بالی ووڈ فلم ساز کرن جوہر کی مشہور فلم فرنچائز ’’اسٹوڈنٹ آف دی ایئر‘‘ ایک نئے اور سنسنی خیز انداز میں واپسی کے لیے تیار ہے۔ اس فرنچائز کی نئی ویب سیریز ’’اسٹوڈنٹ آف دی ایئر: آفٹر ڈارک‘‘ (Student of the Year: After Dark) کا ٹریلر جاری کر دیا گیا ہے۔

بالی ووڈ فلم ساز کرن جوہر کی مشہور فلم فرنچائز ’’اسٹوڈنٹ آف دی ایئر‘‘ ایک نئے اور سنسنی خیز انداز میں واپسی کے لیے تیار ہے۔ اس فرنچائز کی نئی ویب سیریز ’’اسٹوڈنٹ آف دی ایئر: آفٹر ڈارک‘‘ (Student of the Year: After Dark) کا ٹریلر جاری کر دیا گیا ہے، جس میں اداکارہ شانایا کپور دوہری کردار میں نظر آئیں گی۔ اس بار کہانی کالج کی رونقوں، محبت اور طلبہ کے درمیان مقابلے سے آگے بڑھ کر قتل، دھوکے، راز اور سنسنی خیز تحقیقات کے گرد گھومتی ہے۔

سیریز میں شنایا کپور نے دو جڑواں بہنوں، عائشہ ملک (Aayesha Malik) اور ادیتی (Aditi) کا کردار ادا کیا ہے۔ عائشہ سینٹ ٹریسا ہیریٹیج اسکول کی مقبول طالبہ ہے، جس کی لاش ایک برفیلی جھیل میں ملتی ہے۔ اس کی پراسرار موت کے بعد اس کی جڑواں بہن ادیتی یہ ماننے کے لیے تیار نہیں کہ اس کی بہن کی موت محض ایک حادثہ تھی۔اپنی بہن کی موت کی اصل وجہ جاننے کے لیے ادیتی خود سینٹ ٹریسا اسکول پہنچ جاتی ہے اور وہاں جاری ’’اسٹوڈنٹ آف دی ایئر‘‘ کے سخت مقابلے میں حصہ لیتی ہے۔ اس کا مقصد صرف مقابلہ جیتنا نہیں، بلکہ اپنی بہن کے قاتل تک پہنچنا اور اس موت کے پیچھے چھپے حقائق کو سامنے لانا بھی ہے۔ ٹریلر میں دکھایا گیا ہے کہ آئیشہ کی موت کے بعد اس کے قریبی دوستوں اور ساتھی طلبہ کے کردار بھی مشکوک دکھائی دیتے ہیں۔ ہر شخص کے پاس کوئی نہ کوئی راز ہے، جس کی وجہ سے ادیتی کے لیے اصل حقیقت تک پہنچنا مزید مشکل ہو جاتا ہے۔
کہانی میں کئی اہم کردار سامنے آتے ہیں: حسد کرنے والی بہترین دوست: جو عائشہ کے ساتھ قریبی تعلق رکھنے کے باوجود اس کی کامیابی اور مقبولیت سے ناخوش تھی۔ مسترد کیا گیا عاشق: جس کے تعلقات  عائشہ کے ساتھ پیچیدہ تھے اور جو اپنے آپ کو اس کا قریبی دوست ظاہر کرتا ہے۔ مشکوک روم میٹ: جس کے رویے اور   عائشہ کے ساتھ تعلقات پر سوال اٹھتے ہیں۔ بظاہر بہترین بوائے فرینڈ: جو باہر سے بے عیب دکھائی دیتا ہے، لیکن اس کے بارے میں بھی کئی سوالات موجود ہیں۔ ادیتی کی تفتیش کے دوران یہ واضح ہوتا جاتا ہے کہ عائشہ کی زندگی میں موجود تقریباً ہر شخص کے پاس کچھ نہ کچھ ایسا ہے جسے وہ دنیا سے چھپانا چاہتا ہے۔ تاہم، اصل قاتل کون ہے اور اس کی موت کے پیچھے کیا محرک تھا، اس کا انکشاف سیریز میں ہوگا۔

