سابق ہندوستانی کرکٹ کپتان سورو گنگولی کرکٹ سے ہٹ کر ایک نئے چیلنج کا سامنا کرنے جا رہے ہیں۔ وہ تقریباً ایک دہائی بعد ٹیلی ویژن پر لوٹتے ہوئے ’’بگ باس بنگلہ‘ ‘ کے میزبان بن گئے ہیں۔

سابق ہندوستانی کرکٹ کپتان  سورو گنگولی  کرکٹ سے ہٹ کر ایک نئے چیلنج کا سامنا کرنے جا رہے ہیں۔ وہ تقریباً ایک دہائی بعد ٹیلی ویژن پر لوٹتے ہوئے ’’بگ باس بنگلہ‘ ‘ کے میزبان بن گئے ہیں۔ گنگولی پہلی بار مقبول ریئلیٹی شو فرنچائز ’’بگ باس‘‘ کا حصہ بنے ہیں اور اس کے بنگالی ایڈیشن کی میزبانی کی ذمہ داری سنبھالی ہے۔’’بگ باس بنگلہ‘ ‘کے تیسرے سیزن کا پریمیئر ۳۰؍ اگست کو  اسٹار جلسہ اور  جیو ہاٹ اسٹار  پر ہوا۔
 گنگولی نے ’’بگ باس‘‘ کو’’ملک کا سب سے بڑا شو‘‘  قرار دیتے ہوئے کہا کہ اس پروگرام کی کامیابی کی بڑی وجہ اس کی وسیع ناظرین کی تعداد اور مختلف زبانوں میں اس کی مقبولیت ہے۔انہوں نے کہا’بگ باس ملک کا سب سے بڑا شو ہے اور یہ ہمیشہ اپنی وسیع ناظرین کی تعداد اور مختلف زبانوں میں پھیلاؤ کی وجہ سے دوسرے شوز سے الگ رہا ہے۔‘‘  گنگولی کے لیے یہ ذمہ داری اینڈیمول شائن انڈیا کے ساتھ پہلی وابستگی بھی ہے۔ اس کے علاوہ یہ تقریباً  ۱۰ ؍سال بعد ٹیلی ویژن کی میزبانی میں ان کی واپسی  ہے۔ انہوں نے کہا’’میں نے ٹی وی پر بہت سے شوز کیے ہیں، لیکن کبھی بگ باس کی میزبانی نہیں کی۔ اس لیے پہلی باراینڈیمول شائن انڈیا کے ساتھ منسلک ہونا اور ۱۰؍ سال بعد بگ باس بنگلہ کے ذریعے اس کے بنگالی ایڈیشن کی قیادت کرنا میرے لیے ایک شاندار نیا تجربہ ہے۔‘‘ 

یہ بھی پڑھئے:زیوریو پانچ سیٹ میں جیتے، کئی سیڈ یافتہ مرد کھلاڑی یو ایس اوپن سے باہر

 سورو گنگولی کو ہندوستان کے بااثر ترین کرکٹ کپتانوں میں شمار کیا جاتا ہے۔ انہوں نے ہندوستان کی جانب سے  ۱۱۳؍ ٹیسٹ اور ۳۱۱؍ ون ڈے انٹرنیشنل میچز  کھیلے۔ اپنے بین الاقوامی کریئر میں انہوں نے ۱۸۵۷۵؍  رنز  بنائے، جن میں ۳۸ ؍سنچریاں  شامل تھیں۔کپتان کی حیثیت سے گنگولی نے ہندوستانی کرکٹ میں ایک نئی نسل تیار کرنے میں اہم کردار ادا کیا اور ٹیم کو کئی یادگار کامیابیوں تک پہنچایا۔ ہندوستان نے گنگولی کی قیادت میں  ۲۰۰۱ء کی مشہور ٹیسٹ سیریز میں آسٹریلیا کو شکست  دی  جبکہ  ۲۰۰۳ء کے ورلڈ کپ کے فائنل تک بھی رسائی حاصل کی۔ ۲۰۰۲ء میں چیمپئن ٹرافی کے فائنل میں سری لنکا کے ساتھ مشترکہ فاتح بھی قرار دیا گیا  کیونکہ بارش کے باعث فائنل مکمل نہیں ہو سکا تھا۔
 کرکٹ سے ریٹائرمنٹ کے بعد بھی گنگولی کھیلوں اور عوامی زندگی میں سرگرم رہے۔ انہیں  ۲۰۰۴ء میں پدم شری  سے نوازا گیا، جو ہندوستان کا چوتھا سب سے بڑا شہری اعزاز ہے۔ ۲۰۱۹ء میں گنگولی کو  بورڈ آف کنٹرول فار کرکٹ اِن انڈیا ( بی سی سی آئی ) کا صدر منتخب کیا گیا۔ اس طرح انہوں نے ہندوستانی کرکٹ کی انتظامیہ میں بھی اہم ذمہ داری سنبھالی۔ اپنے جارحانہ کپتانی کے انداز، میدان پر جوشیلے جشن اور یادگار قیادت کے لیے مشہور گنگولی نے بعد میں کرکٹ انتظامیہ کے ساتھ ساتھ ٹیلی ویژن کی دنیا میں بھی اپنی جگہ بنائی۔ وہ بنگالی ٹیلی ویژن کے مقبول شو  ’’داداگیری‘‘ کی میزبانی بھی کر چکے ہیں۔

یہ بھی پڑھئے:’’جیلر ۲‘‘ کی ریلیز کی تاریخ کی تصدیق، ۱۵؍اکتوبر کو ریلیز ہوگی

 ’’بگ باس بنگلہ‘‘ تقریباً ایک دہائی کے وقفے کے بعد دوبارہ بنگالی ٹیلی ویژن پر واپس آیا ہے۔ بنگالی ایڈیشن ’’بگ باس‘‘ فرنچائز کی ہندوستان بھر میں توسیع کا حصہ ہے۔ اس شو کے مختلف زبانوں میں ایڈیشنز موجود ہیں، جن میں  ہندی، تمل، تیلگو، کنڑ، ملیالم اور مراٹھی  شامل ہیں۔ دوسری جانب  سلمان خان  بدستور ہندی ایڈیشن کے میزبان ہیں  جبکہ ’’بگ باس ۲۰‘‘ کا پریمیئر۶ ؍ ستمبر کو ہونے والا ہے۔سورو گنگولی کے لیے ’’بگ باس بنگلہ‘‘ ان کے غیر معمولی کریئر کا ایک اور نیا باب ہے۔ بین الاقوامی کرکٹ، کپتانی اور کرکٹ انتظامیہ کے بعد اب وہ ٹیلی ویژن کی دنیا میں ایک نئے کردار میں نظر آ رہے ہیں۔