سنگھ اہم کردار میں نظر آئیں گی۔ فلم کی کہانی جون ۲۰۲۰ء میں مشرقی لداخ کی وادی گلوان میں ہندوستانی اور چینی فوجیوں کے درمیان ہونے والی جھڑپ سے متاثر ہے۔ سلمان خان اس میں کرنل بِکّوملا سنتوش بابو کا کردار ادا کررہے ہیں، جو ۱۶؍ بہار رجمنٹ کے کمانڈنگ افسر تھے اور اس جھڑپ کے دوران ہندوستانی فوجیوں کی قیادت کررہے تھے۔ انہیں بعد از مرگ مہاویر چکر سے نوازا گیا تھا۔ فلم میں فوجی جوانوں کی بہادری کے ساتھ ان کے اہل خانہ کی زندگی، مشکلات اور قربانیوں کو بھی پیش کرنے کی کوشش کی گئی ہے۔ 
’ماتربھومی‘ کی ریلیز پہلے اپریل ۲۰۲۶ء میں متوقع تھی، لیکن مختلف وجوہات کے باعث اس کی نمائش ملتوی ہوتی رہی۔ فلم کی کہانی میں تبدیلی اور سرکاری دباؤ سے متعلق قیاس آرائیوں پر سلمان خان نے ٹریلر لانچ کے موقع پر وضاحت کرتے ہوئے کہا کہ حکومت کی جانب سے اسکرپٹ دوبارہ لکھنے کے لیے کوئی دباؤ نہیں تھا۔ انہوں نے ان خبروں کو بے بنیاد قرار دیا اور کہا کہ فلم میں کسی ملک یا فریق کو منفی انداز میں پیش کرنے کے بجائے فوجیوں اور ان کے اہل خانہ کی جدوجہد دکھائی گئی ہے۔ سلمان کے مطابق فلم میں یہ بھی بتایا گیا ہے کہ مشکل حالات میں فوجی جوانوں کے لیے ملک سب سے مقدم ہوتا ہے۔
فلم کی تاخیر کے بارے میں سلمان خان نے اپنے مخصوص مزاحیہ انداز میں کہا کہ اس مرتبہ وہ دیر سے نہیں ہیں بلکہ وی ایف ایکس (VFX) کا کام تاخیر کا شکار ہوا ہے۔ انہوں نے یہ بھی بتایا کہ فلم کی تیاری کے دوران اداکارہ چترانگدا سنگھ کو پیش آنے والے حادثے اور اس کے بعد فزیوتھراپی کی ضرورت کے باعث بھی کام کا شیڈول متاثر ہوا۔ اب فلم کی ریلیز کے لیے ۴ دسمبر کی تاریخ مقرر کی گئی ہے۔  
دوسری جانب شردھا کپور کی فلم ’’ایٹھا‘‘ بھی ۴ ؍دسمبر کو سنیما گھروں میں پیش کی جائے گی۔ لکشمن اتیکر کی ہدایت کاری میں بننے والی یہ فلم مہاراشٹر کی مشہور تماشہ اور لاونی فنکارہ وٹھابائی نارائن گاؤںکر کی زندگی اور فن پر مبنی ہے۔ شردھا کپور اس فلم میں مرکزی کردار ادا کررہی ہیں، جبکہ رندیپ ہڈا اور نانا پاٹیکر بھی اہم کرداروں میں دکھائی دیں گے۔ فلم میں ایک ایسی باصلاحیت فنکارہ کی زندگی کے مختلف پہلو پیش کیے جائیں گے، جس نے مردوں کے غلبے والے فن کی دنیا میں اپنی محنت اور صلاحیت کے بل پر نمایاں مقام حاصل کیا تھا۔

یہ بھی پڑھئے:ٹیسلا سائبرٹرک کی پیداوار کم کرکے سائبرکیب کی تیاری بڑھائے گی

’’ایٹھا‘‘ کی ریلیز پہلے ۲۸؍ اگست ۲۰۲۶ء کو طے کی گئی تھی، لیکن یش کی فلم ’’ٹاکسک‘‘ کے ساتھ ممکنہ ٹکراؤ سے بچنے کے لیے اس کی تاریخ تبدیل کرکے ۴ دسمبر کردی گئی تھی۔ اب اسی تاریخ پر سلمان خان کی ’’ماتربھومی‘‘ کی ریلیز کے اعلان نے فلمی مقابلے کو مزید دلچسپ بنادیا ہے۔ دونوں فلموں کی کہانی، موضوع اور شائقین کا حلقہ مختلف ہے۔ ’’ماتربھومی‘‘ میں سلمان خان کی مقبولیت، فوجی پس منظر اور حب الوطنی پر مبنی کہانی اس کی سب سے بڑی کشش ہوسکتی ہے، جبکہ ’’ایٹھا‘‘ میں شردھا کپور کا نیا کردار، مراٹھی ثقافت، لاونی اور ایک معروف فنکارہ کی زندگی کی عکاسی ناظرین کو متوجہ کرسکتی ہے۔ سلمان خان کی فلم بڑے پیمانے پر جنگی ڈراما ہے، جب کہ شردھا کی فلم ایک سوانحی اور ثقافتی موضوع پر مبنی ہے۔
ایک ہی دن دو فلموں کی ریلیز سے سنیما گھروں میں اسکرینوں کی تقسیم، ابتدائی شوز، ناظرین کی ترجیحات اور پہلے دن کے باکس آفس کلیکشن پر اثر پڑسکتا ہے۔ سلمان خان اور شردھا کپور دونوں کے مداح اپنی پسندیدہ فلم کو کامیاب بنانے کی کوشش کریں گے۔ اب دیکھنا یہ ہے کہ ۴ دسمبر کو باکس آفس پر سلمان خان کی ’’ماتربھومی‘‘ سبقت حاصل کرتی ہے یا شردھا کپور کی ’’ایٹھا‘‘ اپنی منفرد کہانی کے ذریعے ناظرین کا دل جیتنے میں کامیاب رہتی ہے۔