یہ بھی پڑھئے:اسپین کی الیکسیا پوتیاس نے خواتین کا بیلن ڈی اور جیت لیا، بونماتی کے ریکارڈ کی برابری

 اس ویب سیریز کی سب سے اہم بات یہ ہے کہ یہاں طلبہ کے درمیان مقابلہ محض شہرت یا کامیابی حاصل کرنے تک محدود نہیں رہتا۔ ادیتی کی تحقیقات اسے اسکول میں ہونے والے ایک خفیہ مقابلے تک لے جاتی ہیں، جس کے بارے میں سامنے آنے والی معلومات کہانی کو مزید خوفناک بنا دیتی ہیں۔اس مقابلے میں آگے بڑھنے کے لیے طلبہ کس حد تک جا سکتے ہیں؟ کیا  عائشہ کی موت کا تعلق بھی اسی خفیہ کھیل سے ہے؟ اور کیا ادیتی قاتل تک پہنچنے سے پہلے خود کسی خطرے میں پھنس جائے گی؟ ٹریلر ان سوالات کو جنم دیتا ہے اور ناظرین کے لیے تجسس برقرار رکھتا ہے۔ کرن جوہر کی ۲۰۱۲ء میں ریلیز ہونے والی فلم ’’اسٹوڈنٹ آف دی ایئر‘‘ میں عالیہ بھٹ، ورون دھون اور سدھارتھ ملہوترا نے مرکزی کردار ادا کیے تھے۔ اس فلم میں اسکول کی زندگی، دوستی، رومانس اور طلبہ کے درمیان مقابلے کو نمایاں کیا گیا تھا۔ بعد ازاں ۲۰۱۹ء میں اس کا دوسرا حصہ’ ’اسٹوڈنٹ آف دی ایئر ۲‘‘ ریلیز ہوا، جس میں ٹائیگر شروف، اننیا پانڈے اور تارا ستاریا نے اداکاری کی۔ اب ’’آفٹر ڈارک‘‘ کے ذریعے اس معروف فرنچائز کو ویب سیریز کی شکل میں ایک مختلف انداز میں پیش کیا جا رہا ہے۔ اس مرتبہ کہانی میں گلیمر اور رومانس کے بجائے قتل کی گتھی، نفسیاتی کشمکش، رقابت اور پوشیدہ رازوں کو زیادہ اہمیت دی گئی ہے۔

یہ بھی پڑھئے:فلم ’’کنگ‘‘ ریلیز ہونے میں تاخیر نہیں، نئے پوسٹر کے ذریعے تاریخ کی تصدیق

’’اسٹوڈنٹ آف دی ایئر: آفٹر ڈارک‘‘ کی ہدایت کاری ریما مایا نے کی ہے، جبکہ اسے کرن جوہر کی پروڈکشن کمپنی دھرمٹک انٹرٹینمنٹ (Dharmatic Entertainment) کے تحت تیار کیا گیا ہے۔شنایا کپور کے علاوہ سیریز کی کاسٹ میں ابھینو سنگھ، دیوِک شرما، مانیا گروور، دیا دامانی، آدی ملک، شیبا چڈھا اور وویک گومبر بھی شامل ہیں۔ شانایا کے لیے یہ پروجیکٹ خاص اہمیت رکھتا ہے، کیونکہ اس کے ذریعے وہ او ٹی ٹی پلیٹ فارم پر ایک اہم کردار کے ساتھ جلوہ گر ہوں گی۔ نئی ویب سیریز ۱۳؍ نومبر ۲۰۲۶ء سے جیوہاٹ اسٹار (JioHotstar) پر اسٹریم کی جائے گی۔ ٹریلر کے مطابق ناظرین کو سینٹ ٹریسا اسکول کی ایسی دنیا دیکھنے کو ملے گی جہاں ہر طالب علم کسی نہ کسی راز کا امین ہے اور سچ کے قریب پہنچنا مزید خطرناک ثابت ہو سکتا ہے۔